Италијанската полиција заплени повеќе од 80 килограми кокаин од камион во близина на Неапол, јави денеска италијанската новинска агенција АНСА.

Полицијата уапси 33-годишник и 47-годишник, кои беа фатени како пренесуваат 81,7 килограм кокаин, поделени во 70 дела, од камион во помало комбе во северните предградија на Неапол, јави АНСА.

Проценетата улична вредност на дрогата е речиси 10 милиони евра.

Полицијата вели дека ова е значаен удар врз организираниот криминал, пренесува италијанската агенција.

Иако американскиот претседател Трамп најави средба меѓу американската и руската делегација во Минхен, организаторите на конференцијата потврдија за Би-би-си дека нема руска делегација присутна во германскиот град.

Според Би-би-си, можно е средбата да биде планирана на друго место во градот, но претставници на конференцијата за Би-Би-Си велат дека е малку веројатно германската влада да и даде визи на руската делегација.

Унгарскиот министер за надворешни работи Петер Сијарто изјави дека гледа „обиди за дестабилизација“ на Србија во студентските протести во Србија, кои траат по уривањето на натстрешницата на железничката станица во Нови Сад.

„Гледам обид за дестабилизација на Србија и колку што јас разбирам, тој доаѓа не само од внатре, туку и од надвор“, рече тој во интервју за РТС.

Според него, во интерес на Унгарија е Србија да остане стабилна.

„Ова е добро за Унгарците кои живеат во Србија и за Унгарија поради соработката меѓу двете земји“, додавајќи дека Будимпешта „има доверба во владејачката коалиција во Србија и се надева дека обидот за дестабилизација нема да успее“.

Тој рече дека Србија е најсилната земја на Западен Балкан и дека Унгарија смета дека е во интерес на Европската унија Србија да биде нејзина членка.

„Тоа би била добра вест за Унгарија“, рече тој.