Педесетгодишниот Златко Анѓелиќ од Кисељак оздравел од Ковид-19 по 93 дена минати во болница, од кои 27 бил приклучен на апарати за дишење, а преживеал и клиничка смрт, објави Федералната телевизија на БиХ цитирајќи лекари дека станува збор за надминување на човечките граници во борбата против опасниот вирус.

Иако со тежок и несигурен чекор поради физичка слабост, 50-годишниот Анѓелиќ со насмевка на лицето ја напуштил болницата во Нова Била, придружуван од семејството.

Во изјава за Федералната телевизија (ФТВ) тој рекол дека погрешил затоа што во јуни многу доцна се пријавил кај лекарите.

„За жал, мислам дека сите ќе мора да ја поминат короната, но мојот совет е да не чекате никого, ниту да слушате некого, туку веднаш уште при првиот симптом да се обратите кај лекар“. Тој ги повика луѓето да бидат одговорни, да се придржуваат до мерките и да го чуваат своето здравје.

Анѓелиќ поминал повеќе од три месеци во болници, неколкупати бил ставен и исклучуван од респиратор, а преживеал и клиничка смрт.

„Може да се каже дека Златко помести некои стандарди. Сите можни компликации што можеше да ги развие некој на респиратор беа присутни кај него“, рече шефот на анестезија во болницата во Нова Била, доктор Марко Андрошевиќ.

Ѓуро Хорват е сопственик на хрватската компанија „Техникс“, која испратила писмо до сите вработени дека ќе ги казнат доколку завршат во самоизолација, пишува „Јутарњи лист“.

„Почитувани работници! Бидејќи ситуацијата со Ковид-19 се влошува секој ден, би сакал да ве известам дека компанијата ’Техникс’ ќе воведе свои сопствени капацитети за самоизолација, така што сите што со своето невнимание влегуваат во таква состојба, ќе бидат изолирани во хотелот ‘Крал’. Лицето што ќе биде во самоизолација ќе се дестимулира во износ од 10 проценти од платата. Мора да бидеме свесни дека со своето однесување надвор од компанијата не се загрозувате само вие и вашето семејство, туку и колегите од работа и со тоа ги загрозувате стабилноста на ’Техникс’ и задржувањето на работните места. Директор: Ѓуро Хорват“, стои во писмото на успешниот претприемач.

Хорват се обидел да ги објасни своите ставови во телевизиска емисија на ХРТ.

„Презедовме мерка за да ги дестимулираме луѓето што имаат таков однос кон сопственото здравје и компанијата затоа што недостигаат 20 лица. Во исто време тие пари ги насочуваме кон оние вработени и менаџери што се здрави и се однесуваат одговорно. Сакаме микроорганизацијата да ја сведеме на сопствена одговорност. Сите мора да се вклучиме, секоја локална заедница, компанија“, рече Хорват.

Тој потврдил дека неговата компанија ги казнува оние што завршуваат во самоизолација со 10 проценти од платата.

„Неодамна им одзедовме од платата. Веруваме дека тоа е резултат на несериозност, неодговорно однесување. Ако некое лице оди од работа кон дома, ако оди од кафуле во кафуле, ако самиот го предизвика тој дел од нездравиот живот, тогаш тој мора да сноси дел од одговорноста“, рече Хорват.

Во последните 24 часа во Хрватска се регистрирани 2.378 нови случаи на инфекција со вирусот САРС-КоВ-2. Рекорден број смртни случаи – 23.

Тестирани се вкупно 8.589 лица, пренесува „Индекс“.

Заменик-директорката на Институтот за јавно здравје, кој досега објави податоци за Загреб, вели дека градот пријавил над 500 нови случаи.

„Во изминатите 24 часа ќе имаме повеќе од 500 нови случаи на коронавирус. Се опуштивме премногу, не се придржувавме кон мерките. Можеби луѓето потценија сè. Експертите предупредуваа на есента“, рече Сандра Шикиќ.

„Нашите бројки се толку големи што не можеме да сториме сè за 24 часа. Бараме од граѓаните да придонесат за ситуацијата, додека чекаат на тестирање, ги молиме да се однесуваат одговорно, да не се дружат со семејството, да не одат на работа“, додаде таа, пренесува „Индекс.хр“.