Регион
Членот на Претседателството на БиХ ја обвини Хрватска за злоупотреба на својата улога во ЕУ и НАТО

Членот на Претседателството на БиХ, Жељко Комшиќ упати обвинувања кон Хрватска дека ја злоупотребува својата улога во ЕУ и НАТО со иницијативите за измена на Изборниот закон на БиХ и рече дека таквите потези не се поддржани од „пријателска“ и „добронамерна“ Турција предводена од претседателот Реџеп Таип Ердоган.
На прес-конференција по средбата со турскиот министер за надворешни работи Мевлут Чавушоглу, Комшиќ синоќа рече дека најмногу разговарале за односите меѓу земјите од регионот и деталите од неговата посета на Загреб и разговорите со неговиот колега Гордан Грлиќ Радман.
„Загреб ги злоупотребува ваквите средби, па дури и позицијата во ЕУ и НАТО“
„Од министерот добивме уверување дека не го поддржуваат она што Загреб се обидува да го направи во однос на интервенциите во внатрешните работи, дури и во однос на Изборниот закон“, рече Комшиќ.
„Тоа што Загреб ги злоупотребува таквите средби, па дури и неговата позиција во ЕУ и НАТО, според мене е одраз на очајот на Загреб што не може да го зграпчи тој лост на моќ во Босна и Херцеговина“, рече Комшиќ.
Турција не ја поддржува позицијата дека треба да се отворат преговори меѓу двата народа, рече Комшиќ.
„Колку се поупорни, толку посилен ќе биде нашиот одговор. Драго ни е што ја имаме поддршката од Република Турција за таквиот став, а не за ставот што се обидоа да се покрене по тој состанок во Загреб“, рече Комшиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Џамбаски: За Србија нема место во ЕУ

Ангел Џамбаски, бугарскиот пратеник на ВМРО во Европскиот парламент, ја нападна Србија изјавувајќи дека за неа нема место во Европската Унија бидејќи прави провокации во Косово и Босна и Херцеговина, пишува „Б92“.
„За Србија нема место во ЕУ, Србија прави провокации во Косово, Србија прави провокации во Босна и Херцеговина. Србија ја поддржува руската пропаганда за време на војната во Украина. Србија планира во Ниш да го изгради најголемиот руски шпионски центар во Европа“, изјави Џамбаски.
Тој додаде дека „Србија ги поттиснува Хрватите и Бугарите“ и дека „гледа како да ги асимилира и протера“.
„За Србија, која ја спроведува политиката на Кремљ и Путин, нема место во ЕУ. Разберете го тоа“, рече Џамбаски.
„Б92“ анализира дека овие напади врз Вучиќ и Србија немаат никаква основа бидејќи Србија е земја гарант на мирот и стабилноста и мудро одговара на провокациите што доаѓаат од Приштина, Сараево и од Загреб.
Покрај тоа, пишува „Б92“, Србија ја осуди руската агресија и го поддржа територијалниот интегритет на Украина. Претседателот Вучиќ со својата независна политика повеќепати докажа дека Србија не седи ниту на руската ниту на американската фотелја – туку само на српската, се наведува во коментарот.
„Јасно е дека овие напади доаѓаат сега затоа што претседателот Вучиќ застана во одбрана на целиот Западен Балкан, дека Европа ја сфати важноста на иницијативата ‘Отворен Балкан’ и дека Вучиќ мудро ги советуваше жителите на Северна Македонија, која инаку е попречена од Бугарија во процесот на пристапување кон ЕУ“, пишува „Б92“.
Вучиќ синоќа изјави дека не може да им каже на Македонците дали е добар францускиот предлог за решавање на спорот со Бугарија, но и дека не треба да прифатат или да отфрлат нешто априори. Вучиќ рече и дека Србија е на европскиот пат и дека на отворањето на преговорите меѓу Србија и ЕУ му претходело прифаќањето на Бриселскиот договор, што е тешко, но дека отворањето на преговорите помогнало многу.
Регион
Европарламентарци: Србија итно треба да го преиспита својот став кон Русија

Застапниците во Европскиот парламент сакаат Србија да го преиспита својот став кон Русија, пренесува Euro news.
Од почетокот на руската инвазија во Украина официјален Белград одржува блиски контакти со Русија, спротивно на ставот на ЕУ.
Вчера членовите на Европскиот парламент одобрија годишен извештај за проценка во која се изразува жалење што Србија не ги усклади санкциите на ЕУ за Русија. Текстот е усвоен со 523 гласа за, 78 против и 34 воздржани.
„Постои итност во случајот со Србија да направи промени `дома` во врска со ставот кон Русија. Тоа е земја која секогаш гледала во различни правци, кога станува збор за надворешната политика. Мислам дека сега е време Србија да одлучи каде стои и се надевам дека ќе донесат јасна одлука кон Европа“, рече европарламентарецот Владимир Билчик.
Регион
Уапсен е експотпретседател на владата во Хрватска

Томислав Толушиќ – ексхрватски владин потпретседател е уапсен поради сомнеж за измама во врска со конкурс за субвенции во винскиот сектор, кои се добиени од европските фондови, соопштено е денеска од Загреб. Полицијата утринава упаднала во куќата на Толушиќ во Вировитица.
Тамошното МВР соопшти дека по налог на Канцеларијата на европскиот јавен обвинител е спроведена криминалистичка истрага поради сомнеж за сторени кривични дела, односно субвенциски измами, злоупотреба на позицијата и поттик на злоупотреба.
Хрватското МВР не го наведува името на вториот осомничен во истиот случај, ексдржавен службеник, вработен во телата на државна управа. Во тек е спроведување на доказен материјал.
Толушиќ беше потпретседател на владата на Пленковиќ од мај 2018 до јули 2019 година.