Регион
Ердоган: Турција ќе обезбеди безбедност надвор од нејзините јужни граници од 2025 година

Турција ќе обезбеди безбедност надвор од нејзините јужни граници и ќе ги елиминира терористичките закани кои доаѓаат од тие региони почнувајќи од 2025 година, изјави денеска претседателот на земјата, Реџеп Таип Ердоган.
„Почнувајќи од 2025 година, ќе обезбедиме безбедност надвор од нашите јужни граници, особено во однос на прашањето за тероризмот и ќе ги елиминираме заканите кои доаѓаат од тие региони“, рече тој на конгресот на неговата владејачка Партија на правдата и развојот (АК Партија) во провинција Баликесир.
Говорејќи за падот на поранешниот сириски претседател Башар ал-Асад, Ердоган рече дека Турција „ги поддржа братските врски“, им помагаше на оние на кои им е потребна и уште еднаш излезе победник, јавува агенцијата „Анадолија“.
„Тестот на хуманоста го положивме со високи оценки“, заклучи Ердоган.
Од падот на режимот на Асад, Турција изврши неколку напади врз курдските милитанти во Сирија, вклучително и членовите на Народните одбранбени единици (ЈПГ), кои ги смета за продолжување на Курдистанската работничка партија (ПКК).
ПКК, која Турција, Европската унија и САД ја прогласија за терористичка организација, започна вооружен бунт против турската држава во 1984 година, а во тој конфликт досега се убиени 40.000 луѓе.
Анкара неодамна инсистираше на тоа дека ЈПГ мора да се распушти, тврдејќи дека нема место за групата во иднината на Сирија.
Анкара рутински извршува прекугранични воздушни напади и воени операции насочени кон ПКК, а операциите што ги спроведува денес се дел од тековните судири меѓу фракциите поддржани од Турција во Сирија и ЈПГ, според Ројтерс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Меџити со честитка: Косово наше, ти ја честитам од срце оваа значајна годишнина

Вицепремиерот Изет Меџити, упати честитка по повод 17 Февруари, Денот на независноста на Косово, изразувајќи длабока почит кон истрајноста и жртвата на косовскиот народ во нивната борба за слобода и сувереност.
„Косово наше, ти ја честитам од срце оваа значајна годишнина! Во овој историски ден за Косово, се сеќаваме на жртвите, отпорот и гордоста на народот кој никогаш не застана на својот пат кон слободата и независноста. Среќен нека ни биде овој голем ден за нашиот народ, со љубов и почит кон нашите браќа и сестри каде и да се!“ – истакна Меџити во својата порака.
Тој додаде дека Косово претставува симбол на непокорноста и стремежот кон достоинствена иднина, додека посака единство и напредок за сите Албанци во регионот.
Регион
Лавров до Западот: Престанете да се мешате во внатрешните работи на Србија

Рускиот министер за надворешни работи Сергеј Лавров изјави денеска дека Русија го осудува мешањето на други, пред се западни земји во внатрешните политички процеси на Србија.
На прес-конференцијата по средбата со шефот на српската дипломатија Марко Ѓуриќ и Москва, Лавров истакна дека српското раководство и претседателот Александар Вучиќ имаат поддршка од Русија во нивните напори да спречат дестабилизација на ситуацијата во земјата.
Тој, исто така, рече дека инсистира да се запре со ваквите практики.
„Претседателот Вучиќ презентираше конкретни факти за грубото мешање на странски држави во внатрешно-политичките процеси во Србија. Ја осудуваме оваа практика и инсистираме принципот на немешање во внатрешните работи цврсто да се почитува од сите, а пред сè од нашите западни колеги кои долго време ги градат своите активности користејќи ги таканаречените невладини фондови, на сметка на американските нарачки, па се до државните наредби, со цел да се добие поголемо влијание во нивна корист, игнорирајќи ги фундаменталните интереси на луѓето од тие земји“, рече Лавров.
Тој додаде дека е задоволен од разговорот со министерот Ѓуриќ.
Регион
Србија: Подготвени сме да бидеме домаќини на преговорите за Украина

Српскиот министер за надворешни работи Марко Ѓуриќ денеска во Москва изјави дека Србија сака да придонесе за решавање на конфликтот во Украина и е подготвена да биде домаќин на преговорите, пренесува „Анадолија“.
„Кога станува збор за нашата желба да придонесеме за решавање на актуелната ситуација во Украина, Србија е земја со релативно скромни геополитички капацитети ако го гледаме бројот на жители, но имаме голема желба да придонесеме за решавање на овој проблем, секогаш сме подготвени да бидеме домаќини на секаков вид формални или неформални разговори“, рече Ѓуриќ.
Инаку, Ѓуриќ зборуваше на заедничка прес-конференција по средбата со рускиот министер за надворешни работи Сергеј Лавров.
Новинарите се интересираа дали Ѓуриќ разговарал со Лавров за можноста Белград да биде вклучен во разговорите за прекин на непријателствата во Украина, бидејќи Србија е една од ретките земји што во моментов има добри односи со Вашингтон, Москва и Киев.