Регион
(Видео) Нови тензии во Косово: Запален полициски автомобил, судир со полицијата и прекината настава

Напнатата ситуација во српските општини Зубин Поток, Звечан и Лепосавиќ на северот од Косово која се создаде откако специјалните сили на косовската полиција и новоизбраните градоначалници во општините што Србите не ги признаваат, ескалираше попладнево кога дојде до судир меѓу собраните српски граѓани и полицијата во Звечан.
Според дописникот на РТС, се слушнале и рафали, било запалено полициско возило, а биле фрлени и шок бомби.
Припадниците на косовската полиција фрлиле солзавец пред зградата на општината за да ги растера насобраните Срби, меѓу кои има и повредени, а некои медиуми јавуваат дека во Звечан одекнале и три детонации.
Подоцна, припадници на косовската полиција влегоа во зградата на општината, оставајќи зад себе на улицата огромно количество чад од солзавец и шок бомби. Оклопни возила и специјални полициски единици се сместени пред зградата на општината.
Откако се огласија сирените за тревога, голем број граѓани се собраа на плоштадот пред општината во Лепосавиќ, а по најавата за пристигнување на специјалци го блокираа сообраќајот на главната улица од двете страни на приодот кон зградата на општината.
Неофицијално, тие добиле информација дека кон Лепосавиќ се движи конвој од неколку оклопни полициски возила. Во меѓувреме во Лепосавиќ се појавиле оклопни возила, а граѓаните поставиле барикади на патот кон градот.
Во Митровица, каде што исто така се огласиле сирените за тревога, била прекината наставата на на факултетите и во училиштата, но не беа пријавени инциденти.
„Во исто време кога се огласиле сирените, во некои делови на Митровица снемало струја. Многу тешко функционира и интернетот, како и телефонските линии,“ јавува КосСев.
Kurtijeva policija zauzima javne zgrade u K. Mitrovicu.
Vazdušna opasnost već 23 godine na Severu Kosova znači da postoji opasnost i znak je za Srbe da se okupe i nenasilno pružaju otpor.
U Kosovskoj Mitrovici grad je pust. Neko je ucenio ljude da odu na miting u BG. pic.twitter.com/i7eZ7EAxjm
— Savo Manojlovic (@SavoManojlovic) May 26, 2023
Како што дознава „Еуроњуз Србија“, припадниците на косовската полиција изутрината најпрво се обиделе да влезат во општинската зграда во Зубин Поток, за да му обезбедат влез на новиот градоначалник Албанец. Група граѓани ги спречила по што тие се повлекле.
По огласувањето на сирените за тревога, косовската полиција извести дека „им помага на градоначалниците на северните општини Звечан, Лепосавиќ и Зубин Поток да го остварат своето право на работа – во службените објекти на овие општини“.
Новоизбраните градоначалници во овие три мнозински српски општини положија заклетва на 25 мај, со што ја презедоа локалната власт на северот на Косово. Тие ги презедоа своите должности во јавни згради бидејќи во општинските згради, во кои се наоѓаат привремените општински тела кои работат во српскиот систем, не им беше дозволен пристапот.
Само во Митровица има општинска зграда која работи по косовскиот систем, а на 19 мај во неа функцијата ја презеде Ерден Атиќ од Самоопределување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вулин: Очекувам ФСБ итно да ги истражи тврдењата за звучниот топ

Потпретседателот на српската влада, Александар Вулин, за државната телевизија (РТС) изјави дека очекува доаѓање на руски разузнавачи кои треба да ги истражат тврдењата дека на 15 март во Белград било употребено звучно оружје против демонстрантите.
Вулин, поранешен шеф на цивилната разузнавачка агенција БИА и поборник за блиски односи со Русија, рече дека очекува пристигнување на делегација експерти од руската разузнавачка служба ФСБ. Тој додаде дека Русите ќе заземат јасен став дали на масовните протести бил употребен таканаречениот звучен топ.
Според него, експертите на ФСБ имаат мандат да утврдат дали е употребено звучно оружје и, доколку е така, на кој начин. „Сигурен сум дека ФСБ ќе спроведе истрага што е можно поскоро“, рече Вулин.
Тој тврди и дека Русија ја поддржува, како што наведе, борбата на Србија против она што претседателот Александар Вучиќ и највисоките државни функционери го нарекуваат обоена револуција, бидејќи суштината на меѓународното право е секој да има право на свој пат.
За време на масовниот антикорупциски протест во Белград на 15 март, насобраните им оддадоа почит на жртвите од уривањето на настрешницата на железничката станица во Нови Сад за време на 15-минутниот молк. Во тој момент се слушна ненадеен силен звук кој предизвика паника кај демонстрантите, а некои пријавија симптоми како што се болки во увото, главоболка, мачнина и дезориентација.
Некои аналитичари и сведоци тврдат дека станува збор за употреба на таканаречениот звучен топ, несмртоносно звучно оружје кое емитува насочени високофреквентни звучни бранови за контрола на толпата. Српските власти, вклучително и претседателот Александар Вучиќ, ги негираат овие обвинувања, нарекувајќи ги „гнасни лаги“ и изразија подготвеност за меѓународна истрага за да се утврди вистината.
Регион
Уапсен Црногорец, пукал низ прозорец од неговиот стан во центарот на Белград

Белградската полиција го уапси В.М. (20) државјанин на Црна Гора, кој најверојатно рано утринава околу 6 часот од прозорецот од неговиот стан пукал со пиштол.
Неофицијално, полицијата пронашла неколку чаури пред зградата
Полицијата била повикана од преплашени граѓани кои ги слушнале истрелите.
Полицијата во станот на В.М. пронашла и неколку негови пријатели кои биле пијани.
За случајот е известено надлежното обвинителство.
Регион
Малата Данка исчезна пред точно една година, нејзиното тело сѐ уште не е пронајдено

Една година по исчезнувањето на двегодишната Данка Илиќ во Бањско Поле кај Бор во Србија, а клучните докази сѐ уште ги нема. Телото на девојчето не е пронајдено, на местото на злосторството не се пронајдени биолошки траги, а обвинетите работници на „Водовод“ во Бор ги повлекле признанијата и тврдат дека биле принудени.
Во меѓувреме, како што има сомнеж, Далибор Драгиевиќ, братот на еден од осомничените, бил убиен за време на полицискиот распит. Неговиот случај е префрлен во друго обвинителство, но и по 11 месеци, никој не одговара за неговата смрт. Се поставува прашањето дали правдата ќе биде задоволена за случајот со исчезнатото девојче, пишува „Нова.рс“.
Работниците од „Водовод“ во Бор се обвинети за убиството на малата Данка, кои се товарат дека кобниот ден со службеното возило го удриле девојчето, а потоа телото го ставиле во автомобилот.
Според полицијата и Обвинителството, Данка во еден момент се освестила по што еден од осомничените наводно ја убил.
Иако осомничените првично го признале делото во полиција, подоцна на распитот во Обвинителството ги повлекле изјавите тврдејќи дека биле принудени со тепање во полициската станица. Оттука, Обвинителството остана со задача да го изгради обвинението против нив врз други докази. Тврдењата за злоупотреба при сослушувањето исто така ја доведоа во прашање веродостојноста на досега собраните докази, додека сѐ уште нема одговор на прашањето каде е телото на Данка Илиќ.
И покрај опсежното пребарување на Бањско Поле и околните села, полицијата не успеа да најде ниедна трага за локацијата на телото. Стотици полицајци со денови ја пребаруваа областа, но безуспешно.
Тие се фокусираа конкретно на депонијата, каде што осомничените претходно тврдеа дека го скриле телото. Реонот бил пребаруван неколкупати, но без никакви траги што укажуваат на присуство на девојчето.
Друго важно прашање на кое надлежните институции не нудат одговори е како е можно на местото на злосторството да нема биолошки траги од Данка Илиќ. Досега се анализирани повеќе од 500 примероци од автомобилите што ги користеле осомничените тој ден, но ниту на ниеден не е пронајдена нејзината ДНК.
Покрај неизвесноста за исчезнувањето и убиството на Данка Илиќ, контроверзно е и тоа што полициските службеници одговорни за смртта на Далибор Драгиевиќ во полициската станица во Бор сè уште не се кривично гонети. Поминаа повеќе од 11 месеци од неговата смрт, а никој не е уапсен, иако обдукцијата покажа дека се работи за насилна смрт и дека има сериозни повреди.
Далибор Драгиевиќ, да потсетиме, почина во април минатата година на распит во полициската станица во Бор. Српското МВР тогаш соопшти дека му се слошило на распитот и дека починал од природна смрт. Сепак, како што откри порталот „Радар“, Драгиевиќ бил претепан, а обдукцијата потврдила тешки физички повреди.
И покрај овие информации, до денес не е поведено обвинение ниту, пак, некој одговара за неговата смрт. Случајот првин го водело Вишото јавно обвинителство во Заечар, а подоцна е префрлен во Ниш. Драгиевиќ е брат на еден од осомничените за убиството на Данка Илиќ, што дополнително ги продлабочува сомнежите и отвора голем број прашања за работата на институциите.
Поврзаноста меѓу овие случаи и фактот дека и двата се под истрага го отвора прашањето дали некогаш одговорните ќе бидат изведени пред лицето на правдата.