Свет
Mировните преговори за Газа продолжуваат следната недела

Мировните преговори за Газа во Доха беа прекинати денеска, а преговарачите се очекува повторно да се сретнат следната недела за да се обидат да постигнат договор за прекин на борбите меѓу Израел и Хамас и ослободување на преостанатите заложници.
Во заедничката изјава, САД, Катар и Египет рекоа дека Вашингтон предложил нов договор врз основа на точките од минатонеделниот договор, кој ги премостува разликите меѓу двете страни и треба да доведе до брз договор.
Медијаторите ќе продолжат да работат на предлогот и во наредните денови, велат оттаму.
„Сега е поставен патот за тој исход, спасување животи, доставување помош за луѓето во Газа и деескалација на регионалните тензии“, објавија тие.
Израелски официјален претставник изјави дека израелската делегација се упатила дома доцна во петокот и дека израелскиот премиер Бенјамин Нетанјаху треба да се сретне со американскиот државен секретар Ентони Блинкен во понеделник.
Последната рунда повеќемесечни разговори за ставање крај на војната во Газа, во која загинаа десетици илјади Палестинци, почна меѓу Израел и посредниците во четвртокот.
Палестинската милитантна група Хамас не е директно вклучена во преговорите, но е свесна што се случува.
Клучните точки на несогласување беа инсистирањето на Израел дека мирот може да биде возможен само ако Хамас биде уништен, додека Хамас вели дека ќе прифати само трајно, а не привремено примирје.
Други тешкотии вклучуваат редослед на спроведувањето на договорот, бројот и идентитетот на палестинските затвореници кои ќе бидат ослободени заедно со израелските заложници, контролата на граничниот премин меѓу Газа и Египет и слободата на движење на Палестинците во Газа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.