Регион
Британски амбасадор: На Западен Балкан му треба повеќе економија, а помалку политика

Британскиот амбасадор Едвард Фергусон денеска во Белград изјави дека на Западен Балкан му треба повеќе економија, а помалку политика.
„Берлинскиот процес секогаш беше фокусиран на многу конкретни цели. Кога бев амбасадор во Сараево, поминавме многу време фокусирани на изградба на автопати. Се надеваме дека земјите од Западен Балкан бргу ќе влезат во унифициран платен систем“, рече тој на панелот „Преглед на достигнувањата и перспективите на Берлинскиот процес“.
Фергусон истакна дека во изминатите шест години нема напредок во трите договори за регионалната соработка и добрососедските односи, исчезнатите лица и воените злосторства.
Тој изјави дека в година се одбележуваат 30 години од Дејтонскиот договор, геноцидот во Сребреница и акцијата „Бура“ поради што е важно земјите од регионот да најдат заеднички јазик за да продолжат напред.
Тој посочи и дека Берлинскиот процес ја помага европската интеграција на регионот и дека фокусот е на практичните работи, кои имаат цел да го подобрат животот на граѓаните.
Германската амбасадорка Анке Конрад изјави дека патот кон членството во ЕУ е „многу предизвикувачки процес“.
„Затоа го поддржуваме Берлинскиот процес, што го олеснува патот, и со нетрпение го очекуваме периодот од следните 10 години бидејќи сакаме и во ЕУ тоа да се случи многу побргу“, рече таа.
Таа посочи дека Берлинскиот процес не е замена за членството во ЕУ, туку начин земјите кандидати да ги забрзаат своите реформи, да соработуваат и да го забрзаат европскиот пат со соработка на земјите кандидати во разни области и со поддршка на земјите членки на ЕУ.
Конрад рече дека прашањата од минатото се сè уште отворени и нема консензус и дека прашање е колку ќе биде потребно да се зборува за тоа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ оди во Русија на прославата на Денот на победата, ќе се сретне со Путин

Српскиот претседател Александар Вучиќ потврди дека на 9 мај ќе отпатува за Москва, каде ќе присуствува на парадата за Денот на победата и ќе се сретне со рускиот претседател Владимир Путин, јавува Анадолија.
При гостувањето на ТВ Пинк, Вучиќ изјави дека „со гордост ќе ја претставува Србија“ на обележувањето на 80-годишнината од крајот на Втората светска војна.
„Пред осум месеци реков дека ќе одам во Москва. Ќе одам во Москва“, рече Вучиќ.
Тој додаде дека најверојатно сам ќе отпатува во руската престолнина и дека поради тоа „ќе ги прими сите удари на светот, и однадвор и од внатре“.
„Не сакам владата на Ѓуро Мацут да ја плати цената. Сакам тој да има можност правилно да соработува со Европската унија и никој да не го обвинува за ништо. Тешко дека армијата ќе оди, бидејќи би била изложена на притисоци и санкции“, рече Вучиќ.
Тој најави дека со рускиот претседател ќе разговара за новиот гасен аранжман, како и за иднината на Нафтената индустрија на Србија (НИС), која е загрозена од американските санкции поради рускиот сопственички удел.
„Мораме да го потпишеме договорот за гас до 30 мај. Мора да го решиме прашањето за нафтената компанија. Мора да разговараме и за сите други теми“, рече Вучиќ.
Тој ја најави и посетата на еврокомесарката за проширување Марта Кос на Белград на крајот на април и изрази надеж дека ќе има можност да разговара со претставници на Републиканската партија и американското раководство пред да замине за Москва.
Регион
Се запали градинка во Загреб – пожaрот избил од клима уредот

Пожар изби попладнево во градинка во Загреб.
Според информациите на хрватските медиуми, причина за избувнување на пожарот е палење на клима уредот.
Првата личност која се обидела да се справи со огнот била жена која го гаснела со ПП апарат. Во меѓувреме сите деца навреме го напуштиле објектот и биле испратени на безбедно.
Пожарот се проширил низ една од просториите, а неговото натамошно ширење го спречиле загрепските пожарникари, кои дојавата за пожарот ја добиле околу 16:55 часот.
Допрва ќе се утврдуваат околностите под кои избил пожарот во градинката.
Регион
Пленковиќ: Моето семејство е длабоко трогнато од фактот што се сретнавме со папата во неговите последни часови

Хрватскиот премиер Андреј Пленковиќ упати сочувство по повод смртта на светиот отец Франциско до кардиналот Кевин Фарел, Камерленго на Светата Римска црква.
„Во името на Владата на Република Хрватска и во мое лично име, изразувам длабоко и искрено сочувство за смртта на Светиот Отец Франциско, чиј животен и духовен пат оставија неизбришлива трага во современиот свет.
Хрватскиот народ, кој чувствува блискост и длабока почит кон папата Франциско од самиот почеток на неговиот понтификат, денес жали за загубата на човекот со вера, едноставност, понизност и сила.
Тој остави длабока трага не само на Католичката црква, туку и на меѓународната заедница. Неговиот постојан повик за солидарност, милост и блискост со исклучените, заборавените, сиромашните и болните инспирираше и поттикна милиони луѓе ширум светот на акција.
Имав особена чест да се сретнам лично со Светиот Отец вчера на Велигден, во Неговите последни часови, заедно со мојата сопруга и нашите три деца. Тоа беше краток, но длабоко трогателен момент – средба исполнета со добрина, насмевки и благослови кои ќе останат трајно врежани во сеќавањето на целото мое семејство како скапоцен подарок во моментот на збогување.
Република Хрватска и хрватските верници остануваат благодарни за сè што беше и направи папата Франциско – за Црквата, за светот и за секој од нас“, напиша Пленковиќ.