Грчките власти покренаа истрага против 6 полицајци и 27 други лица под сомнение за вмешаност во голема измама со лажни пасоши и лични карти, наменети за странски криминалци кои бегаат од законот.

Полициската служба за внатрешна контрола соопшти дека документите се огласени за неважечки – вкупно 31 пасош и 38 лични карти, издадени во периодот помеѓу 2016 и 2018 година.

Овие документи беа продавани на црниот пазар по индивидуални цени од 5.000 до 40.000 илјади евра.

Незаконски биле користени идентитети на Грци кои живеат во странство, а не го продолжиле важењето на личните документи во пропишаниот период.

Контролите на валидноста на пасошите се интензивираат во Грција во последните години, како резултат на зголемениот прилив на бегалци на кои не им е дозволено да одат во други земји на ЕУ, во согласност со ограничувањата што ги наметна Унијата во 2016 година.

Грција е сè уште најпопуларната дестинација за нелегален влез на бегалци кои се обидуваат да стигнат до ЕУ.

Во соопштението на полицијата не е наведено дали некој од 33-те осомничени лица е задржан во притвор.

Американските тајни служби иницираа голема кампања за дискредитација на политичките и јавните личности во земјите на Источна Европа што се залагаат за развој на добрососедските односи со Русија, а Бугарија е епицентар на шпионските скандали со цел неосновано да се протераат руски дипломати, соопшти руската Надворешно-разузнавачка служба, пренесува „Спутник“.

„Со таа цел се ангажираат агенти и невладини организации кои се финансирани од јавните институции во САД“, се вели во соопштението на оваа служба.

„Последната таква акција е почната преку медиумите и политичарите блиски до ЦИА заедно со бугарските тајни служби кога беа разгласени невистини дека главна тема на разговорите од 10 февруари меѓу директорот на руската Надворешно-разузнавачка служба, Сергеј Наришкин, и шеикот Мухамед бен Рашид ал-Мактум била судбината на бугарскиот бизнисмен Васил Божков. Тој човек наводно бил приведен во ОАЕ по барање на Бугарија под обвинение за финансиски криминал“, се вели во документот.

Според наводите на руската Надворешно-разузнавачка служба, во овие активности против Русија особено се истакнува бугарскиот вицепремиер Валериј Симеонов.

„Врз основа на резултатите од нашата истрага утврдивме дека иницијален извор на овие сензационални податоци е претставник на бугарската тајна служба во една од земјите од регионот кого го контролират и охрабруваат Американците, кои го насочуваат да работи против руските интереси“, велат од руската служба.

Според нив, лажирањето на информациите има цел да ги комплицира меѓународните односе на ОАЕ и Русија.

Децата на инвеститорите во иднина ќе може да стекнат црногорско државјанство и пред да станат полнолетни, одлучи црногорската влада, пренесува „Побједа“.

Владата вчера ја изменила одлуката за критериумите, начинот и постапката за избор на лице што може да стекне црногорско државјанство заради реализација на посебната програма за вложување од особено значење за стопанскиот и економскиот интерес на Црна Гора.

Во изменетата одлука се наведува дека оваа програма за економско државјанство, како што скратено го нарекуваат, ја спроведува Агенцијата за инвестиции на Црна Гора.

Претходната одлука предвидуваше малолетните членови на семејствата апликанти да можат да стекнат државјанство по полнолетството.