Новоизбраниот американски претседател Доналд Трамп во недела ќе се сретне со Мит Ромни, републиканскиот претседателски кандидат од 2012 година, и веројатно ќе разговараат за неговото ангажирање во новата администрација како државен секретар, тврдат во четвртокот извори запознаени со состанокот.

Според телевизиската мрежа MSNBC, Доналд Трамп ја разгледувал кандидатурата на Мит Ромни за позицијата шеф на Стејт департментот, повикувајќи се на извори од опкружувањето на новиот американски претседател кој на должноста ќе стапи на 20-ти јануари следната година.

Извор на агенцијата Reuters рекол дека во текот на закажаниот состанок во недела се очекува да биде разговарано за многу прашања, како и дека е можно да се зборува и за местото државен секретар на САД.

Тоа би претставувало извонреден пресврт, кога се знае дека Ромни беше жесток критичар на Трамп,и ги повикуваше републиканците да гласаат за кого и да е само не за него, во периодот кога партијата го избираше својот претседателски кандидат.

Ромни во текот на партиските предизборни особено го нападна Трамп поради предлогот да им забрани влез во САД на муслиманите, а ја има и традиционалната републиканска сомничавост кон Русија која во текот на кампањата во 2012 година ја нарече геополитичка закана за САД, потсетува AFP.

Од друга, страна Трамп во својата кампања годинава изјавуваше дека ќе соработува со рускиот претседател Владимир Путин кој пак убаво се изразуваше за овој деловен човек кој стана челник на најмоќната држава.

Медиумите нагаѓаат за повеќе личности за државен секретар, меѓу кои и гувернерот на сојузната држава Јужна Каролина, Ники Хејли, друг републиканец кој на почетокот млако реагираше во однос на Трамп. Во истиот кош е и Рудолф Џулијани, поранешниот градоначалник на Њујорк и непоколеблив приврзаник на Трамп, како и амбасадорот на САД при Обединетите нации, Џон Болтон./крај/мф/сн