Кандидатот за нов бугарски претседател поддржан од опозициската Бугарска социјалистичка партија (БСП), Румен Радев води пред Цецка Цачева, кандидат на владејачката Граѓани за европска бугарија (ГЕРБ) пред вториот круг од претседателските избори кои ќе се одржат во неделаа, а неговата победа може да доведе до нови парламентарни избори, доколку премиерот Бојко Борисов го одржи ветувањето и поднесе оставка доколку биде поразена кандидатката на неговата партија од десниот центар.

Поранешниот командант на бугарските воздухопловни сили води со 51 отсто во однос на 40-проценти колку што анкетите ѝ даваат на 58-годишната Цецка Цачева, која е претседателкана парлaмeнтот.

Победата на 53-годишниот поранешен генерал Румен Радев, покрај нестабилноста којашто би ја предизвикал премиерот Бојко Борисов со евентуалната оставка, може да доведе до приближување на Бугарија кон Русија, и со тоа да го предизвика незадоволството на Европската унија и на НАТО, сметаат аналитичарите во Брисел.

Радев, пак, ги отфрла ваквите стравови за приближување кон Русија. Истакнува дека тој е „генерал на НАТО формиран во САД“ и дека Бугарија нема алтернатива за припадноста во ЕУ и НАТО. Цачева, пак, во кампањата се претставува како фактор на стабилност.

Таа е најквалификуваната за оваа должност, иако не е најхаризматична ниту најпопуларна, смета премиерот Борисов, кој вети дека ќе поднесе оставка уште по првиот изборен круг, но се премисли и најави дека тоа ќе го стори доколку Цачева кончено биде поразена. Но најавата за негова оставка, повеќе ги мобилизираше неговите противници отколку приврзаниците, сметаат политичките коментатори.

Радев, инаку, ново лице во политиката, владејачката партија го нарекува „црвен генерал“ кој на власт ќе ги врати социјалистите и ќе предизвика „замрзнување на европските фондови“, но тој ја освојува наклонетоста на избирачите кои се фрустрирани од политиките на политичката елита која ја сметаат за корумпирана и самодоволна. Неговата предност е одраз на разочарувањето на бугарските избирачи од владата на премиерот Борисов, којашто не успеа да спроведе темелни реформи, ниту да ги сузбие корупцијата во една од најсиромашните членки на ЕУ.

Поранешниот пожарникар, каратист, телохранител, полициски началник и градоначалник на бугарската престолнина Софија, 57-годишниот Бојко Борисов десетина години доминира на тамошната политичка сцена. На земјата ѝ ја донесе многу посакуваната доза стабилност, откако кон крајот на 2014 година, по вторпат стана премиер.

Сепак, сиромаштијата, корупцијата и бавното спроведување на реформите и натаму ја оптоваруваат Бугарија, а последните месеци загриженост предизвикуваат и илјадниците мигранти кои Бугарија ја гледаат како прв чекор кон посакуваниот Запад. Радев ветува дека ќе ги зајакне граничните контроли за да го спречи приливот на мигранти, и по примерот на соседна Романија и поуспешно да се пресмета со корупцијата. Во Бугарија, власта и одлуките ги носат владата и парламентот, а претседателот има право на вето, ги именува клучните функционери и е врховен командант на воените сили.

Прозападно ориентираниот досегашен претседател Росен Плевнелиев, инаку близок на Борисов, не сакаше да се кандидира за новиот петгодишен мандат./крај/мф/сн