Регион
Над 20 повредени и четворица исчезнати во експлозијата во словенечката фабрика

Четири лица се водат како исчезнати во силната експлозија што се случи утринава во словенечкиот град Кочевје. Во инцидентот повредени се најмалку 20 лица, од кои двајца потешко.
Според Дирекцијата за цивилна заштита и помош при катастрофи, две повредени лица добиле тешки изгореници и со хеликоптер се пренесени во Клиничкиот центар во Љубљана.
Од Здравствениот дом во Кочевје соопштиле дека четири лица се водат како исчезнати и дека не се вработени во хемиската фабрика „Меламин“.
Градоначалникот на Кочевје, Владимир Пребилич, во изјава за медиумите рече дека несреќата нема поголеми негативни влијанија врз животната средина, но ги советува жителите на ова место да останат во своите домови. А ако веќе треба да излезат, тогаш препорачува да носат маски, додека, како што рече, не се знаат резултатите од мониторингот на чистотата на воздухот.
Директорот на компанијата „Меламин“, Среќко Стефанич, вели дека експлозијата се случила утринава при префрлање на една супстанција испорачана со цистерна.
Тој рече и дека нема опасност од нови експлозии, односно испуштање опасни материи. Стефанич изјави и дека е изненаден од експлозијата, чија причина сè уште не е позната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ердоган: Мицотакис повеќе не постои за мене

Турскиот претседател Реџеп Таип Ердоган изјави денеска дека грчкиот премиер Киријакос Мицотакис повеќе не постои за него бидејќи за време на неговата посета на САД се обидел да ја блокира продажбата на воените авиони Ф-16 на Турција.
„Се договоривме да не вклучуваме трети земји во нашиот спор. Сепак, тој ги посети САД минатата недела и ги предупреди во Конгресот да не ни даваат Ф-16“, рече Ердоган на прес-конференција по седницата на владата.
„Тој веќе не постои за мене. Никогаш повеќе нема да се согласам да се сретнам со него. Ќе продолжиме со чесните политичари“, додаде тој.
Регион
Ердоган: Не можеме да ги игнорираме санкциите на Шведска против нас

Турција не може да ги игнорира санкциите на Стокхолм против Анкара, изјави турскиот претседател Реџеп Таип Ердоган.
„Иако е очигледна виталната улога што ја играме во алијансата и меѓународните организации чии членови сме, некои од нашите сојузници сè уште зборуваат за укинување на санкциите. Не можеме да ги игнорираме санкциите на Шведска против нас“, рече претседателот Ердоган.
Тој оцени дека политиката на проширување на НАТО, во која, како што рече, не се заштитени фундаменталните аспекти на безбедноста, нема да придонесе ниту за Турција, ниту за алијансата.
Турција смета на преземање конкретни чекори наместо бескорисни изјави на НАТО за да одговори на нејзината загриженост за евентуалното приклучување на Шведска и Финска, истакна Ердоган.
„Не добивме соодветна поддршка од партнерите на НАТО во борбата против тероризмот. Не можеме да замижиме пред санкциите што ни ги воведе Шведска, нема објаснување за нив. Со оглед на тоа дека улогата што ја играме во НАТО е јасна, ние и натаму разговараме за укинување на санкциите со нашите сојузници“, нагласи турскиот лидер.
Во таа насока, тој изјави дека Анкара не ја добила поддршката што ја очекувала од своите сојузници, ниту во задоволувањето на потребите за одбрана, ниту во 40-годишната борба против тероризмот.
„Нашата земја постојано беше изложена на отворени и прикриени санкции, закани, притисоци и уцени“, додаде Ердоган.
Регион
Петков: За ветото потребен е консензус и од опозицијата

Бугарскиот премиер Кирил Петков изјави дека е потребен широк консензус за прашањето поврзано со ветото за почеток на преговорите меѓу Македонија и ЕУ.
За укинување на ветото, рече Петков, може да се зборува само кога МНР ќе ги претстави најновите резултати од напредокот меѓу двете земји.
„За некои работи мора да постојат јасни црвени линии – како што е темата за корупција. Но, за национално прашање како ова е толку важно што никој нема право да го прави тоа сам. Мора да има заедничка согласност. Потребен ни е широк консензус, кој ќе ја вклучи коалицијата, но и делови од опозицијата“, рече Петков.
Тој изјави дека од претходниот советодавен совет поминале шест месеци, во кои се насобрале многу фактори и дека е потребно да се свика нов.
„Поминаа шест месеци од последниот ваков собир. Многу работи се случија. Имаше разговори, предлози, светски лидери што го покажаа својот пристап кон решавање на темата. Нема подобар формат од тоа да седнете на маса, да сумирате што се случило и кои чекори да ги преземете заедно во иднина. Ако не сме во ист брод, разделбата ќе нѐ ослаби“, објасни Петков.
Тој додаде дека со папата не разговарал за прашањето за давање зелено светло за преговорите за членство во ЕУ со Северна Македонија.