Вучиќ: Ја водам Србија, сè уште нема да воведуваме санкции кон Русија

Српскиот претседател Александар Вучиќ изјави во Њујорк дека Србија сè уште не планира да воведе санкции кон Русија, иако западните лидери се уште инсистираат на тоа.

Вучиќ им рече на новинарите во Њујорк, каде што ја претставува Србија на Генералното собрание на ОН, дека очекува средба на која високиот претставник на ЕУ за надворешни работи и безбедност Жосеп Борел и други претставници на ЕУ „ќе му одржат говори за потребата Србија да им се придружи на земјите кои воведоа санкции кон Руската Федерација“, пишува Кликс.

„Ќе ги слушам и ќе повторам дека ја водам Србија и дека како нејзин претседател се уште не се согласувам со тоа. Кога ќе разберам дека повеќе не можеме да го правиме тоа, тогаш нема да водиме таква политика. Но, ние водевме таква политика за година и седум месеци, што е чесно и одговорно затоа што знаеме како поминавме со санкциите. Па зошто да учествуваме во овие работи?“ изјави претседателот на Србија за новинарите.

Вучиќ, зборувајќи за досегашниот напредок на Генералното собрание на ОН, рече дека е интересно што по говорот, бразилскиот претседател Лула да Силва доби повеќе аплаузи од американскиот претседател Џо Бајден.

„Ова до сега не се случи. Ова не го велам затоа што некому му значи нешто посебно, освен што може да забележиме мала промена на расположението меѓу африканските и азиските земји, на кои не им се посветува доволно внимание“, рече српскиот претседател, пишува Кликс.