По 11-дневна блокада, денес во Словенија се олеснуваат епидемиолошките мерки, а се укинува и шестмесечниот полициски час и се отвораат училиштата.

Часовите ќе започнат повторно во основните училишта, додека во средните училишта ќе се воведе алтернативен модел според кој групите средношколци кои доаѓаат на училиште ќе се менуваат еднаш неделно со оние што слушале часови дома.

Факултетите и средните училишта, сепак, ќе имаат нешто построг режим на настава со помали групи до 10 студенти односно ученици.

Повторно ќе бидат отворени продавниците и културните институции, а ќе биде укината и забраната за спортски активности со најмногу 10 лица.

Баровите и рестораните ќе можат да доставуваат храна и пијалоци.

Носењето заштитни маски во затворен простор останува задолжително, но носењето маски на отворено е укинато, мерка што беше многу непопуларна во Словенија за време на полицискиот час.

Српската министерка за трговија, туризам и телекомуникации Татјана Матиќ изјави за телевизијата К1 дека граѓаните на Србија ќе можат да патуваат во Грција под одредени услови од 14 мај, преку Северна Македонија.

Таа рече дека кон средината на овој месец ќе може да се влезе во Грција преку Бугарија, со, како што вели, потврда за вакцинација или негативен тест.

„Работиме на тоа оние кои ќе патуваат на море да можат да се пријават за вакцинација преку туристичките агенции“, рече Тајтана Матиќ, додавајќи дека се чини оти српските граѓани ќе можат да патуваат и во Хрватска и Турција.

Претходно, министрите за туризам на Србија и Грција, Татјана Матиќ и Харис Теохарис, се согласија дека српските граѓани годинава ќе можат да го поминат летниот одмор во Грција, потврдувајќи дека биле вакцинирани со каква било вакцина или со негативен ПЦР или брз тест. Границите за српските туристи најверојатно ќе бидат отворени веќе во средината на април, иако сезоната официјално започнува на 14 мај.

Како што претходно беше прецизирано, граѓаните кои се вакцинирани и кои се упатуваат кон Грција ќе бидат насочени кон зелената лента на границата, што би го намалило метежот.

Имињата на сите 240 пратеници во 45-от Парламент на Бугарија се веќе јасни, како и распределбата на местата. Ова го објави Централната изборна комисија на последната прес-конференција по изборите.

Коалицијата ГЕРБ-СДС има 75 места, „Има таков народ“ со 51 и БСП со 43 пратеници, ДПС со 30, „Демократска Бугарија“ со 27 и „Стани! Излези!“ со 14.

Досега 14 кандидати се откажаа од мандатот во бугарскиот Парламент, меѓу кои и премиерот и лидер на ГЕРБ, Бојко Борисов.

Централната изборна комисија соопшти ќе го анализира изборниот процес, по што ќе достави извештај до Националното собрание со предлози за измени во изборното законодавство. Се очекува, бугарскиот претседател, Румен Радев, да ја свика конститутивната седница во текот на следната недела.