Регион
Откако Вучиќ јадеше паризер, хит понуда во српска пекарница е „претседателски сендвич“, ама со еден посебен додаток
Деновиве се чини главна тема во Србија е паризер, познатата евтина салама. Претседателот на државата Александар Вучиќ во јавното обраќање прво ја издвои оваа салама како една од намирниците што ќе поевтини во продавниците, а потоа снимајќи се на Инстаграм појадуваше паризер со пола леб и мајонез заедно со колегите.
Иако на видеото реално се гледа дека Вучиќ в рака држи сендвич од половина леб, паризер и мајонез, многумина се сомневаат дека тој воопшто го изел сендвичот.
Во секој случај, паризерот е топ тема во соседна Србија откако се донесоа мерки за намалување на цените на основните прехранбени производи.
Бидејќи видеото постои, некој се досетил дека тоа може да биде добар маркетиншки трик, па во својата пекара го нуди таканаречениот претседателски сендвич.
Како што можете да видите на фотографијата која кружи на социјалните мрежи, на полицата има сендвич во проѕирна фолија од која ѕирка паризер, но се гледа уште нешто – зелена салата. Коментарите на Твитер (сега Х) се во стилот: „Каков е овој луксуз, вадете ја таа зелена салата!“
Ina posla ko će da radi pic.twitter.com/itZcMCIJuP
— Neuticajni Tviteraš (@neinfluentan) September 15, 2023
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Хрватските навивачи по нападот во Цетиње: „Не ги осудуваме Црногорците“
Група хрватски навивачи беа нападнати во Црна Гора во неделата вечерта на пат кон Подгорица, каде што се играше фудбалски натпревар.
Инцидентот се случил во Цетиње, а страничниот прозорец на комбе со сплитска регистрација бил скршен. И покрај нападот, навивачите изјавиле дека ова е изолиран инцидент и дека продолжуваат со своето патување кон натпреварот за да го бодрат својот тим, пишува црногорскиот портал „Побједа“.
Откако дадоа изјави пред полицијата во Цетиње, навивачите не сакаа да зборуваат пред камера, но еден од нив накратко го коментираше инцидентот за Радио Цетиње. „Ние не ги осудуваме Црногорците како народ, тие нè нападнаа со качулки на главите. Вакви инциденти се случуваат и тука“, рече тој, додавајќи дека ја сакаат и почитуваат Црна Гора и продолжуваат кон Подгорица.
Според достапните информации, навивачите успеале да избегаат од напаѓачите по нападот и сè пријавиле на полициската патрола на влезот во Цетиње. Градоначалникот на Цетиње, Никола Ѓурашковиќ, ги посетил во полициската станица и им понудил помош, за што му се заблагодариле. Тие го напуштиле градот синоќа кратко по 23 часот со полициска придружба.
фото: принтскрин
Регион
Хрватски навивачи нападнати со шипки во Црна Гора
Група хрватски навивачи вчера вечер беа нападнати на магистралниот пат Цетиње – Будва. Според неофицијални информации од Управата на црногорската полиција, непозната група им го блокирала патот и им ги оштетила возилата со метални шипки, кршејќи прозорци и ретровизори, пишува Вијести.ме.
Навивачите го пријавиле инцидентот во полицијата во Цетиње, но наводно не можеле прецизно да ја идентификуваат точната локација на нападот.
Полициската управа неофицијално соопшти дека се работи интензивно на расветлување на случајот и идентификување на сите учесници.
Според последните информации пренесени од „Побједа“ и РТВ Цетиње, нападнатите Хрвати го продолжиле своето патување кон Подгорица. Во придружба на полицијата, тие го напуштиле Цетиње кратко по 23 часот. Не сакале да бидат пред камерите, но за Радио Цетиње изјавиле дека не ги осудуваат Црногорците како народ и дека биле нападнати од група маскирани со качулки.
Според хулиганската веб-страница Hooligans.cz, хрватските навивачи биле нападнати од црногорски членови на „Делии“, навивачи на „Црвена Звезда“.
фото: принтскрин
Регион
РТС: Пукано кон српски војници во близина на воена база
Вооружена и маскирана група Албанци отвори оган врз припадници на српската армија во реонот на базата „Дебела Глава“, во близина на административната линија со Косово, вчера околу 15 часот, објави вечерва Радио-телевизија на Србија (РТС), а пренесе Данас.рс.
Инцидентот се случил во подножјето на брдото Шоп, каде што вооружената група испукала 15 истрели во правец на патрола на српската армија. Според РТС, во таа прилика било погодено куче кое било во непосредна близина на војниците.
По нападот, вооружената група избегала со шест џипови во правец на Косово. Базата „Дебела Глава“, во близина на која се случила пукотницата, се наоѓа во Копнената безбедносна зона.
фото: принтскрин

