Регион
Бугарското Обвинителство побара одземање на имунитетот на Борисов

Софиското Градско обвинителство побара одземање на имунитетот на лидерот на партијата ГЕРБ и поранешен премиер, Бојко Борисов, за да биде ставен од истрага во случајот за перење пари, познат во Бугарија како „Барселонагејт“, пренесува „Еурактив“.
Истрагата почна пред речиси три години додека Борисов сè уште беше премиер кога во анонимна група на „Фејсбук“ беше споделено видео за луксузен имот во богато предградие на Барселона, каде што поранешната бугарска манекенка Борислава Јовчева живееше со своето дете.
Анонимниот клип алудира дека детето е на Борисов, нешто што тој секогаш го негира. Случајот првин го истражуваше шпанското Обвинителство, кое откри индиректни траги на перење пари, но без директно поврзување со Борисов, а во 2021 година истрагата беше префрлена во Бугарија.
Бугарското Обвинителство почна да покажува активен интерес во истрагата „Барселонагејт“ пред само три недели откако партијата на Борисов објави дека ја поддржува долгоочекуваната судска реформа во земјата насочена кон намалување на овластувањата на бугарскиот јавен обвинител Иван Гешев.
Веднаш потоа Гешев се закани дека ќе го исчисти „политичкото ѓубре“.
Во вторникот, Градското обвинителство на Софија побара одземање на пратеничкиот имунитет на Борисов бидејќи постојат доволно докази за перење пари. Бугарските пратеници може сами да се откажат од имунитетот или тој да им биде одземен со гласање на парламентот.
„Бев без имунитет две години. Сега категорично нема доброволно да се откажам од имунитетот бидејќи треба да си слеп за да не видиш што се случува во моментот“, рече Борисов.
Според него, Обвинителството дејствувало во вторникот за да спречи избор на редовна влада со поддршка на неговата партија и коалицијата „Промената продолжува – Демократска Бугарија“ (ПП-ДБ), која ги поддржува судските реформи.
Тензиите околу Борисов и Обвинителството се случуваат во екот на преговорите за формирање, а редовна прозападна влада меѓу ГЕРБ и ПП-ДБ ќе стави крај на политичката криза во земјата, која трае две и пол години. Се очекува гласањето да биде кон средината на следната недела.
„Не се грижам за „Барселонагејт“. Воопшто. Не сум имал, немам и нема да имам имот во Шпанија! Што повеќе да одговорам?“, изјави Борисов.
Клучен сведок во случајот е поранешната манекенка и мис на Бугарија, Ивајла Бакалова, која е пријателка на Јовчева и живеела во куќата во Барселона. Таа тврди дека Борисов е татко на детето на Јовчева и дека знае доволно за „Барселонагејт“.
На крајот на минатата недела пратеничката група на ГЕРБ објави дека ќе ги бојкотира сите барања на Обвинителството за одземање на имунитетот на бугарските пратеници. Кандидатот за премиер Николај Денков повика Обвинителството да не се користи како политичка алатка.
„Обвинителството не треба да се користи како политички клуб. Мигот кога првите две политички сили ќе кажат дека се подготвени да владеат, ќе видите што ќе се случи“, рече Денков.
Пратениците од другите политички партии, популистичката Има таков народ и проруските БСП и Вазраждане повикаа да се укине имунитетот на Борисов за да може да биде под истрага за „Барселонагејт“.
„Ако тој тврди дека е невин, тоа треба да го докаже во транспарентен судски процес“, рече лидерката на БСП, Корнелија Нинова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Македонец меѓу загинатите во Бугарија кога автомобил управуван од 19-годишник се заби во ресторан

Деветнаесетгодишен возач со автомобилот се заби во ресторан во Разград, Бугарија, при што загинаа три лица, меѓу кои 58-годишник, државјанин на Македонија, соопшти бугарската полиција.
Несреќата се случила по полноќ на улицата Гранчарска во градот. Според првичните информации, младиот возач ја изгубил контролата врз автомобилот, што ја предизвикало тешката несреќа. Тестовите за алкохол и дрога на 19-годишниот возач биле негативни, јавуваат бугарските медиуми.
Починатите се лица на возраст од 62, 64 и 58 години, кои биле во објектот во моментот на несреќата.
Регион
Најголемиот концерт во хрватската историја: Томпсон – пејачот со усташка репутација продал 450.000 билети

Стотици илјади луѓе се собраа синоќа на Загребскиот хиподром за да присуствуваат на концертот на хрватскиот пејач Марко Перковиќ Томпсон, за кој организаторите тврдат дека е најголемиот концерт што некогаш се одржал со платени влезници во светот, објави Ројтерс за големиот концерт во Загреб.
АП пишува дека концертот на Марко Перковиќ Томпсон, десничарски пејач познат по својот пронацистички марионетски режим од Втората светска војна, собрал десетици илјади обожаватели во Загреб во саботата.
Полицијата наведе дека биле продадени повеќе од 450.000 билети, што е најголемиот концерт во хрватската историја. Поради концертот, центарот на Загреб беше затворен за сообраќај, а беа распоредени 6.523 полицајци.

Фото: ЕПА
Томпсон, познат по својот националистички имиџ, се качи на сцената со пораката дека „овој концерт покажува единство“ и го повика остатокот од Европа да „се врати на своите традиционални и христијански корени“, пишува АП.
Ројтерс потсетува дека Томпсон со години е цел на критики за користење симболи и реторика поврзани со усташкиот режим од Втората светска војна. Неговите концерти беа забранети во неколку европски земји, вклучувајќи ги Холандија, Швајцарија и Босна и Херцеговина.
Неговите настапи често флертуваат со иконографијата и идеологијата на НДХ, додека Перковиќ инсистира дека неговите песни изразуваат љубов кон Бога, семејството, луѓето и татковината.
Ројтерс наведува дека помеѓу 1941 и 1945 година, усташите систематски ги прогонувале и убивале Евреите, Србите и Ромите. Некои од неговите песни, истакнуваат агенциите, го вклучуваат усташкиот поздрав „За дом спремни“.
Иако неговиот имиџ е предмет на бројни контроверзии, Перковиќ сè уште ужива голема популарност во Хрватска, според АП, и често се појавува на политички митинзи и спортски настани. Тие додаваат дека организаторите на концертот забраниле какви било знаци што поттикнуваат омраза, но на некои снимки се гледаат фанови во центарот на Загреб како го изведуваат усташкиот поздрав пред почетокот на концертот.
АП известува дека посетителите дошле од цела Хрватска, многумина носејќи хрватски знамиња и црни маички со натпис „Томпсон“.
„Очекувам добра забава, многу луѓе и незаборавно искуство“, изјави Јосип Геленгер за Ројтерс пред концертот. Друг посетител од источна Хрватска, изјави за АП: „Томпсон е патриот. Тој не навредува никого, тој ги сака сите“.
Цитирајќи ја изјавата на Косор, АП исто така наведува дека поради концертот, Загреб бил делумно блокиран со денови, а сообраќајот бил прекинат во неколку делови од градот. Властите поставиле посебен контролен центар, теренска болница и распоредиле снајперисти, додека хеликоптерите летале над градот.
На социјалните мрежи, Марко Перковиќ ги повикал фановите со зборовите: „Се гледаме на Хиподром. Грижете се едни за други“, објави АП. Не секој го дели ентузијазмот за концертот. Поранешната премиерка Јадранка Косор го критикуваше вклучувањето на државата: „Државата и градот беа ставени во служба на еден човек“. Таа исто така напиша: „Ентузијазам и пеење песни од времето на криминалната држава може да се чуе во центарот на Загреб со денови“, објавува АП.
АП потсетува дека водачите на усташкиот режим сè уште се идеализирани меѓу дел од хрватската десница, и покрај злосторствата против Евреите, Србите, Ромите и антифашистите.
Регион
Зошто плажата Посиди важи за една од најопасните во Грција

Плажата Посиди се наоѓа на западниот брег на првиот прст на Халкидики – Касандра, отприлика на половина пат низ полуостровот. Се протега како ’рт што длабоко навлегува во морето и изгледа навистина магично на фотографии и снимки.
Но, зад таа убавина се крие и опасност. Посиди важи за една од најопасните плажи во Грција поради силните морски струи кои можат лесно да одвлечат пливачите, особено оние кои се неискусни или недоволно внимателни. Плажата е долга меѓу еден и два километри, и е дива – без кафулиња, лежалки и чадори, што ја прави уште поизолирана и потенцијално ризична.
Јавноста добро го памети трагичниот настан од пред три години, кога три млади момчиња од Македонија се капеа на оваа плажа и ги одвлекоа силните струи. Настанот се случил за време на забава на плажа, кога тројцата решиле да влезат во морето. Силниот ветер и морските струи ги повлекле. Едното момче било брзо пронајдено, второто – по дури 19 часа поминати во морето – било спасено благодарение на топка која ја носел ветрот, за која се држел сè до доаѓањето на спасувачите. Третото момче, за жал, никогаш не беше пронајдено, и покрај интензивната потрага.
Според грчкиот весник „Етнос“, освен Посиди, за особено опасни плажи во Грција важат и:
Лаларија (остров Скијатос),
Матала (остров Крит),
Нас (остров Икарија),
Хорефто (регион Пелион),
Платиа Амос (остров Кефалонија),
Калами (остров Китира).
На овие локации потребна е особена претпазливост, дури и кога морето изгледа мирно. Природата е убава, но мора да се почитува.