Драгана Величковиќ (40) од Ниш, продавачка во киоскот „DMN“ во населбата Бранко Бјеговиќ, за среќа помина без повреди додека се бореше со разбојникот кој ѝ стави нож под грло и бараше да му ги даде парите.

Грабежот се случил минатата ноќ околу 23 часот, додека жената ја заменувала ќерката на работа во киоскот.

„Забележав човек со шапка и шал преку лицето како се приближува кон киоскот. Тој побара шише пиво, го ставив на пултот и се вратив во продавницата. Тој ми беше сомнителен, па го следев преку камерите, одеднаш влезе во киоскот со нож во рацете. Тој тивко ми рече ‘Ајде, дај ми ги парите, дај ми го пазарот’. Тргнав кон него за да го избркам, но тој не се откажа. Во левата рака држеше нож штоми го стави под брадата, а со десната рака претураше по киоскот барајќи пари. Се борев како лавица за да го заштитам мојот имот, не размислувајќи дека можам да ја изгубам главата. Тој ме буткаше мене, јас него, се обидував да го вклучам алармот, но не успеав, не знам колку долго тоа траеше, ми се чинеше бескрајно долго“ – кажа храбрата нишлијка.

Таа успеала да ги повика домашните на помош, па крадецот избегал.

„Киоскот е во дворот на нашата семејна куќа, каде што живееме десетмина. Го слушнаа мојот глас, а разбојникот се исплаши и избега. Мојот девер отиде по него, и јас трчав, но се лизнав и паднав. Тој зеде некои пари, но важно е дека никој не е повреден. Среќа што јас бев во продавница, а не мојата ќерка, која ја поштедив од траумата што ја преживеав“, вели Драгана.

Полицијата во Ниш соопшти дека интензивно се трага по разбојникот.