Регион
Жена од Брчко создала дива градинка во својот дом: дали тоа било параван за трговија со луѓе, пишува „Кликс“

Истрагата за пронаоѓањето 31 дете во куќа во Брчко е во тек, а „Кликс“ пишува дека неофицијалните информации што ги имаат укажуваат дека со години во зградата функционирала дива градинка за која знаеле соседите.
Сега е отворено прашањето дали тоа било параван за трговија со луѓе бидејќи одредени детали може да укажуваат на тоа, додаваат од порталот.
Да потсетиме, сопственичката на куќата во која беа пронајдени 31 дете, Захида Ѓого од Брчко, е уапсена поради сомнение дека сторила три кривични дела заедно со уште седум други лица: трговија со луѓе, трговија со деца и запуштање или злоупотреба на деца.
Уапсени се и син ѝ и жената што престојувала во објектот, која потекнува од областа Бања Лука и, најверојатно, е италијански државјанин. Во случајот се вклучени и истражители од Хрватска, како и Европол. Хрватски „Индекс“ извести дека од полициски извори дознале оти во Брчко биле пронајдени претежно деца Роми. Помал број од нив имале хрватски пасоши, но нивниот идентитет и оригиналност сè уште се проверуваат.
Според извори од порталот „Кликс“, како и локални жители, Ѓого во 2018 година основала нелегална градинка во својата куќа, каде што чувала деца. За пошироката заедница, ништо во врска со ова не беше спорно, дури ни фактот дека децата никогаш не биле во пространиот двор од куќата.
„Ја познавам Захида многу години, нејзиниот сопруг почина минатата година, а таа живееше во куќата со својот син. Знаев дека таа е бебиситерка и не ми се виде ништо чудно во врска со тоа. Знаев дека има деца, но не дека имало толку многу. Јас навистина не разбирам зошто имало толку многу деца таму. Секој ден гледав родители како ги носат и земаат своите деца. Никогаш не излегуваа во дворот, беа затворени во куќата“, изјави за „Кликс“ еден од соседите на Захида.
Куќата во која престојувале децата ја обезбедува полиција, а соседите не сакаат јавно да зборуваат за целиот случај. Исто така, покрај вкупно осуммина осомничени и досега уапсени, полицијата сослушала и неколку родители на децата, меѓу кои и татко од Хрватска, кој вчера бил во Брчко, пишува „Кликс“.
Според информациите потврдени за „Кликс“, децата пронајдени во куќата биле на возраст од новороденче до 12 години, биле во прилично запуштена состојба, а откога биле преместени, под надзор на надлежните служби, биле сместени во локален хотел во областа Брчко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Муслиманите во Албанија паднаа под 50 проценти првпат по два века

Пописот од 2023 година покажа дека муслиманите повеќе не го сочинуваат мнозинството од албанските граѓани, првпат по повеќе од два века, објави „Индекс.хр“.
Според најновиот попис, муслиманите сега сочинуваат 45,7 проценти. Бројот на муслимани се намалил за повеќе од 30 проценти од пописот во 2011 година.
Треба да се напомене и дека пописот од 2023 година покажа дека муслиманите бекташи сочинуваат 4,8 проценти од населението, но тие се наведени како посебна религиозна група. Бекташите се членови на хетеродоксен исламски ред од суфиско потекло, кој датира од 13 век, и се сметаат за посебна религиозна група во Албанија иако историски се засноваат на шиитско-исламската традиција.
Христијаните сочинуваат 15,6 проценти од населението, од кои 8,4 проценти се католици, а 7,2 проценти се некатолици. Во групата религиска деноминација спаѓаат 13,8 проценти, а атеистите сочинуваат 3,6 проценти.
Оваа значајна демографска промена означува историски момент за религиозната структура на земјата, која е нестабилна со децении.
Според извештајот на „Турција тудеј“, Албанија изгубила речиси 15 проценти од своето население во последните десет години главно поради масовната емиграција и падот на стапката на наталитет. Аналитичарите ова го припишуваат на недостигот на перспективи за младите луѓе, кои сè повеќе бараат работа во странство.
Историски гледано, Албанија била католичка земја во своите почетоци, по римските освојувања. Статусот на муслиманска земја го добила дури во 15 век, со доаѓањето на Отоманската Империја. Сепак, поради географската близина и силните врски со Грција, каде што многу Албанци работат и зборуваат грчки, православното христијанство повторно е во пораст во последните децении.
Историјата на 20 век исто така игра голема улога во сегашната религиозна структура. По Втората светска војна, Албанија стана комунистичка држава, каде што религиозната практика беше забранета речиси 50 години сè додека демократијата не се врати по изборите во 1992 година.
По бомбардирањето на НАТО на Југославија во 1999 година, речиси половина милион етнички Албанци избегаа од Косово, дополнително оптоварувајќи ја веќе кревката економија на Албанија. Иако земјата доживеа економски раст во следната деценија, таа останува една од најсиромашните во Европа со висока невработеност и корупција во инфраструктурата, што ги одвраќа странските инвестиции.
И покрај предизвиците, Албанија стана сè попривлечна туристичка дестинација во последните години благодарение на ниските цени и природната убавина. Видеата на „Тик-ток“ од национални паркови и водопади добија милиони прегледи, а земјата е наречена европски Малдиви.
Регион
Вајц: Мора да се бориме против српското влијание во Северна Македонија

Во Северна Македонија гледаме многу странско влијание. Мора да се бориме против него, без разлика дали е српско, кинеско или руско.
Ова го изјави известувачот на Европскиот парламент за Северна Македонија, Томас Вајц, во Стразбур, објави „Бгнес“. За неговиот извештај ќе се гласа на 9 јули.
Тој нагласи дека извештајот го содржи условот за промена на Уставот и конкретно – вклучување на Бугарите во него, според написите на медиумот.
„Извештајот посочува говор на омраза, потреба од владеење на правото и борба против корупцијата“, вели Вајц повикувајќи на слобода на медиумите и јасна одговорност за нивната сопственост.
Комесарката на ЕУ за проширување, Марта Кос, од своја страна, рече дека „единствениот пат напред, пред сè, е промена на Уставот“. Таа го повика Скопјe да ги почитува основните права, слободата на изразување и слободата на медиумите.
Ивајло Валчев (ИТН-ЕКР) ги праша своите колеги: „Во која земја може да се осуди лице за цитирање историски личности? Во која земја се напаѓаат луѓе поради нивното потекло? И која земја си дозволува да ги погази меѓународните договори?“
„Денес, Љубчо Георгиевски е со нас во салата и може да одговори на овие прашања затоа што е достоен Бугарин кому му се заканува казна само затоа што има храброст да се нарече Бугарин од Македонија. Искрено верувам дека патот на РСМ е да биде дел од Европа, но властите таму мора да ги напуштат своите господари од Белград и Будимпешта и да ги заштитат човековите права, да ги почитуваат обврските што ги презеле“, додаде Валчев. Тој се обрати и до граѓаните во Северна Македонија: „Мицкоски ве лаже“, објави медиумот.
Андреј Ковачев од ГЕРБ/ЕПП рече дека политичарите во Скопјe го саботираат процесот на европска интеграција и Европската Унија не треба да затвора очи пред ова.
„Наместо реформи и вистински напредок, гледаме популизам, националистичка реторика и погодно претставување на Бугарија како непријател поради што европската интеграција на земјата не оди добро. Оваа политика води кон директни репресии врз луѓето што го зачувале својот бугарски идентитет – наследниците на мнозинството македонски Бугари. Тие се подложени на притисок, дискриминација и отворени закани како во случајот со г. Георгиевски – еден од најистакнатите претставници на бугарската заедница“, забележа тој. „Не губете им го времето на вашите сопствени граѓани“, им се обрати Ковачев на политичарите во Северна Македонија. „Се надевам дека зората на слободата ќе изгрее што побргу“, додаде тој, пренесува бугарскиот медиум.
Регион
(Видео) Силно невреме во Србија: ветерот корнеше дрвја, дел од зградите останаа без покриви

Силна бура го погоди Белград и некои делови од Србија во раните попладневни часови. Пет лица се повредени, а предизвикана е голема материјална штета, пренесуваат тамошните медиуми.
Бурни налети на ветер соборија кран на градилиштето во Нов Белград, превртеа приколка за влечно возило, а осамна и видео од Ледино кај Сурчин, каде што бројни станбени згради останаа без покриви. Луѓето во областа според написите, избегаа без никакви последици, а најмалку две згради останаа без покриви.
Републичкиот хидрометеоролошки завод издаде портокалово предупредување, објавува Спутник.
МУП издаде и тревога за ризик од силна бура со дожд, грмежи, голем град и силни налети на ветер.