Регион
Британија не го стави Косово на дневен ред на Советот за безбедност

Велика Британија која претседава со Советот за безбедност на Обединетите нации, во август не го стави Косово на дневен ред на тоа тело. Амбасадорката на Британија во ОН, Карен Пирс изјавила дека и покрај тоа што прашањето за Косово останува важно, тоа не бара повеќе редовни седници. Шефот на српската делегација Ивица Дачиќ, изјави дека тој чекор на Лондон е насочен против интересите на Србија.
Во програмата на работата објавена на сајтот на ОН го нема Косово. Советот за безбдност, со кој во август претседава Велика Британија, ја прескокна расправата за Косово, бидејќи на претходната седница, претставниците на Шведска, Британија, Франција, САД, Полска и Холандија навеле дека е време да се промени форматот на расправа за косовската криза во седиштето на ОН.
На тоа остро се противеа Русија, Кина и Србија. Српската премиерка Ана Брнабиќ рекла за РТС дека мора да се расправа за ситуацијата на Косово и Метохија како и до сега. Според неа намерата на Лондон е политички неискрена.
Дачиќ пак нагласи дека со овој потег, Британија се ставила на страната на Приштина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ и Путин ќе се сретнат во Кина

За време на посетата на Кина, претседателот на Руската Федерација, Владимир Путин, ќе се сретне со претседателот на Србија, Александар Вучиќ, изјави за медиумите помошникот на рускиот претседател, Јуриј Ушаков.
Путин ќе биде во Кина од 31 август до 3 септември, а ќе присуствува и на церемониите по повод 80-годишнината од крајот на Втората светска војна, како и на неколку билатерални средби.
Регион
Уапсена е мајката која го оставила бебето во Белград: било заврзано во кеса

По наредба на Вишото јавно обвинителство во Белград, полицијата ја уапси А.С. (2006), мајка за која постои сомнение дека го оставила своето седумдневно бебе покрај контејнер во Земун, пренесува „Блиц“.
Жената според медиумот е обвинета за обид за тешко убиство.
Бебето го пронашол случаен минувач околу 8:20 часот утрово. Било завиткано во крпи и врзано во кеса.
Според Маја Миладиновиќ, жената што го пронашла бебето, новороденчето тивко плачело, дека нејзиниот крик звучел како „мјаукање“.
– Го шетав кучето како секое утро по улицата Дунавска во Земун кога забележав дека нешто се движи зад контејнерот. Мислев дека лази, но кога се приближив видов дека е бебе. Бебето едвај дишеше и беше сино – вели таа.
Според неа, бебето било завиткано во пешкир.
Како што објави „Блиц“, детето било оставено зад контејнерот, меѓу грмушки и на куп ѓубре.
Екипата за итни случаи го транспортирала бебето во породилиштето во Земун, пишува Танјуг.
Фото: принтскрин
Регион
Министерството за внатрешни работи на Србија: Дачиќ примил плик со три куршуми во него

Српското Министерство за внатрешни работи соопшти дека вчера во зградата на владата на Република Србија е пронајден плик адресиран до вицепремиерот и министер за внатрешни работи, Ивица Дачиќ, во кој имало три куршуми.
Сомнителната пратка е откриена вчера за време на безбедносна проверка на рендгенски уред при сортирање пошта. Истрагата утврдила дека пликот бил предаден два дена претходно во филијалата на поштата на Србија во Пожаревац.
Полицијата го идентификувала и го пронашла лицето што го доставило пакетот, а истрагата за сите околности на настанот е во тек.
Министерството соопшти дека ги презема сите законски пропишани мерки и дејства со цел да се заштити безбедноста на граѓаните и на институциите.
Фото: принтскрин