Турскиот претседател Реџеп Таип Ердоган изјави денеска дека САД и предложиле на Анкара продажба на борбени авиони Ф-16, во замена за инвестицијата на Турција во програмата за авиони Ф-35.

Анкара беше отстранета од таа програма откако го купи одбрамбениот систем С-400 од Русија.

Претходно овој месец, Ројтерс објави дека Турција испратила барање до САД да купат 40 авиони Ф-16 и близу 80 парчиња опрема за надградба на постојните воени авиони.

Уште 250.000 дози вакцини „Спутник В“ пристигнаа синоќа во Србија, и тие веднаш беа транспортирани до Институтот Торлак, изјави Ненад Поповиќ, министер во српската влада и претседател на Меѓувладиниот комитет за соработка со Русија.

„Вакцините беа доставени во Србија од фабриката Генериум во Владимирскиот регион“, рече Поповиќ.

Тој посочи дека руската вакцина „Спутник В“ има потврдена ефикасност од над 97 проценти.

„’Спутник В’ е одлична и како ‘бустер’ вакцина, односно како трета доза од вакцината за граѓаните кои претходно примиле две дози од која било вакцина“, рече министерот Поповиќ.

Според него, вакцините ќе бидат дистрибуирани до центрите за вакцинација низ Србија што е можно поскоро.

Телата на четворица руски туристи се пронајдени во хотел на брегот во западна Албанија.

Полицијата соопшти дека туристите биле пронајдени задушени во хотелска сауна. На распит е целиот персонал на хотелот и истрагата е во тек.

Руските туристи, на возраст меѓу 31 и 60 години, биле дел од групата што поминала една недела на одмор во хотел со пет ѕвезди, пишува Гардијан.

Истражителите веруваат дека луѓето пронајдени мртви припаѓаат на исто семејство врз основа на нивните презимиња. Станува збор за двајца мажи и две жени.