Европа
Италијански скијач и неговата девојка загинаа на планина, ги нашле врзани заедно
![](https://makfax.com.mk/wp-content/uploads/2024/06/Screenshot-2024-06-05-111419.jpg)
Жан Даниел Песион, 28-годишен италијански претставник во брзо скијање, и Елиса Арлијан, 26-годишна ски-инструкторка и училишна учителка, загинаа во трагична планинска несреќа, соопшти Италијанската федерација за зимски спортови (ФИСИ).
Тие паднале од височина од приближно 700 метри.
Несреќата се случила на планината Зербион, во долината Аоста. Двојката тргнала рано наутро за да го достигне врвот, што и двајцата го знаеле, но кога не успеале да се вратат, нивното семејство повикало спасувачи, објави италијанскиот медиум РАИ.
Веднаш биле испратени хеликоптери, но бидејќи на карпите немало знаци што укажуваат на пад, потрагата траела со часови. Спасувачите користеле сигнал од нивниот мобилен телефон за да ги лоцираат и ги нашле врзани.
Во потрагата учествувале екипи на алпската спасувачка служба, полиција и пожарникари. Претседателот на регионалниот совет на долината Аоста, Алберто Бертин, рече дека ова е момент на длабока тага. „Два млади живота уништени од несреќа на планина, планината што беше нивна страст“, истакна тој.
Песион го зазеде 15-тото место во конечниот пласман на Светскиот куп во 2021 година и го освои 22. место во дисциплината брзо скијање на Светското првенство во 2022 година, пренесува „Скај њуз“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
139 луѓе во Русија имаат симптоми на ботулизам, многу од нив се во тешка состојба
![](https://makfax.com.mk/wp-content/uploads/2018/08/rusija-brza-pomosh.jpg)
Најмалку 139 лица во Русија побарале лекарска помош со симптоми на ботулизам во изминатите неколку дена, соопштија вчера властите. Ботулизмот, што се пренесува преку храна, е ретка болест предизвикана од токсин произведен од еден вид бактерии, Clostridium botulinum.
Јадењето храна контаминирана со токсинот може да предизвика парализа, отежнато дишење, а понекогаш и смрт. Симптомите типични за ботулизам може да вклучуваат силна абдоминална болка, повраќање, дијареа, заматен вид, сува уста, отежнато голтање или зборување и невролошки нарушувања, пишува Асошиетед прес.
Во Москва 121 лице побарале лекарска помош поради сомневање за ботулизам, изјави вчера заменик-градоначалничката Анастасија Ракова за руската државна новинска агенција Тасс. Таа додаде дека 55 заболени се во тешка состојба, од кои 30 се на интензивна нега.
Дванаесет лица побарале лекарска помош поради сомневање за ботулизам во Нижни Новгород, град на околу 400 километри источно од Москва. Девет од нив се во тешка состојба, соопшти регионалното Министерство за здравство. Шест лица се хоспитализирани со симптоми на ботулизам во Казан, град на околу 700 километри источно од Москва.
Се чини дека здравствените власти поврзаа барем некои од случаите во Москва со две марки салати, готови за јадење. Рускиот надзорен орган за јавно здравје Роспотребнадзор ја прекина продажбата на салати откако беа пријавени првите случаи на труење и сега се чекаат резултатите од истрагата.
Европа
(Видео) Дрон сними ајкула во близина на плажа, капачите веднаш излегле од водата: паника во Шпанија
![](https://makfax.com.mk/wp-content/uploads/2024/06/ajkula-spanija.jpg)
Ново забележување ајкула доведе до затворање уште две плажи во Шпанија, а предатори се забележани кај брегот на Гран Канарија.
Спасувачите им наредиле на капачите да излезат од водата на плажата Меленара на источниот брег на островот, втор ден по ред, кога полициски дрон забележал ајкула на плажата набргу откога повторно била отворена вчераутро.
Забраната за пливање е проширена и на соседната плажа Салинетас, пишува „Дејли мејл“.
И околу два часа подоцна спасувачите подигнаа црвено знаме на трета локација – плажата Сан Аугустин на југот на островот – откога турист ја фотографира перката на ајкула која излегува од водата.
Веднаш не беше јасно дали големата риба е истата што ги исплаши капачите на плажата Меленара во саботата околу 17 часот и доведе до првото затворање на плажата.
Вчераутро накратко беше отворена за пливање пред второто затворање околу 13 часот кога дронови на локалната полиција забележаа ајкула во близина на пристаништето Талијарте до плажата Меленара.
Локалната полиција потврди по второто, многу појасно видување преку дронот, во истата област вчера околу 17 часот дека се работи за ајкула чекан, истиот вид што предизвика паника во саботата кога се појави во близина на брегот.
Тие можат да бидат долги и до шест метри.
Европа
Русија: Договараме размена на затвореници со Америка
![](https://makfax.com.mk/wp-content/uploads/2024/06/gerskovic-peskov.jpg)
Кремљ денеска соопшти дека се остварени контакти со САД за можна размена на затвореници, во која би бил и Еван Гершкович, известувач на „Волстрит џурнал“, но дека медиумите не треба да добиваат дополнителни детали за нив.
Портпаролот на Кремљ, Дмитриј Песков, го цитира рускиот претседател Владимир Путин дека рекол на состанокот со уредниците на меѓународните новински агенции претходно овој месец оти Русија и САД биле во контакт за ова прашање.
„Сакам повторно да ве потсетам на разговорот на претседателот со шефовите на новинските агенции во Санкт Петербург, тој потврди дека има такви контакти. Тие продолжуваат, но треба да продолжат во целосна тишина. Затоа, никакви соопштенија, изјави или информации за ова прашање не може да бидат дадени“, рече Песков.
На прашањето зошто судењето на Гершкович за шпионажа се одвива зад затворени врати, Песков рече дека не може да коментира за такви работи бидејќи тоа е судска одлука. „Тоа е одлука на судот. Не можеме да го коментираме тоа“, рече тој.
Гершкович (32) беше приведен од Федералната служба за безбедност (ФСБ) на 29 март 2023 година во уралскиот град Екатеринбург, 1.400 километри источно од Москва, под обвинение за шпионажа, што носи до 20 години затвор.
Гершкович, првиот американски новинар што беше приведен под обвинение за шпионажа од крајот на Студената војна пред повеќе од три децении, постојано ги негира обвинувањата.