Регион
(Видео) Пожарите беснеат на Балканот: во Албанија огнот стигна до брегот, од Далмација апокалиптична сцена
Пожарите беснеат во регионот. Два големи пожара во сплитско-далматинската жупанија сѐ уште не се изгаснати, пренесува „Индекс.хр“.
На тој простор досега изгореа приближно 400 хектари ниска вегетација и борова шума.
Според евиденцијата на Државниот противпожарен оперативен центар на ХВЗ, во изминатото деноноќие, од среда во 7 часот до четврток во 7 часот, во Хрватска се евидентирани 122 пожарникарски интервенции, во кои учествувале 244 противпожарни организации со 755 пожарникари и 257 противпожарни возила и 10 противпожарни авиони.
Изминативе денови во цела Црна Гора беа активни неколку пожари, а некои од нив беа и од поголеми размери.
Со оглед на тоа што повеќето од овие пожари се во населени места, командирот на Службата, Здравко Блечиќ, апелираш до мештаните да го исчистат просторот околу нивните згради.
Пожарите што го зафатија албанското крајбрежно подрачје Шенѓин се ставени под контрола, соопшти вчера Министерството за одбрана на Албанија. Противпожарните екипи се поддржани од припадници на вооружените сили, полицијата, локалните структури и два авиона Canadair од Италија, пренесува „Евроњуз.ал“.
Еден ден претходно ситуацијата во Шенѓин беше катастрофална бидејќи пламените јазици зафатија туристички комплекс. Пожарот стигна до брегот, пренесуваат медиумите во регионот.
„За среќа, нема повредени, има само материјална штета во реонот на пожарот“, се вели во соопштението на Министерството за одбрана.
Албанија има 147 противпожарни возила, 1.300 луѓе и два хеликоптера „кугар“, кои според властите не се доволни за гаснење на пожарите.
Жителите на четири населени места на островот Евија во Грција мораа да се евакуираат поради пожар што избувна на островот на 29 јули.
Како што јави „Катимерини“, противпожарните служби цела ноќ го гаснеле пожарот, кој сѐ уште гори, па жителите на Климаки, Лијани Амос, Петриес и Криези морале да се евакуираат, објави „Евроњуз“.
Шумските пожари во Грција зачестија во последните години за време на сè потопли и суви лета, што научниците го поврзуваат со климатските промени. Минатата година избувнале над 8.000 пожари, покажуваат податоците на противпожарната бригада.
Премиерот Киријакос Мицотакис рече дека Грција се соочува со многу тешко лето во однос на климатските услови.
„Ни претстои уште многу тежок месец, август, и очигледно е дека сите мораме да бидеме на готовос“, им рекол тој на министрите за време на состанокот на владата, пренесува британски „Индипендент“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес го погоди Сараево
Послаб земјотрес го потресе Сараево изутрината.
Како што соопшти Федералниот хидрометеоролошки завод во Сараево, во Центарот за сеизмологија е регистриран во 8.04 часот слаб земјотрес во областа на главниот град на Босна и Херцеговина.
Магнитудата на земјотресот била 2,2 степена според Рихтеровата скала, а интензитетот во епицентарот бил III степен според Меркалиевата скала.
Многубројни жители на Сараево пријавиле тресење на земјата на услугата EMSC.
„Кратко, но силно“, „Кратко, татнеж“, „Само мал трепет и силен звук“, „Кратко, но жестоко“, изјавија тие во своите коментари.
Регион
Ердоган ги спореди израелските напади во Газа со геноцидот во Сребреница
Турскиот претседател Реџеп Тајип Ердоган денеска по разговорот со претседавачот на Претседателството на БиХ, Денис Беќировиќ изјави дека Израел ќе одговара за злосторствата во Газа, споредувајќи ги со геноцидот во Сребреница.
„За жал, денес во Газа и на окупираните палестински територии сме сведоци на сличен масакр што беше извршен пред очите на целиот свет во Босна и Херцеговина во 1990-тите“, рече Ердоган, кој денеска го прими Беќировиќ во Истанбул.
Тој додаде дека Израел ќе биде кривично гонет за убиствата на повеќе од 41.000 Палестинци во Газа, вклучително и турскиот активист Ајсенур Езги Ејги, кој беше убиен на Западниот Брег минатата недела.
„Сторителите на геноцидот во Газа, како оние во Сребреница во 1995 година, ќе одговараат пред меѓународните судови“, рече Ердоган.
Тој потсети дека Турција ја спонзорирала Резолуцијата на ОН за осуда на геноцидот во Сребреница и дека таа земја се залага за стабилноста на Босна и Херцеговина. Тој ги повика властите во БиХ да се приклучат во борбата против движењето ФЕТО, сметајќи дека таа организација е терористичка.
Фето е движење на Фетулах Ѓулен, поранешен сојузник, а сега противник на претседателот Ердоган, кого го смета за виновен за обидот за воен удар во јули 2016 година. Беќировиќ рече дека пријателството меѓу Босна и Херцеговина и Турција е нераскинливо.
„Република Турција е докажан пријател на Босна и Херцеговина и една од најсилните членки на НАТО алијансата и затоа, меѓу другото, нејзината поддршка за Босна и Херцеговина е исклучително важна“, нагласи Беќировиќ.
Регион
Двe лица се удавија во Будва и Бар, холандски турист спаси жена и дете од разбрануваното море
Две лица се удавија во петокот вечерта во Будва и Бар, јавија денеска црногорските медиуми, повикувајќи се на полициски извори.
Едно лице се удавило во градот Дробни Пијесак кај Будва, соопшти Управата за поморска безбедност и управување со пристаништа (УПСУЛ), пренесува порталот ЦДМ. Удавеникот, како што се наведува во соопштението, бил извлечен од спасувачкиот чамец САР-5 заедно со екипажот на УПСУЛ и членови на Секторот за гранична полиција.
Претходно синоќа се удави и украинскиот државјанин О.Ј. (36) во морето кај Бар, пренесува порталот Бар инфо. Спасени биле сопругата и детето.
„Семејството на давеникот е спасено, благодарение на холандски државјанин кој скокнал во брановите за да им помогне, а потоа биле испратени во Општата болница во Бар за медицинска помош“, изјавија од полицијата за Радио Бар и Бар Инфо.
УПСУЛ предупреди дека е на сила црвен метеоролошки аларм и предупредување за многу силни ветрови кои создаваат големи бранови и силни струи.
И покрај ова предупредување, на плажите беа забележани капачи кои влегуваат во морето и на тој начин ги ризикуваат своите животи, но и животите на припадниците на службите кои ги спасуваат на многу турбулентен, карпест и непристапен терен.
Вакви и слични ситуации се повторуваат со години и, за жал, резултираат со непотребна загуба на човечки животи, а УПСУЛ ги повикува капачите да бидат многу внимателни во наредните денови за да се избегнат непотребни несреќи и давење, се заклучува во соопштението.
Од УПСУЛ потсетуваат дека граѓаните и туристите можат да се јават и да пријават каква било ризична ситуација на море директно на бесплатниот број 129 или преку мобилната апликација safesea.me.