Регион
Би-би-си: Дали грчката крајбрежна стража е делумно виновна за смртта на неколку стотици луѓе

Би-би-си објави дека се појавија нови докази, кои дополнително фрлаат сомнеж на верзијата на грчката крајбрежна стража за настаните во врска со потонувањето на бродот минатиот месец, во кој загинаа речиси 600 мигранти.
Двајца преживеани опишаа како крајбрежната стража извршила притисок врз нив да ги идентификуваат деветте Египќани во бродот како трговци со луѓе. Новото видео од преполниот брод што потона во морето исто така фрла сомнеж во верзијата на грчката крајбрежна стража.
Видеото е снимено кога бродот наводно бил на стабилен курс, а BBC Verify потврди дека е снимено кога крајбрежната стража тврдела дека на бродот не му треба спасување. Сервисот исто така потврди дека поголемиот брод во заднина е танкерот со нафта Faithful Warrior, од кој беше побарано да достави резерви до бродот со мигранти.
Официјалниот извештај на грчката крајбрежна стража веќе беше оспорен во извештајот на BBC Verify, но сега новинарите од овој медиум дојдоа до судски документи, кои покажуваат сериозни несогласувања помеѓу изјавите на сведоците на преживеаните земени од крајбрежната стража и доказите подоцна презентирани на судот.
Преведувач исто така го даде својот извештај за минатогодишната истрага за шверц на луѓе откако друга група мигранти беше спасена од крајбрежната стража. Тој опишува како сведоците на тој инцидент биле заплашени од крајбрежната стража.
Би-би-си наведува дека „откритијата отвораат нови прашања за тоа како грчките власти се справуваат со вакви катастрофи“ и дека и грчката крајбрежна стража и владата одбиле да ги коментираат овие наводи.
Заплашување на преживеаните?
Двајца преживеани во катастрофата велат дека грчките власти ги замолчеле и ги заплашиле мигрантите, а навестиле дека можеби крајбрежната стража е виновна за трагедијата. Изминатиов месец беа изнесени тврдења дека крајбрежната стража користела јаже за да го влече рибарскиот брод поради што бродот потонал.
„Јажето го закачија на левата страна. Сите се преселиле на десната страна на бродот за да го балансираат. Грчкиот брод бргу се придвижи поради што нашиот брод се преврте. Продолжија да го влечат доста далеку“, рече еден од двајцата преживеани, кој сакаше да остане анонимен.
Мажите опишале како поминале два часа во водата пред да бидат земени од крајбрежната стража.
Кога пристигнале на копно во Каламата, тврдат дека крајбрежната стража им кажала на преживеаните да молчат кога почнале да зборуваат за тоа како грчките власти ја предизвикале катастрофата.
„Кога луѓето одговорија дека грчката крајбрежна стража е причината, службеникот задолжен за сослушувањето побара од преведувачот да му каже на соговорникот да престане да зборува“, рече еден од преживеаните. Тој додаде дека на спасените им било кажано дека треба да бидат благодарни што не загинале.
Мажите изјавија за Би-би-си дека се плашат да зборуваат јавно да не бидат обвинети и тие како Египќаните.
Неуспешни судски случаи
Би-би-си доби и судски документи, кои го доведуваат во прашање начинот на кој се собираат докази за судењето.
Во првичните изјави на петте преживеани никој не спомна дека крајбрежната стража се обидела да го влече бродот со мигранти со јаже. Но, неколку дена подоцна пред судијата сите изјавија дека имало неуспешен обид за спасување.
Една изјава на почетокот гласеше:
„Бродот на крајбрежната стража дојде да помогне и одеднаш бродот се преврте и се најдовме во водата. Потоа не спасија со гумен чамец“.
Оваа изјава е преземена од интервјуто на грчката крајбрежна стража со преживеаните.
Меѓутоа, истото лице подоцна пред судот изјави:
„Грчкиот брод врза јаже на предниот дел на нашиот брод и почна полека да нè влече, но јажето се скина… Вториот пат кога го врзаа, првин почувствувавме дека нè влечат, а потоа ни се преврте бродот. Грчкиот брод забрза, а ние викавме на англиски: Стоп!“
BBC Verify не разговараше со овие сведоци и затоа не може да каже зошто ги смениле своите изјави.
Грчката крајбрежна стража првично негира дека го користела јажето, но подоцна го повлече тоа признавајќи дека јажето било користено. Сепак, таа изјавила дека тоа било само за да се обиде да се качи на бродот и да ја процени ситуацијата. Се вели дека имало најмалку два часа пред да се преврти рибарскиот брод.
Потврдено е дека загинале 82 лица, но Обединетите нации проценуваат дека уште околу 500 ги загубиле животите.
Грчките власти велат дека обвинетите Египќани се дел од шверцерски синџир и дека биле идентификувани од сопатници. Тие се соочуваат со доживотен затвор доколку бидат прогласени за виновни.
Преживеаните велат дека некои од деветте осомничени ги малтретирале оние што биле во бродот, а други сведоштва велат дека други, всушност, се обиделе да помогнат.
Но, преживеаните, кои разговараа со новинарите на Би-би-си изјавија дека крајбрежната стража им наредила на сите преживеани да кажат дека деветте Египќани се виновни за трговија со нив.
„Тие беа затворени и погрешно обвинети од грчките власти како обид за прикривање на злосторството“, рече еден од нив.
Заменик-обвинителот на Врховниот кривичен суд на Грција ја води истрагата, но многуте повици за меѓународна, независна истрага, вклучително и од ОН, досега се игнорирани, наведува Би-би-си.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Регион
Девојки скокнале од воз во движење бидејќи ја пропуштиле својата станица, едната е во критична состојба: хорор во Бугарија

Две девојки, на возраст од 20 и 21 година, биле итно префрлени во болница во Пловдив откако скокнале од патнички воз на линијата Софија-Бургас во близина на железничката станица „Клисура“, потврди вчера прес-центарот на Одделот за внатрешни работи во Пловдив. 20-годишната девојка се здобила со тешки повреди и е во критична состојба, објавува порталот 24chasa.bg.
Инцидентот бил пријавен во службите за итни случаи во вторник околу 13:30 часот. Според првичните информации, девојките скокнале од прозорецот додека возот се движел, објавува БНТ.
Се наведува дека тие скокнале од возот во движење бидејќи ја пропуштиле станицата од каде што требало да слезат.
Наводно, не успеале да ја отворат вратата од вагонот на време. Кога конечно успеале да го сторат тоа, решиле да скокнат, но возот веќе добивал брзина.
Покрената е прелиминарна истрага и е известено Окружното обвинителство.
Поради инцидентот, сообраќајот помеѓу станиците „Клисура“ и „Стрјама“ е привремено прекинат.
Според Антонија Иванова од прес-центарот на Универзитетската болница за активен третман „Свети Георги“ во Пловдив, состојбата на 20-годишното девојче е исклучително лоша, објавува 24chasa.bg.
„Во моментов не можам да дадам никакви дополнителни информации. Другото девојче, кое има 21 година, е хоспитализирано во клиника во здравствена установа во стабилна состојба“, рече таа.
фото: принтскрин
Регион
Дете остана без рака при експлозија на плажа кај Будва

Страшна несреќа се случи на плажа во близина на Будва, каде што вчера експлодираше боца за нуркање. Во таа прилика, едно дете беше тешко повредено.
Црногорската полиција го уапси М. Б. (45), граѓанин на Белград, кој е обвинет за предизвикување јавна опасност и нелегални активности. Според официјалните информации, осомничениот управувал со опрема за нуркање без потребната регистрација или одобрение, што, како што е наведено, ги загрозило животите на присутните.
Детонацијата се случила во непосредна близина на плажата, кога експлодирала боцата за нуркање. Делови од неа одлетале на поголемо растојание и го погодиле детето, странски државјанин, во раката, што довело до ампутирање на неговата рака. Повреденото дете веднаш било пренесено во болница.
До него, уште две лица се здобиле со полесни повреди од експлозијата и побарале медицинска помош.
На местото на настанот дошол обвинителот на Основното државно обвинителство во Котор, заедно со експерти од машинската струка, каде што била спроведена истрагата. По спроведените мерки и дејствија, М.Б. бил уапсен и приведен од надлежните органи.
Несреќата предизвика голема вознемиреност кај туристите и локалните жители, додека истрагата треба да ги утврди сите околности и одговорноста на осомничениот, пренесуваат медиумите во соседството.
Фото: принтскрин