Регион
(Видео) Балканска земја претставена како евтина верзија на Малдиви
Албанските плажи се опишани како идеална алтернатива на Малдивите, во исто време далеку поевтини од другите европски туристички дестинации за летување.
Експертите на платформата за резервации за патувања Loveholidays ги открија врвните дестинации за туристите кои сакаат да заштедат пари, а тимот препорачува евтин одмор во Албанија, за кој велат дека има „крајбрежје што го одзема здивот“ и е „алтернатива на Малдивите“, пишува Експрес. Според нив, Албанија често се занемарува како дестинација во Југоисточна Европа, но има „недопрени плажи, прекрасно крајбрежје и извори на вода кои даваат доволно причини за посета“.
„Албанија има многу езера и водопади во кои доминираат различни нијанси на сино, а некои дури ја нарекуваат и прифатлива алтернатива на Малдивите“, велат тие.
Ксамил се издвојува како дестинација со најубавите плажи во Албанија, а до него лесно се стигнува од блиското одморалиште Саранда. Туристите во своите коментари за оваа дестинација истакнуваат дека „плажата е полна со живот и музика, а водата е неверојатно чиста“.
Во близина се урнатините на Националниот парк Бутринт, кои се дел од светското наследство на УНЕСКО, а некогаш биле еден од најдобрите градови во експанзивната Римска империја. При посетата на локацијата, туристите можат да научат за римската историја на Албанија и да добијат увид во минатото на земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Пожар во хотел во Словенија, евакуирани 160 гости
Околу 1.30 часот избувнал пожар во еден од хотелите на Блед, Словенија.
Брзата помош ги евакуирала сите лица од хотелот, кои, според првите податоци, биле речиси 160. Три лица настрадале од вдишување чад и им била укажана помош на самото место, а потоа се префрлени на домашна нега. Пожарникарите го изгаснале пожарот нешто по три часа, а истрагата за причините за пожарот е во тек.
Како што објасни претставникот за односи со јавноста на полициската управа Крањ, Роланд Брајиќ, според првичните информации, пожарот избувнал во подрумот на хотелот. Според досега познатите информации, наводно изгорел дел од комплексот кај базенот.
Полицијата ги замоли луѓето при интервенцијата да не излегуваат на местото на настанот и да не се задржуваат во близина, а околните жители поради пожарот и чадот да ги затворат прозорците на своите станови и куќи.
Причината за пожарот сè уште не е позната и ќе биде предмет на дополнителна кривична истрага. Во пожарот е причинета голема материјална штета.
Регион
Двајца работници се повредени во експлозија во воената фабрика „Слобода“ во Чачак
Во воената фабрика „Слобода“ во Чачак, во централна Србија, одекна експлозија, при што се повредени двајца работници, од кои едниот има изгореници на телото, потврдија од компанијата.
РТС јавува дека 36-годишен работник добил изгореници на лицето и вратот и повреда на раката, а другиот, по прегледот, е отпуштен на домашно лекување.
Од болницата во Чачак потврдија дека работникот со изгореници е ставен на интензивна нега, а од компанијата „Слобода“ соопштија дека тој е во стабилна состојба.
„Утринава, во осум часот, дошло до технолошка експлозија на линијата на лабораторијата за артилериски гранати, во која се повредени двајца работници, на кои веднаш им била укажана лекарска помош“, соопштија од компанијата „Слобода“.
Пред три години во оваа фабрика се случија две експлозии со разлика од две недели кога беа повредени неколку работници.
Регион
14-годишник со закана со нож и електрошокер им одзел патики на тројца врсници во Белград
Полицијата во Белград го уапсила М. М. (14), кој заедно со своите двајца другари, во парк во Белград, со закана со нож и електрошокер одзел патики од малолетни момчиња.
Како што е познато, М. М. им пришол на момчињата Г. В. (13), Л. П. (12) и В. Ж. (14) и со закана со оружје побарал да ги соблечат новите патики. Имал поддршка од своите двајца пријатели.
Случајот е во надлежност на Вишото јавно обвинителство на Одделот за малолетници во Белград.
Неофицијално, малолетникот бил сослушан во присуство на родителите.