Трет ден по ред повеќе од дваесет луѓе починаа како резултат на инфекција со коронавирус во Романија.

Денеска се регистрирани 23 смртни случаи од изминатото деноноќие, со што Романија е на второто место во Европа по бројот на жртви во изминатите 24 часа, зад Русија, која денес забележа 168 починати.

Во Романија, досега вкупно 1.713 луѓе починале од коронавирус.

Регистрирани се 416 новозаразени лица, со што вкупниот број на заболени порасна на 28.582.

Црногорскиот институтот за јавно здравје потврди 57 нови случаи на инфекција со коронавирус, што е најголемиот дневен број од почетокот на вториот бран на епидемијата, на 14 јуни.

Во последните три недели во земјата се заразиле 396 лица, од кои четворица починале, а двајца се во состојба опасна по живот, објави Клиничкиот центар во Подгорица.

Во првиот бран, кој траеше од средината на март до почетокот на мај, имало 324 заразени.

Црна Гора беше прва земја во Европа која се прогласи за дестинација без корона, но по 42 дена без нови случаи, вирусот го донесоа граѓани кои по престојот во Србија се вратиле во земјата преку Босна и Херцеговина.

Тие избегнале карантин така што кај граничната полиција не пријавиле дека престојувале во Белград, на фудбалскиот натпревар меѓу Партизан и Црвена Ѕвезда.

На 1 јуни, црногорската владата ги отвори границите кон сите држави кои имаа број на активни случаи помал од 25 на 100.000 жители, но на оваа листа не беше соседната Србија.

Дури 289 нови случаи на инфекција со коронавирус во Босна и Херцеговина беа потврдени во саботата од страна на јавните здравствени институции на Федерацијата БиХ и Република Српска.

Како што пренесуваат регионалните медиуми, ова е најголем број на новозаразени во еден ден откако инфекцијата со коронавирус се прошири во БиХ во март годинава.

Во Федерацијата БиХ биле потврдени 186 нови случаи на инфекција по спроведени 1.288 тестирања, а во Република Српска каде биле направени 543 тестови, 103 биле позитивни на коронавирус.

Рекордни 99 нови случаи на инфекција се регистрирани во Сараево за само 24 часа.

Тоа е најголемиот број на новозаразени потврдени за еден ден во главниот град на БиХ од прогласувањето на епидемијата.

Во специјалното одделение на Клиничкиот центар во Сараево, сега се хоспитализирани 32 пациенти со Ковид-19, од кои еден е на респиратор.