Регион
Афера во Србија: Првиот човек на Јагодина обвинет за подведување девојчиња

Српскиот политичар Драган Марковиќ Палма, претседател на Собранието на градот Јагодина, се најде во центарот на скандалот што беше една од главните теми во Србија во последните неколку дена.
Потпретседателката на Партијата за слобода и правда, Мариника Тепиќ, го обвини првиот човек на Јагодина за подведување жени и девојчиња заедно со неговите коалициски партнери.
„Подведувањето жени и девојчиња не оди само со мафијата. Тие се речиси секојдневни во нашата Србија. Денес знам дека подведувањето жени и девојчиња е секојдневие во Јагодина, каде што владее Драган Марковиќ Палма”, рече Тепиќ на прес-конференцијата, пренесува порталот Нова.рс.
Тепиќ покажа и снимка од сведочењето на човек кој наводно бил упатен во случајот на подведување.
„По посетата на Мариника на Јагодина, како маж и родител кој знае што се случува, решив да ѝ кажам за тој дел од мојата работа за Марковиќ. Не можам да кажам господин затоа што тоа сигурно не е. Работев во хотелот Кончарево, а знаеме кој стои зад измислениот сопственик на тој хотел. Тоа е хотел на Марковиќ“, вели наводниот сведок, а потоа објаснува што се случувало во споменатиот објект.
„По разни забави на кои пееја нашите естрадни sвезди, девојчињата беа донесени со такси од Белград преку разни луѓе. Според моето слободно верување, тие беа на возраст од 15 до 18 години.
Луѓето кои доаѓаа со него беа негови коалициски и деловни партнери. Познато беше дека по ваквите забави овие девојки одат со него или со нив. Најчесто тоа е откако ќе ги напиеја девојчињата. Неговите хостеси ги убедуваа девојчињата дека ништо нема да им биде, дека сè ќе биде добро. И верувам дека тоа се трауми за тие деца“, рече тој.
Набргу по обвинувањата, се огласи и самиот Палма Марковиќ.
„Лажете, лажете, лажете. Наскоро ќе испратиме изјава“, рече кратко Марковиќ, а потоа испрати изјава во која има серија обвиненија против Тепиќ, која го обвини за подведување.
Вишото јавно обвинителство во Јагодина денес формираше предмет во врска со наводите на Мариника Тепиќ на вчерашната прес-конференција, како и барањето поднесено до обвинителството од претседателот на општинското собрание на Јагодина, Драган Марковиќ Палма, за да се утврдат сите околности.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Регион
Гори во Грција: издадена наредба за итна евакуација

Голем шумски пожар избувна денес во областа Каравадос на грчкиот остров Кефалонија, а издадена е наредба за евакуација на три области, јавуваат грчките медиуми.
Пожарот избувнал во земјоделска и шумска зона, а ангажирани биле 20 припадници на противпожарната служба со седум возила, како и членови на планинската спасувачка служба и волонтери, објави „Катимерини“.
„Доколку се наоѓате во областите Каравадос, Доризата и Керамис, засолнете се и упатете се во правец на Аргостоли. Следете ги упатствата на властите“, се наведува во известувањето на противпожарната служба.
Четири авиони и два хеликоптера исто така помагаат во гаснењето на пожарот, пишува грчкиот весник.
Фото: принтскрин