По рускиот напад врз пристанишната инфраструктура во украинскиот регион Одеса во текот на ноќта, дрон веројатно паднал на романска територија, потврди денес романското Министерство за одбрана. Инцидентот го означува најновото нарушување на воздушниот простор на НАТО во услови на повторени руски напади врз украинските пристаништа на Дунав, објавува The Kiev Independent.

Округот Измаил, една од главните цели на нападот, се наоѓа веднаш преку реката Дунав од Романија, која дели 600-километарска граница со Украина.

Според соопштението од министерството, радарските системи детектирале групи дронови кои се приближувале кон романскиот воздушен простор, поради што единиците за воздушна одбрана биле ставени во состојба на готовност. Сепак, лошите временски услови, вклучувајќи силни ветрови и ниска облачност, спречиле воени авиони да полетат.

Околу полноќ, жителите на романскиот град Тулча беа предупредени за можна закана преку системот RO-Alert. Во исто време, на украинската страна од Дунав, во близина на пристаништето Измаил, одекнаа низа експлозии додека руските сили ги таргетираа пристанишните објекти.

Романските сили добија пријава за пад на беспилотно летало во близина на селото Гринду, кое се наоѓа на околу пет километри од украинската граница. Воени единици веднаш беа испратени на местото на настанот за да го обезбедат подрачјето и да ги пронајдат остатоците од леталото.

Властите соопштија дека инцидентот не претставувал закана за жителите, но истрагата е сè уште во тек.

Ова не е прв ваков инцидент. Пред два месеци, руски дрон, исто така, влезе во романскиот воздушен простор за време на напад врз Украина, останувајќи околу 50 минути и продирајќи околу 10 километри во територијата. Романските сили во тој момент не презедоа акција против дронот, кој на крајот се врати во Украина.

Претседателот на САД, Доналд Трамп, најави промена во пристапот кон финансирањето на Украина и трговските односи со Индија, како и поддршка за новиот сириски лидер Ахмед ал-Шара, за време на редовна средба со новинарите во Белата куќа.

Трамп истакна дека САД повеќе не издвојуваат свои средства за Украина, туку добиваат пари преку НАТО.

„Веќе не трошиме пари. Сега тие се плаќаат преку НАТО“, рече американскиот претседател, проценувајќи дека САД досега претрпеле штета од 350 милијарди долари поради украинскиот конфликт.

Тој нагласи дека конфликтот во Украина повеќе не претставува ризик за избувнување на третата светска војна.

„Да бев претседател, оваа војна никогаш немаше да се случи. А да не бев претседател сега, може да доведе до Трета светска војна. Тоа нема да се случи“, рече Трамп и потсети дека „осум војни завршија, а деветтата е на пат“.

Затоплување на односите со Индија
Трамп ја објави можноста за намалување на царините за индиска стока, откако Њу Делхи го намали увозот на руска нафта.

„Во моментов, царините за Индија се многу високи поради руската нафта. Во одреден момент, планираме да ги намалиме“, рече Трамп, нагласувајќи дека односите со премиерот Нарендра Моди се „одлични“.

„Тој е мој пријател. Тој сака да одам таму“, додаде американскиот претседател, не исклучувајќи ја посетата на Индија во текот на следната година.

Сирија – новиот сојузник на Вашингтон
Американскиот лидер го угости привремениот претседател на Сирија, Ахмед ал-Шара, во Белата куќа, кого го нарече „силен лидер и жилав човек“.

„Тој е многу силен лидер. Ми се допаѓа, се согласувам со него“, рече Трамп по средбата, додавајќи дека САД ќе ја поддржат реконструкцијата на Сирија и стабилноста на Блискиот Исток.

Во изјава за „Фокс њуз“, Ел Шара нагласи дека Сирија сака да стане сојузник на САД и очекува американски инвестиции, особено во секторот за производство на гас.

Тој истакна дека врските на сириските власти со терористичките групи се „минато“, како и дека е формирана комисија која ќе го повика на одговорност поранешниот претседател Башар ал-Асад, кој е во Русија по државниот удар во Сирија.

„Правдата мора да победи. Формиравме комисија за правда за да ги повикаме сите вклучени, вклучително и Башар ал-Асад, на одговорност за она што се случи“, рече ал-Шара.

Фото: принтскрин

Папата Лав XIV го носи Холивуд во Ватикан. Првиот папа од Соединетите Американски Држави, кој беше избран во мај за наследник на папата Франциск, ќе биде домаќин на голем број познати актери и режисери на 15 ноември. На списокот на гости се наоѓаат добитничката на Оскар Кејт Бланшет, ѕвездата од „Северанс“ Адам Скот, легендарниот режисер Спајк Ли, како и Крис Пајн и режисерот на „Лудиот Макс“ Џорџ Милер, објави USA TODAY.

Меѓу гостите кои се очекува да се сретнат со Папата се и Алисон Бри и Дејв Франко, ѕвездата од „Господарот на прстените“ Виго Мортенсен и режисерите Гас Ван Сант и Тони Кеј. Ватикан на 10 ноември соопшти дека Папата „изразил желба да го продлабочи дијалогот со светот на киното, истражувајќи ги можностите што ги нуди уметничката креативност за мисијата на Црквата и промоцијата на човечките вредности“.

Настанот е организиран од Канцеларијата за култура на Ватикан како дел од тековната Света година на Католичката црква. Ретко е папа да биде домаќин на холивудски ѕвезди. Неговиот претходник, папата Франциск, беше домаќин на комичари, меѓу кои Конан О’Брајан, Стивен Колберт, Џими Фалон, Вупи Голдберг и Крис Рок во јуни 2024 година.

Во јуни оваа година, Ал Пачино стана првата холивудска ѕвезда што имаше приватна аудиенција со папата Лав. Како дел од најавата за новиот настан, Ватикан сподели список на омилените филмови на папата роден во Чикаго: „It’s a Wonderful Life“ (1946), „My Songs, My Dreams“ (1965), „Ordinary People“ (1980) и „Life is Beautiful“ (1997).

Веста доаѓа само неколку дена откако папата Лав се сретна со Роберт Де Ниро и неговите деца, Џулијан и Дрена Де Ниро, во Ватикан на 7 ноември. „Тој е добар човек. Бев многу, многу среќен што го запознав“, изјави актерот за CNN по средбата.

„Мојот внук, кој почина од предозирање пред нешто повеќе од две години, се викаше Лео. Ќерка ми му даде негова слика и тоа беше прекрасен, многу посебен момент“, додаде Де Ниро.

Фото: ЕПА