Регион
Акропол се затвора напладне

Туристичкиот локалитет Акропол во Атина денеска од пладне до 17 часот ќе биде затворен поради екстремните температури, соопштија грчките власти.
Забележано е дека денеска и утре Грција минува низ најлошите 48 часа топлотен бран, а се очекува температурите да достигнат и до 43 Целзиусови степени во некои делови од земјата.
Надлежните се во зголемена готовност и поради шумските пожари, кои секое лето ја оптоваруваат Грција, наведува порталот.
Метеорологот Михалис Ситас рече дека ова е еден од најдолгите топлотни бранови во последните години и нагласи дека времето ќе биде тропско во вечерните часови, со особено високи температури.
„Грција ја очекуваат три топли дена. Овој феномен е можеби еден од најдолгите топлотни бранови со најголем број последователни топли денови забележани во последните години“, изјави тој за newsit.gr.
Највисоки температури ќе има в среда, четврток и в петок. Максимални температури од 42 до 43 степени се очекуваат во континенталните предели, особено во Македонија, Тракија, Стереја, Тесалија и на Пелопонез. На брегот поради морскиот воздух температурата ќе биде за 3 до 5 степени пониска. Високите температури нема да ги заобиколат и континенталните предели во јонското подрачје и на јужниот дел на Крит.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
15-годишната Леа од Косово убиена во масакрот во Грац

Во денешниот масакр во училиштето во Грац загина 15-годишната Леа Бајрами, родена во градот Витина, Косово. Информацијата ја потврди градоначалникот на општина Витина, Сокол Халити.
„Драго семејство Бајрами, длабоко сум шокиран од веста за трагичната загуба на вашата ќерка Леа од нашата општина, која го загуби животот во сериозен напад што се случи денес во градот Грац, Австрија. Овој сериозен настан длабоко нè погоди сите. Губењето на еден млад живот е рана што остава неизбришлив белег во душата на секој од нас.
Во мое име и во име на општина Витина, изразувам најискрено и најдлабоко сочувство. Со вас сме во овој тежок момент и се молиме Бог да ви даде сила да се справите со оваа голема болка. Споменот за неа секогаш ќе остане жив меѓу нас“, напиша Халити на Фејсбук и сподели фотографија од Леа од нејзиното детство.
„Исто така, изразувам сочувство до мојата пријателка, градоначалничката на Грац, Елке Кар. Во име на општина Витина и нашите граѓани, изразувам најдлабоко сочувство за трагичниот настан што се случи денес во вашиот град, каде што за жал млада девојка од нашата општина го загуби животот заедно со уште девет лица.
Свесни сме за предизвиците што ги носи ваков чин на насилство и ја споделуваме со вас и со граѓаните на Грац болката од оваа трагедија. Го цениме вашиот институционален одговор и посветеност на безбедноста на сите граѓани, без оглед на потеклото“, додаде тој.
За потсетување, „Кликс“ претходно денес објави дека меѓу убиените се двајца млади луѓе по потекло од Босна и Херцеговина – 17-годишна ученичка со иницијали К.Ј. и девојка Х.А. Информациите за идентитетот на жртвите беа потврдени за Кликс од имамот во Грац, Сабахудин Хасиќ.
Регион
(Фото) Пијан Македонец удри во паркиран автомобил во Загреб, казнет е со 4.860 евра

45-годишен државјанин на Северна Македонија бил вклучен во сообраќајна несреќа на улицата Радничка во Загреб околу 6 часот наутро во неделата, објави хрватски Индекс.
Тој управувал со „фолксваген пасат“ со загрепски регистарски таблички и возел југозападно низ паркинг на северната страна од пристапниот пат до ресторан.
Пристигнувајќи до куќата број 27, тој се вратил на пристапниот пат, застанал и возел напред. Во тој момент, предниот лев дел од неговиот автомобил удрил во задниот дел од „рено клио“ со загрепски регистарски таблички, сопственост на 40-годишна жена, кое било паркирано.
Со истрагата и алкотестот е утврдено дека 45-годишниот возач управувал возило со 1,76 промили алкохол во крвта.
Сообраќајната несреќа предизвикала материјална штета. Возачот бил уапсен и сместен во посебни простории додека не исчезнат ефектите од опојната материја. Потоа бил изведен во Општинскиот прекршочен суд во Загреб.
Во обвинителниот акт, полицијата предложила возачот да биде казнет со парична казна од 5.360 евра и затвор, како и да му се изрече заштитна мерка забрана за управување со моторно возило Б категорија во траење од 12 месеци.
Судот го прогласи обвинетиот за виновен, му изрече парична казна од 4.860 евра и му изрече заштитна мерка забрана за управување со моторно возило Б категорија во траење од 12 месеци, објави Индекс.
Регион
Пожар во затвор во Сплит, неколку затвореници хоспитализирани

Неколку затвореници се повредени во пожарот во сплитскиот затвор Билице, кој е изгаснат, соопшти денес Сплитскиот противпожарен оперативен центар.
Како што е наведено, затворскиот персонал го изгаснал пожарот што избувнал синоќа, а пожарникарите ги евакуирале затворениците, од кои неколку побарале медицинска помош поради вдишување чад и биле пренесени во сплитската болница.
„Добивме дојава за пожар во една од ќелиите на затворот околу 21:30 часот, а по пристигнувањето на пожарникарите затворскиот персонал веќе го изгаснал пожарот во најголем дел, а пожарникарите веднаш ги евакуирале затворениците“, изјавиле за Хина од Противпожарниот центар.