Регион
Деветгодишно момче во Хрватска нарачало сок од јаболко во ресторан и завршило во болница во тешка состојба

Деветгодишно момче од Крапина во Хрватска завршило во болница во Детската болница во Загреб откога седнало со својот татко во ресторан и испило сок од јаболко. Полицијата и Обвинителството истражуваат индиции дека во шишето со сок имало опасна течност.
Сè се случило кога, според мајката на момчето, сопругот и синот отишле на технички преглед на автомобилот. Додека чекале, седнале во ресторан до станицата да се напијат нешто.
„Синот нарачал сок од јаболко. Оној во стаклено шише. Келнерката го донела од фрижидерот, мажот го видел, го отворил, го донел на масата, детето го испило и по првата голтка, почнало да вика кисело, кисело. Мојот сопруг веднаш го пробал сокот и добил реакција“, вели мајката на момчето, пренесува „Данас.хр“.
„Првин мислевме дека сокот е расипан“.
Момчето еден и пол ден се жалело на болки во стомакот, а потоа добило треска. Го однеле во болница, каде што ги дочекал нов шок – констатирано е дека момчето испило опасна течност.
„Дете со дијагноза ерозивен гастритис по неколку дена е отпуштено на домашна нега со обврска за следење за да се избегнат доцните последици од оваа состојба“, изјави Горан Роиќ од Детската болница.
Адвокатот на семејството, Јована Пухало, смета дека тоа никој не го направил намерно, но доколку се потврди дека го направил, тоа е кривично дело од небрежност.
„Во шише со сок му послужија средство за одмастување – алкохол со pH 13 поради што претрпе оштетување на слузницата, хранопроводникот и на усната шуплина. Се надеваме дека надлежните органи за овој случај, полициската станица во Крапина и надлежното Државно обвинителство, во најкраток можен рок ќе ги преземат сите потребни дејства за да се утврди одговорност“, вели адвокатот.
Од крапинско-загорската полиција потврдија дека спроведуваат истрага, а од дотичниот ресторан испратија само кусо соопштение дека не сакаат да ја коментираат истрагата.
При увидот, како што пишуваат хрватските медиуми, биле одземени сите мостри од сок од ресторанот и не било констатирано ништо непристојно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора планира да произведува дронови; САД: Покажуваат дека се сериозни

Црна Гора планира да започне со производство на беспилотни летала во соработка со американска компанија, а првата серија ќе биде донирана на Украина, објавија денес црногорските медиуми, повикувајќи се на „писмо за намери“ усвоено од владата во Подгорица кон крајот на мај.
Во тој документ, како што објави Радио Слободна Европа, црногорската влада наведува дека оваа иницијатива ќе ги подобри капацитетите на војската во однос на НАТО, ќе ги поддржи одбранбените потреби на Украина, како и позицијата на Црна Гора како сигурен снабдувач на најсовремена одбранбена опрема на глобалниот пазар.
Се нагласува дека договорот вреден 15 милиони долари ќе биде поддржан и од американската администрација предводена од претседателот Доналд Трамп. Писмото за намери усвоено од црногорската влада на 29 мај наскоро ќе го потпишат црногорскиот министер за економски развој Ник Ѓељошај и Роберт Џ. Донахју, директор на компанијата „Бај Лајт Профессионал ИТ Сервисиз ДОО“. Тоа ќе биде претходница на договорот што треба да се потпише во септември.
Договорот предвидува користење на компании од Црна Гора и регионот за тестирање на воздушни и подводни технологии на беспилотни системи. Исто така, се наведува дека владата на Црна Гора се согласува да ја донира првата серија беспилотни системи од рано производство и сродна одбранбена опрема на Украина.
Амбасадата на САД објави дека договорот, доколку биде одобрен, ќе промовира заедничка безбедност, стабилност и напредок и дека владата на САД ги охрабрува сите земји-партнери да инвестираат и да соработуваат со американските компании.
„Инвестирањето во одбранбени капацитети, како што се американските беспилотни воздушни системи, ја покажува сериозноста на Црна Гора во исполнувањето на своите обврски кон Алијансата во време кога бараме од Европа да преземе поголем товар за нејзината безбедност“, порачаа тие.
Регион
Европската комисија не се откажува од рудникот за литиум во Србија, тој се појави на новата листа

Европската комисија денес објави список од 13 стратешки проекти во областа на критичните суровини во трети земји, вклучувајќи го и проектот Јадар во западна Србија, кој предизвика силни протести и спротивставување во таа земја.
Списокот на стратешки проекти во областа на критичните суровини во трети земји вклучува проекти во Канада, Гренланд, Казахстан, Норвешка, Србија, Украина, Замбија, Нова Каледонија, Мадагаскар, Малави, Јужна Африка и Обединетото Кралство.
Според проценката на Комисијата, избраните проекти, од кои повеќето се однесуваат на суровини неопходни за производство на електрични возила и батерии, како што се литиум, никел, кобалт, манган и графит, бараат вкупно 5,5 милијарди евра капитални инвестиции за да започнат со работа.
На листата е вклучен и проектот Јадар во долината на реката Јадар во западна Србија, кој предизвика широко распространето негодување и отпор поради страв од загрозување на здравјето на луѓето и животната средина.
На почетокот на 2022 година, српската влада го поништи усвоениот просторен план за рудникот во долината на реката Јадар и го запре проектот. Сепак, во јули минатата година, повторно донесе одлука со која му дозволи на британско-австралискиот рударски гигант „Рио Тинто“ да го рестартира својот проект за рударство на литиум.
Избраните стратешки проекти ќе добијат поддршка од Комисијата, земјите-членки и финансиските институции во форма на полесен пристап до финансирање. Комисијата, исто така, ќе ја зајакне соработката со трети земји за да се обезбеди развој на овие проекти, особено преку стратешки партнерства што веќе се воспоставени со некои од земјите.
Регион
Бугарија од 1 јануари 2026 година го воведува еврото

Бугарија ги исполни сите критериуми и е подготвена да ја усвои единствената европска валута од 1 јануари 2026 година. Ова е јасно од извештајот за конвергенција на Европската комисија (ЕК), објави БГНЕС.
Министрите за финансии на Еврогрупата ќе го разгледаат извештајот на ЕК и оној на ЕЦБ на состанокот на 19-20 јуни во Луксембург. На самитот на ЕУ, кој ќе се одржи на 26-27 јуни, тие ќе бидат разгледани и од лидерите на Унијата.
На 30 јуни, Европската комисија ќе го даде предлогот за фиксирање на девизниот курс, и не се очекува тој да биде различен од сегашниот девизен курс утврден од валутниот одбор.
Конечната одлука за пристапувањето треба да дојде на 8 јули, кога земјите од Еврогрупата ќе ги усвојат законските одлуки за усвојување на еврото во Бугарија.
Со ова, Бугарија ќе биде 100% полноправна членка на Европската Унија, откако на почетокот на оваа година се приклучи и на копнениот Шенген, објави БГНЕС.
Бугарија е членка на ЕУ од 1 јануари 2007 година.