Грција ја зафати ново невреме, а денеска најтешка е состојбата во областа на градот Волос и островот Евија, каде патиштата се блокирани, а најголемиот дел од населението е без струја.

Обилните врнежи донесени вчера од бурата „Елиас“ го погодија северниот дел на Евија, грчки остров кој беше сериозно загрозен од шумски пожари во 2021 година, како и регионот на Тесалија, кој на почетокот на овој месец беше погоден од бурата Даниел.

Голем дел од градот Волос повторно е под вода и кал, пожарникарите и војската ги евакуираа луѓето од куќите и автомобилите, а жителите повторно се без струја.

Утрово во шест часот во Волос повторно почна да врне дожд што претходниот ден предизвика порои и поплави во централниот дел на Грција.

Според претставниците на противпожарната служба, во неколку делови на Волос водата достигнува висина од 50 сантиметри, пренесува Катимерини.

Патиштата во оваа област се покриени со тони камења и кал, а областа е непрепознатлива.

Дел од населението мораше да ги напушти домовите, а многу возила беа однесени од поплавата.

Припадниците на грчката армија ги ослободија патниците кои девет часа беа заглавени во возилата и чекаа помош.

Водата рано утринава се повлекла на повеќе места, па многу патишта се отворени, но многу се уште непристапни.

Поради ситуацијата која настана во Волос по новото невреме, градоначалникот Ахилес Беос рано изутрината излезе да ја провери состојбата на улиците.

„Тажен сум, немам сила да зборувам, тоа е ситуација која не можам да ви ја опишам“, изјави градоначалникот на новинарите на телевизијата ЕРТ.

Опишувајќи го она што Волос го доживеа во средата навечер, тој рече дека „животите биле загрозени“.

Кога станува збор за снабдувањето со електрична енергија, тој рече дека 70 до 80 отсто од Волос немаат струја, додека проблем има и со водоснабдувањето.

Во локалниот Оперативен центар на Противпожарната единица од вчера до денеска во 7 часот утрово се примени вкупно 1.200 повици.

Тешка е ситуацијата и во Евија, каде утрово е одлучено, по налог на градоначалникот, да се забрани сообраќај на поширокото подрачје на Асмини, Пефки, Артемисио и Гувес, поради развој на опасни временски услови.

Последните неколку часа беше многу тешко во Истија и околината, каде што пожарникарите мораа да интервенираат во спасувачка акција за ослободување на мајка и мало дете во Асмини кои беа опколени со вода.

Со чамци стигнуваат и до други села во централна и северна Евија.

Движењето на противпожарната бригада од центарот на Халкида кон северна Евија не е возможно, бидејќи патиштата се непроодни, а градежните машини работеа цела ноќ за да минат спасувачките екипи.

Според метеоролозите, грчките региони кои денеска може да очекуваат обилни дождови и силно невреме ги вклучуваат префектурата Атика и градот Атина, а локално обилни дождови и невреме се очекуваат до пладне во околината на Волос, на Споради и Евија, во областите Фтиотиди, Фокиди и Беотија.

Претседателот на Република Српска, Милорад Додик, потврди дека ќе се сретне со рускиот претседател Владимир Путин, кинескиот претседател Си Џинпинг, претседателот на Азербејџан Илхам Алиев и унгарскиот премиер Виктор Орбан.

Тој на 20 октомври оди во Русија и ќе остане до 5 ноември.

„Путин е најдобриот човек што сум го запознал во политиката и горд сум што имам можност да разговарам со него“, изјави Додик.

Имено, тој ќе оди во Кина „некаде по Русија“ на средба со Џинпинг, а во Будимпешта на средба со Орбан веќе на 2 октомври.

Косово ја обвини Србија дека стои зад воената група која во неделата нападна полициска патрола и се судри со косовските сили.

Властите во Приштина покажаа низа модерно оружје што го користела групата, вклучително и два оклопни автомобили од српско производство и фрлач на гранати, заедно со документ што наводно покажува дека фрлачот гранати, произведен од Застава Армаментс, бил испорачан од српската армија, пишува британскиот Гардијан.

Косовската влада, исто така, тврди дека водачот на групата бил истакнат политичар од косовски Срби, лојален на српскиот претседател Александар Вучиќ, и дека еден од тројцата борци убиени во неделата бил поранешниот телохранител на Александар Вулин, шефот на српската разузнавачка служба, кој е санкциониран од САД за корупција.

„Оваа група дојде од Србија, тие се обучени во Србија, финансирани и опремени од српската армија и нејзината полиција. Дел од оружјето е земено од армискиот магацин и предадено на терористите кои дошле на Косово од Србија“, изјави за Гардијан косовскиот министер за внатрешни работи Џељаљ Свечља.

Свечља рече дека неговото министерство ги споделило доказите со западните амбасади и агенции.

„Тие сакаа да ја окупираат територијата на Косово и да отворат нов канал за комуникација, нов пат од Србија до Косово“, рече тој и додаде дека крајната цел е поделба на земјата.

Српската влада негираше вмешаност во вооружената група, но одржа официјален Ден на жалост за тројцата загинати.

Косово вели дека групата била предводена од Милан Радоичиќ, заменик-претседател на партијата Српска листа поддржана од Белград, која доминира во политиката во четири општини со мнозинско српско население во северно Косово.

Свечља рече дека разузнавачката служба на неговата земја верува дека Радоичиќ, кој е санкциониран од САД и Велика Британија, е ранет и се опоравува во главната воена болница во Белград. Тврдењето не можеше да се потврди независно.

Радоичиќ не се огласи во јавноста, но министерот за надворешни работи на Србија, Ивица Дачиќ, тврди дека снимката на која се гледа Радоичиќ меѓу припадниците на паравојската е „измама“.

Конфликтот се случи во време кога преговорите со посредство на ЕУ за нормализација се во застој, при што Вучиќ вети дека никогаш нема да го признае Косово, а косовската влада одбива да воспостави полуавтономна асоцијација на српски општини.

САД ги поддржуваат преговорите и досега застанаа на страната на Европа бидејќи најголем дел од вината за нивниот неуспех ја префрлаа на косовскиот премиер Аљбин Курти. Но, администрацијата на Бајден ја истражува вмешаноста на Белград во паравоената единица и се обидува да ја открие нејзината мисија.

Доколку се утврди дека Вучиќ бил вмешан, тоа би можело да го промени пристапот кон преговорите на САД и ЕУ, кои законодавците од двете страни на Атлантикот ги критикуваа како пристрасни кон Белград. Ова може да доведе и до санкции против Србија.

„Се појасно е дека имало сценарио да се предизвика конфликт, српската војска да влезе да го заштити српскиот народ на север и на тој начин да ја изврши поделбата на Косово. Оваа операција, без разлика кој е директно одговорен за неа во Белград, ја премина црвената линија која Западот не може да ја толерира. Ваквата ситуација Курти не ја испровоцира, како што коментира мнозинството во Белград. Напротив, тој покажа зрелост, а косовската полиција покажа професионализам“, изјави Соња Бисерко, претседател на Хелсиншкиот комитет за човекови права во Србија.

Во брифинг документ за ЕУ, косовската влада соопшти дека „група од десетици маскирани вооружени лица отвориле оган врз рутинска полициска патрола“ на 24 септември во селото Бањска во близина на границата со Србија.

Во судирите загинаа еден косовски полицаец, тројца членови на воената група, а неколкумина беа повредени. Српската група потоа се повлекла со оклопни автомобили во манастир во близина на селото, што довело до судири. Пред косовската полиција да успее да ја преземе контролата врз манастирот, рече Свечља, некои од паравоените групи успеале да побегнат и да преминат во Србија.

Американскиот државен секретар Антони Блинкен го осуди нападот врз косовската полиција и рече: „Сторителите на ова злосторство мора да одговараат преку транспарентен истражен процес“. Ги повикуваме владите на Косово и Србија да се воздржат од какви било активности или реторика што може дополнително да ги подгрее тензиите“.

Блинкен повика на „враќање на дијалогот со посредство на ЕУ“.