На еден месец од почетокот на серијата од 20.000 земјотреси, ситуацијата на Санторини не е многу подобра. Не престануваат земјотресите со среден интензитет, не е исклучена опасноста од најголемиот од шест степени според Рихтеровата скала, тимови од сеизмолози и геолози ги следат промените во структурата на островот и морското дно каде „спијат“ вулканите.

Што понатаму, се прашуваат неколкуте што останаа по егзодусот на 12.000 жители кои во паника го напуштија Санторини првите денови. Признаваат замор, исцрпеност од непроспиените ноќи и денови, страв од очекување на најголемиот земјотрес, вознемиреност поради збунетоста на експертите кои и самите се во недоумица за зачестеноста и бројот на земјотреси, феномен со кој никогаш во пракса не се сретнале – а самите талкаат со понудените теории.

Загрижени се и за туристичката сезона која требаше да започне во март, но која е се понеизвесна. Првиот удар е откажувањето на приклучувањето на бродовите за крстарење, кои избраа други пристаништа поради ситуацијата на островот. Досега имало три брода за крстарење, но тешко дека нешто ќе се промени до Велигден, кој е голем празник за Санторини. До јуни, 170 бродови за крстарење беа планирани да се закотват и над 800 во текот на целата сезона, што отсекогаш бил најголемиот извор на приход на островот, бидејќи вклучува најмалку 1,5 милиони гости кои ќе се симнат накратко во текот на сезоната. Дополнително ја влошува состојбата и фактот што поради лизгање на земјиштето е блокиран пристапот кај пристаништето Антинис и што е прекината жичницата која е главното превозно средство од пристаништето до Фира.

Во моментов се повеќе агенции „замрзнуваат“ нови резервации, а во исто време се зголемува бројот на откажувања за периодот околу Велигден. Интересот од тур-операторите е значително намален, особено за резервации од САД, кој е еден од најважните пазари за островот.

На островот има 17.000 хотелски кревети и уште 40.000 во приватно сместување, со работна сила од околу 70.000 луѓе, што сега е под знак прашалник. Само угостителскиот сектор кој опфаќа 712 кафулиња и ресторани има потреба од илјадници работници, а како што стојат работите оваа сезона ќе има недостиг од работна сила. Засега нема луѓе кои изразиле желба да се вратат и да работат во Санторини во текот на летото.

Претседателката на српското Собрание Ана Брнабиќ денеска изјави дека оставката на премиерот Милош Вучевиќ ќе биде последната точка на дневниот ред на претстојната редовна седница на Народното собрание.

Брнабиќ претходно изјави дека седницата за разгледување на Предлогот за изменување и дополнување на Законот за високо образование ќе започне на 4 март.

Таа на прес-конференција во српското Собрание рече дека оставката на Вучевиќ ќе биде последната точка, бидејќи некој треба да ги брани предложените закони.

Брнабиќ изјави и дека на продолжениот ректорски колегиум и на експертската работна група двапати им понудила писмо во кое ги замолила да дојдат и да расправаат за измените на Законот за високо образование во парламентот бидејќи тоа можело да го предложи парламентот и тогаш владата немало да биде таму за да го образложи законот.

Србија вчера гласаше за европска резолуција за Украина на Генералното собрание на Обединетите нации. Сепак, претседателот Александар Вучиќ смета дека неговата земја направила грешка и требало да биде воздржана, пренесува Анадолија.

„Мислам дека Србија згреши. За тоа им се извинувам на граѓаните на Србија и јас сам ја сносам вината за тоа, бидејќи веројатно сум уморен и оптоварен и не можам да направам се“, рече Вучиќ за време на гостувањето на ТВ Хепи. Тој додаде дека Србија требаше да се воздржи при гласањето за европската резолуција за Украина, исто како што беше и при гласањето за американската резолуција.

„Што се однесува до американската резолуција, гласавме точно како што треба, се воздржавме. Според мене, требаше да се воздржиме и за европската резолуција. И како што гледате, ова го кажувам во момент кога е сосема јасно дека поради ова ќе изгубам полза или политички поени во ЕУ. Верувам дека Србија требаше да се воздржи“, рече Вучиќ.

Тој тврди дека Србија не треба да се додворува ниту на Русија, ниту на САД.

Инаку, Генералното собрание на ОН усвои резолуција подготвена од Украина и нејзините европски сојузници на третата годишнина од рускиот напад врз Украина. Резолуцијата повикува на праведен и траен мир во Украина, итен прекин на непријателствата, целосно повлекување на Русија и дипломатски напори да се спречи понатамошна ескалација.

За оваа резолуција гласаа 93 земји, 65 беа воздржани, а 18 земји беа против, вклучувајќи ги САД и Русија.