Европа
Медведев до Западот: Кажете им ја горчливата вистина на вашите гласачи, не третирајте ги како идиоти без мозок

Заменик-претседателот на рускиот Совет за безбедност и поранешен руски претседател Дмитриј Медведев изјавите на западните политичари за наводниот можен конфликт на Русија со НАТО и Европската унија ги нарече „исклучително опасни муабети“.
„Сунак, Шолц, Макрон, норвешки, фински, полски и други лидери од земјите на НАТО велат дека мора да бидат подготвени за војна со Русија“, напиша тој на својот канал на Телеграм. Медведев истакна дека, иако руската страна повеќепати изјавила дека нема планови за конфликт со НАТО и земјите од Европската унија, „крајно опасните муабети на оваа тема продолжуваат“.
„Причините се очигледни, потребно е да се сврти вниманието на гласачите за да се оправда трошењето милијарди долари за грозоморната Украина.
На крајот на краиштата, огромни суми пари не се трошат за решавање на социјалните проблеми во овие земји, туку за војна во земја која е на умирање и туѓа за даночните обврзници, чие население пребега низ Европа и го тероризира локалното население. Затоа, лидерите на овие земји повторуваат секој ден: мора да се подготвиме за војна со Русија и да продолжиме да и помагаме на Украина, затоа мора да произведеме повеќе тенкови, гранати, беспилотни летала и друго оружје.
Но, сите европски лидери цинично ги лажат своите граѓани. Ако не дај Боже дојде до ваква војна, нема да оди според сценариото на СВО. Нема да се спроведува во ровови со артилерија, оклопни возила, беспилотни летала и опрема за електронско војување.
Значи, поради неспоредливоста на нашиот воен потенцијал, едноставно нема да имаме избор. Одговорот ќе биде асиметричен. За заштита на територијалниот интегритет на нашата земја ќе користат балистички и крстаречки ракети со специјални боеви глави. Ова е засновано на нашите воени документи и на сите им е добро познато, ќе биде апокалипса. Крај на се“, напиша тој.
„Затоа, западните политичари треба на своите гласачи да ја кажат горчливата вистина, а не да ги третираат како идиоти без мозок. Објаснете им што навистина ќе се случи, а не да ја повторуваат лажната мантра за подготвеност за војна со Русија“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.