Регион
Бугарскиот министер за одбрана ќе биде разрешен оти не сака да го користи зборот војна за руската инвазија

Бугарскиот премиер Кирил Петков изјави дека ќе го смени министерот за одбрана, Стефан Јанев, по неговото одбивање да ја нарече руската инвазија војна.
Петков рече дека коалициската влада ќе се состане во текот на денот за да гласа за смената на министерот и да предложи нов министер за одбрана. Петков рече дека сите коалициски партнери се согласиле Јанев да биде отстранет од функцијата.
„Мојот министер за одбрана не може да го користи зборот операција наместо зборот војна. Не можете да кажете операција кога веќе се убиени илјадници војници од двете страни“, рече Петков.
„Интересот на Бугарија не е да ја наведнеме главата… Кога ќе видиме нешто со кое не се согласуваме, нешто толку очигледно, не можеме да молчиме“, рече Петков.
Во објава на „Фејсбук“, Јанев напиша дека е цел на напад со план да биде заменет со некој што ќе биде поотворен за одлуки што им служат на странски интереси и може да ја загрозат безбедноста на Бугарија.
Петков ја критикува неговата изјава велејќи дека ниту еден од неговите министри нема право на „своја надворешна политика, особено на „Фејсбук“ ниту, пак, верува дека неговото останување на функцијата е директно поврзано со стабилноста на владата.
Петков рече дека Бугарија, членка на ЕУ и НАТО, не е принудена да носи никакви одлуки од западните сојузници, но нагласи дека најголемата гаранција за безбедноста на црноморската земја е во единството со другите членки на ЕУ.
Петков беше принуден да објасни во декември дека Бугарија сè уште не разговарала за распоредување на силите на НАТО во земјата како одговор на трупањето руски сили на украинската граница откако Јанев објави на „Фејсбук“ дека верува оти такви сили не се потребни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Бебе старо 7 дена пронајдено покрај контејнер во Белград

Во раните утрински часови во Земун, на улицата Дунавска, покрај контејнер, пронајдено е новороденче. Како што дознава српски „Телеграф“, станува збор за бебе старо само седум дена.
Детето било завиткано во пешкир, а по пристигнувањето на брзата помош, покажувало знаци на живот. Веднаш било пренесено во Клиничката болница Земун, каде што му била укажана медицинска помош.
Повеќе информации засега не се познати.
фото: принтскрин
Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Регион
Девојки скокнале од воз во движење бидејќи ја пропуштиле својата станица, едната е во критична состојба: хорор во Бугарија

Две девојки, на возраст од 20 и 21 година, биле итно префрлени во болница во Пловдив откако скокнале од патнички воз на линијата Софија-Бургас во близина на железничката станица „Клисура“, потврди вчера прес-центарот на Одделот за внатрешни работи во Пловдив. 20-годишната девојка се здобила со тешки повреди и е во критична состојба, објавува порталот 24chasa.bg.
Инцидентот бил пријавен во службите за итни случаи во вторник околу 13:30 часот. Според првичните информации, девојките скокнале од прозорецот додека возот се движел, објавува БНТ.
Се наведува дека тие скокнале од возот во движење бидејќи ја пропуштиле станицата од каде што требало да слезат.
Наводно, не успеале да ја отворат вратата од вагонот на време. Кога конечно успеале да го сторат тоа, решиле да скокнат, но возот веќе добивал брзина.
Покрената е прелиминарна истрага и е известено Окружното обвинителство.
Поради инцидентот, сообраќајот помеѓу станиците „Клисура“ и „Стрјама“ е привремено прекинат.
Според Антонија Иванова од прес-центарот на Универзитетската болница за активен третман „Свети Георги“ во Пловдив, состојбата на 20-годишното девојче е исклучително лоша, објавува 24chasa.bg.
„Во моментов не можам да дадам никакви дополнителни информации. Другото девојче, кое има 21 година, е хоспитализирано во клиника во здравствена установа во стабилна состојба“, рече таа.
фото: принтскрин