Во последните 24 часа во Србија се потврдени 6.748 нови случаи на коронавирус, починаа 60 луѓе.

Епидемиологот и член на Кризниот штаб, Бранислав Тиодоровиќ, рече дека лекарите предложиле наставата да се префрли онлајн најмалку десет дена, но бидејќи тој предлог не е усвоен, не очекува епидемиолошката состојба да се стабилизира бидејќи бројот на заразени деца расте.

Властите секојдневно апелираат граѓаните да се вакцинираат бидејќи, како што велат, тоа е единствениот начин да се излезе од епидемијата.

Од денеска во Србија почнуваат со употреба ковид – пасошите, што треба да резултира со поголем број вакцинирани лица, а од понеделник, како што е најавено, ќе започне строга контрола на примената на пропишаните мерки.

Од денеска на хрватските граѓани им е овозможено да патуваат во САД без виза, објави Американската амбасада во Загреб.

Оваа одлука на Електронскиот систем за одобрување на патување се однесува на хрватските државјани кои одат во САД на туристички или деловен аранжман, не подолг од 90 дена.

„ Хрватското членство во таканаречената програма за ослободување од визи е важен чекор во натамошното зајакнување на економската и безбедносната соработка меѓу двете земји“ соопштија од американската амбасада.

За да може една земја да влезе во Програмата за укинување на визите, таа мора да ги исполни критериумите од сферата на борбата против тероризмот, спроведување на законите, имиграцијата, безбедноста на документите и управувањето со границите, се вели во соопштението.

Се додава дека процентот на одбиени визи мора да биде под три проценти, што Хрватска го исполни неодамна.

Претседателката на Косово, Вјоса Османи, изјави дека двајца функционери од Канцеларијата за врски на Руската Федерација во Косово се прогласени за персона нон грата.

Причина за таа одлука, како што вели, се нивните штетни активности со кои се нарушиле националната безбедност и уставниот поредок на Косово.

Вјоса Османи на „Фејсбук“ напиша дека тоа било нејзино барање до министерката за надворешни работи, Доника Гервали, која, како што вели, денеска донела одлука двајца службеници да бидат прогласени за непожелни лица.

Таа додаде дека во исто време косовското Министерство за надворешни работи ги информирало институциите за спроведување на законот и надлежните органи за спроведувањето на таа одлука.

„Институциите на Република Косово се решени да се борат против малигното влијание на Руската Федерација и нивните сателити во регионот, кои работат на уништување на нашите и достигнувањата на САД, НАТО и ЕУ, Косово и нашиот регион да биде плен на дестабилизирачките амбиции на Руската Федерација. Ги уверувам граѓаните дека институциите на Косово нема да се двоумат да дејствуваат секогаш кога ќе има нарушување на безбедноста и уставниот поредок во државата“, напиша Османи.