Заврши седницата на кризниот штаб во Србија на која беше анализирана моменталната епидемиолошка состојба. Одлучено е да има затворање од сабота во 12 часот, пренесуваат српските медиуми.

„В сабота сè ќе работи до 12 часот, а до понеделник, до 6 часот наутро, ќе работат само продавниците за храна, лекови и горива“, рече членот на кризниот штаб, Предраг Кон, и додаде дека средните училишта од понеделник ќе бидат префрлени на часови преку интернет.

Тој исто така објасни дека се разгледува можноста и за часови преку интернет за децата од основно училиште, но дека предлогот не е прифатен.

Според него, театрите ќе можат да работат, закажани спортски настани може да се одржат, но без публика.

Како што наведува, в понеделник, сè ќе работи како и пред мерките донесени на денешната седница.

На прашањето дали следните два дена ќе имаат ефект, Кон вели – „Мислам, но нема да биде доволно“.

Тој додаде дека „единственото на што се потпираме е имунизацијата“ и нагласи дека имунитетот од вакцината е поголем од оној после болеста.

Кризниот штаб повторно ќе се состане во вторник, рече Кон, додаде дека не сака да зборува за тоа што било зад вратите на состанокот.

„Сосема е сигурно дека имало размена и на енергични мислења. Резултатот е дека го имаме она што го пренесувам сега. Вторник е продолжение. Долгото затворање е тешка опција за Србија. Исто така е невозможно да не се реагира кога има зголемена активност на вирусот “, додава тој.

Вонредна состојба е прогласена во три грчки региони, во централниот дел на Грција пренесуваат, грчките медиуми.

Регионите на Тирнавос, Потамија и Фаркадона, поради неодамнешните земјотреси, се под вонредната состојба која, според тамошните агенции, ќе биде во сила шест месеци од денот на настанувањето на земјотресот, односно до 3 септември.

Вонредната состојба е воведена по наредба на заменик-министерот за цивилна заштита и управување со кризи Никос Хардалиас.

Грчките весници пренесуваат дека вонредната состојба ќе им овозможи на жителите и општинските власти да имаат право на човечка помош и финансирање за реконструкција на штета на стотици домови и компании, како и делови од мрежата за патишта и водоснабдување.

Пред два дена централниот дел на Грција беше погоден од два силни земјотреси со јачина од 6,3 и 5,9 степени.

Паника во Хрватска откако средно училиште било евакуирано поради дојава за бомба, јавуваат хрватските медиуми.

Според нив, младо момче околу 12 часот влегло во средното стручно училиште „Сисак“ со закана за поставена бомба.

Според непотврдени информации на хрватските медиуми, станува збор за помлад човек, син на воен ветеран кој го барал жупанот Иво Шиниќ.

Училиштето било евакуирано, а младиот човек кој се заканувал се забарикадирал во него. По драмата што  траела околу еден час, младото момче и се предало на полицијата.

По заканата, полицијата го опколила училиштето, а на лице место излегол министерот за одбрана, Томо Медвед.

На местото на настанот бил испратен и преговарач од антитерористички оддел .

Директорот на стручното училиште во Сисак, Ивица Белоглавец, за локалните медиуми изјави дека поради новонастанатата ситуација нема да има смена на пладне.

Хрватските медиуми потсетуваат дека слична драма се одвиваше и во Загреб, каде што една жена се закануваше со бомби во зградата во која живее поранешната хрватска претседателка Колинда Грабар-Китаровиќ.