Генералното собрание на ОН во вторникот ги избра Алжир, Гвајана, Сиера Леоне, Словенија и Јужна Кореја во Советот за безбедност на ОН со двегодишен мандат – почнувајќи од 1 јануари 2024 година – а Белорусија, која ѝ е сојузник на Русија во нејзината инвазија на Украина, не доби место, пренесува „Еурактив“.

Петте избрани нации ќе ги заменат Албанија, Бразил, Габон, Гана и Обединетите Арапски Емирати.

Алжир, Гвајана, Сиера Леоне и Јужна Кореја се кандидираа без противници за место во 15-членото тело, кое е одговорно за одржување на меѓународниот мир и безбедност. Во единствената натпреварувачка трка Словенија ја победи Белорусија.

Советот за безбедност е единственото тело на ОН, кое може да носи правно обврзувачки одлуки, како што се наметнувањето санкции и одобрувањето употреба на сила.

Советот има пет постојани членки со право на вето: Велика Британија, Кина, Франција, Русија и САД.

За да се обезбеди географска застапеност, местата во Советот им се доделуваат на регионални групи. Но, дури и ако кандидатите се без противници во својата група, тие сепак треба да добијат поддршка од повеќе од две третини од Генералното собрание.

Гвајана доби 191 глас, Сиера Леоне 188, Алжир 184 гласа, Јужна Кореја 180, а Словенија освои 153 гласа и ја победи Белорусија, која доби 38 гласа.

Белорусија беше кандидат без противкандидат од 2007 година за источноевропското место 2024/2025. Словенија влезе во трката во декември 2021 година по бруталното задушување на протестите од страна на властите во Белорусија по претседателските избори во 2020 година.

Русија потоа ја искористи територијата на Белорусија како лансирно поле за инвазијата на Украина во февруари 2022 година.

„Русите секогаш тврдеа дека многу држави јавно ја поддржуваат Украина во ОН, но приватно сочувствуваат со Русија. Но, ова тајно гласање воопшто не го поддржува тоа тврдење“, рече директорот на Меѓународната кризна група на ОН, Ричард Гоуван.

Русија минатиот месец продолжи со план за распоредување тактичко нуклеарно оружје во Белорусија. Тоа е прво распоредување такво оружје од страна на Москва надвор од Русија од падот на Советскиот Сојуз во 1991 година.