Грчките власти соопштија дека нема да можат да ги укинат ограничувачките мерки во пошироката област на Атина од 1 март, како што првично беше планирано, поради зголемување на бројот на новозаразени со коронавирусот, изјави денеска премиерот.

Воведени се строги антиепидемиски мерки во поширокото подрачје на Атина, каде што живее половина од населението во Грција, и тие треба да траат до 28 февруари, пренесува „Ројтерс“.

Властите соопштија дека 22 пациенти починале од Ковид-19 во изминатите 24 часа, а заразата со коронавирус била потврдена кај 2.147 лица, од кои околу половина живееле во пошироката област на Атина.

Земјотрес со јачина од 4,1 степен според Рихтеровата скала ја погоди централна Хрватска.

Потресот се случил во 10:58 часот.

Сеизмолошката служба на Република Хрватска извести за прилично силен земјотрес со епицентар недалеку од Петриња.

„Станува збор за серија последователни земјотреси, кои малку се намалија, но сè уште траат“, објасни за „Медија сервис“ сеизмологот Томислав Кук.

Во Хрватска се регистрирани речиси двојно повеќе новозаразени со коронавирус во споредба со претходниот ден.

Директорот на Хрватскиот институт за јавно здравје, Крунослав Чапак, вели дека во првите три дена од оваа недела, бројот на новозаболени лица се зголемил за 30 проценти во споредба со првите три дена од претходната недела.

Според податоците на Националниот штаб за цивилна заштита во Хрватска, во последните 24 часа биле евидентирани 688 новозаразени лица, бројот на активни случаи е 2.679, додека 15 пациенти починале.

Чапак на прес-конференција рече дека Хрватска сепак е подобра од Финска и Данска според инциденцијата, додека Чешка е најлоша од сите земји на ЕУ.

Во однос на смртноста, Хрватска е сè уште на 19. место меѓу земјите на ЕУ, рече Чапак.

Според него, пријавени се скоро 1.000 сомнителни несакани ефекти од почетокот на вакцинацијата и додаде дека студиите покажуваат дека ефективноста на вакцините е доста висока по првата доза.

„Затоа, ќе препорачаме по вакцинирање со ‘Астразенека’, втората доза да се дава по 12 недели, со ‘Фајзер’ по 42 дена или шест недели“, рече Чапак.