Регион
Бериша оди во домашен притвор и ќе биде под полициски надзор

Специјалниот суд против организиран криминал и корупција денеска донесе одлука со која се прифаќа барањето на Специјалното обвинителство за определување засилени безбедносни мерки за поранешниот шеф на државата и експремер, Сали Бериша, актуелен лидер на побројното крило на опозициската Демократска партија.
Според одлуката донесена од шефицата на судот, Ирена Ѓока, Бериша од денеска е во домашен притвор под полициски надзор, а забранета му е и комуникација со други лица, освен членови на семејството, со кои живее во станот.
Претходно судските сеанси беа одложувани на трипати, по барање на неговите адвокати, прво да се запознаат со досието а потоа со барања за изземање на судијката Ѓока. Тие денеска изјавија дека повторно, но по пошта, доставиле барање за нејзино изземање, но судот тврди дека нема ново барање.
-Одлуката на судот е очекувана и истата ќе ја обжалиме. Нашиот клиент Бериша е во неговиот стан. Недозволувањето комуникација со други лица е лишување од права и слободи за пратеник. За тоа е потребно овластување од Собранието, рече неговиот адвокат Генц Ѓокутај.
Сепак Бериша не е повеќе пратеник, откако парламентот по барање на СПАК му го одзеде пратеничкиот имунитет.
Нему претходно му беше изречена мерка задолжително јавување секој понеделник и четврток во судот, што ни еднаш не го испочитува, како и мерката забрана да ја напушта земјата.
Бериша е обвинет за „пасивна корупција“ и „злоупотреба на службената положба“ во врска со приватизацијата на поранешниот спортски комплекс „Партизан“ во Тирана, во која е обвинет Јамарбер Малтези, негов зет за ќерка, кој незаконски стекнал пет милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Папата Франциско ќе биде вечна инспирација

Светот изгуби исклучителен духовен водач кој ширеше љубов, мир и солидарност преку своето апостолско дело, објави денеска српскиот претседател Александар Вучиќ по повод смртта на папата Франциско, оценувајќи дека животот на папата посветен на верата, љубовта и служењето на другите треба да биде инспирација за целиот свет.
На платформата Х, Вучиќ истакна дека работата на папата Франциско за зајакнување на меѓурелигискиот дијалог и неговата посветеност на хуманизмот оставиле неизбришлива трага во историјата. „Папата Франциско беше гласник на надежта и помирувањето, секогаш во служба на најранливите, а неговото заминување е загуба и тага за сите нас, бидејќи својот живот го посвети на верата, љубовта и служењето на другите. Тој ќе биде вечна инспирација за сите нас“, рече тој.
Вучиќ, во име на граѓаните на Република Србија и во свое лично име, изрази длабоко сочувство до Римокатоличката црква и до сите верници ширум светот. „Нека му е вечна слава“, напиша тој на социјалната мрежа Икс.
Регион
Додик: Британски специјалци се дојдени во Република Српска да ме убијат

Милорад Додик, претседателот на Република Српска и осуден бегалец кој е наведен како бегалец во Федерацијата на Босна и Херцеговина, во интервју за Новости упати сериозни обвинувања.
Тој тврди дека „тројца претседатели на европски земји и еден премиер“ му кажале дека во Босна и Херцеговина е префрлена британска воена единица со многу специфична задача – негова ликвидација.
„Тоа не е класична единица. Станува збор за четириесет војници кои пристигнаа со јасна наредба – не да ме уапсат, туку да ме убијат. И тоа под изговор дека давам отпор. Мафијашки принцип – ако отстраните човек, го отстранивте проблемот. Лидерите од Европа ми го потврдија тоа. Тие не се откажаа, но засега молчат“, вели Додик.
Тој во интервјуто нагласува дека не живее во страв и дека слободно се движи, отфрлајќи ги тврдењата дека е изолиран.
„Никогаш нема да бидам скршен од политичките процеси. Нема да се откажам од борбата за Република Српска“, вели тој.
Додик открива и дека официјални лица од Брисел наводно го советувале да се засолни.
Регион
Сестри си размениле пцости, па тупаници за имотот на нивниот татко

Две сестри се степале за имотот на нивниот покоен татко! Сè експлодирало во двор во Цазин (БиХ) кога жените, откако си размениле остри зборови, почнале да си разменуваат удари. Соседите зачудено гледале како драматичниот конфликт ги вознемирува локалните жители, принудувајќи ја полицијата да интервенира.
„Прво дошло до жестока расправија во дворот од куќата на нивниот покоен татко, а потоа сето тоа прераснало во физичка пресметка“, вели еден од соседите, кој сакал да остане анонимен.
Според него, спорот настанал околу поделбата на имотот на нивниот татко – земјиште и стара рурална станбена зграда.
„Беше страшно да се гледаат две сестри како се тепаат пред луѓе кои со години ги познаваат како мирни и резервирани луѓе“, додава сосед.