Регион
Грушко: Состојбата на Балканот ескалира поради политиката на Америка, НАТО и ЕУ

Заменик-министерот за надворешни работи на Русија, Александар Грушко, денеска изјави дека ситуацијата на Балканскиот Полуостров станува сè посериозна поради политиката на Соединетите Американски Држави, НАТО и Европската Унија.
Во интервју за ТВ-каналот „Русија 24“, Грушко изјави дека западните земји вршат постојан притисок врз Србија за да ја истиснат од сегашната позиција,користејќи ги сите расположливи средства, вклучително и поткопување на внатрешната стабилност. „Ситуацијата на Балканот се влошува и станува сè поакутна како резултат на намерната политика на земјите од НАТО, Европската Унија и САД.
„Овие земји вршат притисок врз Србија да ја признае независноста на Косово и да се приклучи кон антируските санкции“, рече Грушко, пренесе „РИА новости“. Тој укажа и на обидите на Западот да ја дестабилизира ситуацијата на Косово наведувајќи дека тамошното раководство се чувствува неказнето со поддршката на Западот.
Грушко посочи дека истиот притисок се врши и врз Босна и Херцеговина, каде, како што рече, има „нескриен притисок врз Република Српска и обиди да им се одземат правата на српскиот народ“.
„Таквата политика го покажува лицемерното однесување на Западот, кој иако постојано тврди дека ја почитува слободата на избор, во реалноста не дозволува независните земји сами да носат одлуки“, заклучува Грушко.
Кога станува збор за членството на Украина во НАТО, Грушко рече дека Русија ќе побара цврсти гаранции, кои го исклучуваат пристапот на Украина во НАТО бидејќи таквиот потег ќе го оневозможи постигнувањето мир. „Пристапувањето на Украина во НАТО е еден од клучните елементи на можните договори за решавање на конфликтите во Украина.
Ќе бараме правни гаранции, кои би го исклучиле членството на Украина во НАТО во која било форма и ќе инсистираме тоа да стане официјална политика на алијансата“, рече Грушко, а пренесе „Тасс“.
Тој нагласи дека приклучувањето на Украина во НАТО ќе ја исклучи можноста за постигнување мир во Украина и ќе создаде пречки за формирање стабилен безбедносен систем во регионот. Грушко додаде дека, според неговите информации, „ист став имаат голем број земји од НАТО“.
Коментирајќи ја изјавата на словачкиот премиер Роберт Фицо, кој посочи дека мировните преговори за Украина треба да се засноваат на одложување на приемот во НАТО, Грушко рече дека Фицо е сосема во право.
Тој укажа и на катастрофалната одлука од самитот на НАТО во Букурешт во 2008 година кога алијансата им вети на Украина и Грузија дека ќе станат членки на НАТО.
Грушко посочи дека присуството на таа формулација во документите на НАТО е неприфатливо бидејќи создава неизвесност во процесот на решавање на конфликтот во Украина, пренесува „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Познат идентитетот на убиените во БиХ: полицијата насилно влегла во станот каде што ги пронашла телата на мајката и детето

Маж во текот на ноќта ги убил сопругата и 13-годишниот син во Калесија, Босна и Херцеговина, а полицијата трага по него, потврди за Кликс.ба Адмир Арнаутовиќ, портпарол на кантоналното обвинителство во Тузла.
„Кликс“ објави дека убиената е Инела Селимовиќ, која на последните локални избори беше кандидат на партијата Народ и правда (НиП) за Советот на општина Калесија.
„Кликс“ исто така пишува дека осомничен за двојното убиство е Емир Селимовиќ.
Додаваат дека мажот работи како доставувач во супермаркетот во зградата во која живеело семејството.
Не е познато дали е вооружен.
Според неофицијални информации, се сомнева дека Селимовиќ ги убил сопругата и детето со задушување.
„Синоќа, полициски службеници од Управата на полицијата на кантонот Тузла, ПС Калесија, по пријава и одобрение од кантоналниот обвинител и судијата на Општинскиот суд, насилно влегле во стан во Калесија, каде пронашле безживотни тела на жена и дете“, изјави Аднана Спречиќ, портпаролка на полицијата во кантонот Тузла.
Регион
Маж во Босна и Херцеговина ги убил сопругата и 13-годишниот син: во бегство е

Маж во текот на ноќта ги убил сопругата и 13-годишниот син во Калесија, Босна и Херцеговина, а полицијата трага по него, потврди за Кликс.ба Адмир Арнаутовиќ, портпарол на кантоналното обвинителство во Тузла.
Безживотните тела се пронајдени во станбено-деловен објект, а како што неофицијално дознава порталот, мажот и жртвата формално се разведени, но живееле заедно.
„Повеќе детали ќе се знаат подоцна“, изјави Арнаутовиќ.
Регион
Црногорците ги бојкотираа продавниците, го намалија нивниот промет за 30 отсто

Поради бојкотот на продавниците во саботата на 8 февруари, петте најголеми трговски синџири во Црна Гора забележаа пад на прометот од 30,23 отсто во однос на 1 февруари, покажуваат податоците на Даночната управа, јавува Анадолија.
Како што јави црногорската агенција МИНА, продавниците на 8 февруари оствариле промет од 2,96 милиони евра, додека на 1 февруари, кога немало бојкот, прометот изнесувал 4,24 милиони евра.
Податоците на Даночната управа покажуваат дека прометот најмногу паднал во централниот регион на земјата и тоа за 35,86 отсто.
Во северниот регион е забележан пад на прометот за 30,62 отсто, додека во јужниот регион има 21,5 отсто помалку пари во касите на супермаркетите.
За 18,15 отсто помал е бројот на издадени фактури.