Регион
Во Србија не знаеме што јадеме, реагираат од Организацијата на потрошувачите и контрола на храната
Претседателот на Националната организација на потрошувачи на Србија, Горан Паповиќ изјави дека надлежните институции не се сериозно ангажирани за контрола на безбедноста на храната, а Советот за безбедност на храна не заседава веќе пет години.
По повод враќањето на втората пратка овошје за 15 дена од Хрватска поради употребата на забранетиот пестицид хлорпирифос, тој рече дека во Србија воопшто нема контрола на употребата на заштитни средства.
„Кај нас речиси и да нема контрола на употребата на пестициди, фунгициди, инсектициди и периоди на одвикнување. Националната организација на потрошувачи на Србија речиси десет години бара да се обезбедат средства за да може да испрати примероци на анализа во независна лабораторија, но тие не се доделени“, вели Паповиќ за Бета.
Тој додава дека Советот за безбедност на храна, при Министерството за земјоделство, кој треба да се занимава со проценка на ризик од областа на безбедноста на храната, формиран во мај 2017 година, не заседавал пет години.
Паповиќ рече дека Советот дава одобрение кога треба да се пушти во промет нов производ врз основа на составот наведен од производителот, а прашање е, како што рече, дали тој, како таков ќе се појави на пазарот.
Тој рече дека потрошувачите никогаш не дознале кога инспекцијата повлекла стока од пазарот поради неисправност, кој е нејзиниот производител, а така било и во случајот со праските што биле вратени од Хрватска.
Паповиќ рече дека не само производителите, туку и трговците се одговорни за безбедноста на храната. „Земјоделските аптеки кои продаваат заштитни производи се намножија и станаа побогати бидејќи имаат се, вклучително и производи за забрзано зреење на овошјето“, рече Паповиќ.
„Не ни е гајле што правеле во Индонезија, треба да знаеме кој го прекршил законот овде и зошто е казнет со 0,02 отсто од прометот кога законот дозволува казната да биде десет отсто“, рече Паповиќ.
Тој истакна дека во Србија „заштитата на потрошувачите е лоша и дека граѓаните не знаат што јадат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Фон дер Лајен: Србија е еден од најнапредните кандидати за членство во ЕУ
Србија е една од најнапредните земји во процесот на пристапување во Европската унија и на неа е да избере брзина на пристапување, изјави претседателката на Европската комисија Урсула фон дер Лајен по состанокот со српскиот претседател Александар Вучиќ во Белград.
Фон дер Лајен рече дека партнерството меѓу Србија и Европската унија станува се посилно, а ЕУ е првиот трговски партнер и инвеститор на Србија.
Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорот меѓу Вучиќ и Фон дер Лајен.
„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.
Регион
Земјотрес со јачина од четири степени ја погоди Албанија
Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).
Земјотресот се случил на длабочина од пет километри, додава EMSC.
Епицентарот на земјотресот е регистриран на 11 километри источно од градот Фјер, каде живеат околу 60.000 луѓе.
Регион
Вучиќ со Фон дер Лајен: Сѐ додека јас сум претседател, Србија ќе остане на европскиот пат
Претседателот на Србија, Александар Вучиќ, денеска изјави дека сѐ додека тој е претседател на државата, Србија нема да ги промени своите главни надворешнополитички цели, а тоа се европскиот пат и определбата за членство во ЕУ.
На заедничката прес-конференција со претседателката на Европската комисија, Урсула фон дер Лајен, која е во дводневна посета на Србија, Вучиќ рече дека европскиот пат е од клучно значење за напредокот на земјата, дека Србија посветено работи на тој пат и се надева на резултати.
Тој истакна дека имал многу долг, крајно отворен и искрен разговор со Фон дер Лајен и дека има работи за кои Европската Унија ја критикува Србија, но дека претседателот на ЕК секогаш бил подготвен да ја сослуша нивната страна.
Како што рече, разговарале за определбите на Србија.
„Јас ѝ го кажав истото тоа што ви го кажав вчера. Колку и да размислуваат поинаку некои луѓе, јас сум претседател на Републиката со највисок легитимитет во државата, избран директно од граѓаните двапати по ред во првиот изборен круг, што никогаш не се случило во нашата историја, а додека јас сум претседател, нема промена на главните цели на нашата надворешна и внатрешна политика. Тоа значи дека нашиот европски пат е и наше застапување за европска Србија и е од клучно значење за нашиот напредок, дека Србија ќе се посвети на работа на тој пат и дека се надеваме на резултати“, изјави Вучиќ.
Тој ѝ честита на Урсула фон дер Лајен за нејзиниот реизбор на функцијата претседател на Европската комисија и ѝ се заблагодари за поддршката што ѝ ја дала на Србија во претходниот мандат и додаде дека се надева оти тоа ќе продолжи да го прави и во овој мандат, пренесува „Танјуг“.
„Има една работа што луѓето во Србија многу ја почитуваат. Кога ни доаѓаат гости, речиси сите доаѓаат во Белград кога се во прашање високи делегации, официјални посети во нашата земја и двапати отидовме далеку од Белград, далеку од урбаните средини, а тоа е нешто што нашите граѓани, нашиот народ, исклучително го почитуваат и ценат, ви благодариме за поддршката и помошта што ни ја дадовте во претходниот период“, рече Вучиќ.