Регион
(Видео) Позната грчка пејачка доживеа мозочен удар на концерт: колабира на сцената
Познатата грчка пејачка Маринела (86) се бори за живот кога синоќа за време на концертот се онесвести на сцената.
Според локалните медиуми, големата дама на грчката народна музика има мозочно крвавење и е во критична состојба.
Маринела, по падот, била пренесена во болница. Вознемирувачката сцена се случила веднаш по почетокот на концертот кога таа го испеала рефренот на еден од своите најголеми хитови „Јас и ти“.
„А ти, Боже мој, нè научи толку многу да сакаме“, гласи репликата по која Маринела се струполи и падна.
Музичарите веднаш притрчаа на помош додека публиката немо гледаше што се случува. Концертот веднаш беше прекинат. Еден од очевидците за грчките медиуми изјави дека Маринела не изгледала добро кога застанала на бината и дека имала изгубен поглед.
Киријаки Пападопулу, позната по уметничкото име Маринела, ја објави својата прва песна во 1957 година, а досега има снимено 66 албуми.
Учествувала на Евровизија во 1974 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На обвинетите за убиството на Данка Илиќ им е продолжен притворот: зад решетки остануваат уште 30 дена
Вишото јавно обвинителство во Заечар ги обвини Дејан Драгијевиќ и Срѓан Јанковиќ за убиство на двегодишното девојче Данка Илиќ и предложи да бидат осудени на доживотен затвор. Вишиот суд во Заечар им го продолжи притворот за нови 30 дена.
На осомничените за убиството на девојчето денеска им е одреден притвор.
Вишото јавно обвинителство во Заечар против нив поднесе обвинителен акт поради сомнение дека убиле девојче на 26 март во селото Бањско Поле. Во обвинението е вклучен и Радослав Драгијевиќ (70), таткото на обвинетиот Дејан, поради сомнение дека учествувал во преместувањето на посмртните останки на исчезнатото девојче.
Дејан Драгијевиќ и Срѓан Јанковиќ беа уапсени на 4 април и оттогаш се во притвор. По апсењето, тие наводно признале дека со службениот автомобил го удриле девојчето во Бањско Поле, но и дека Дејан, бидејќи Данка давала знаци за живот, го убил детето. Наводно, тогаш рекле и дека телото на девојчето го фрлиле во дива депонија, а два дена подоцна го префрлиле во дворот од семејната куќа во селото Злот.
Телото на девојчето, кое последен пат беше видено на 26 март, до денес не е пронајдено, иако се пребарани повеќе од 30 локации.
Регион
Автомобил паднал во бездна длабока 100 метри, едно лице загина во Босна и Херцеговина
Синоќа, едно лице загина во Бутуровиќ Поле – Лукшија, потврдија од полицијата на Херцеговско-неретванскиот кантон.
Во полиција во 19 часот била пријавена сообраќајна несреќа, во која учествувал возачот М. О. (64) од Коњиќ со автомобил „сузуки“.
Тој во еден момент го запрел автомобилот покрај патот и излегол од него по што возилото тргнало и потоа паднало во бездна длабока 100 метри, а И. К. (72) бил на совозачкото седиште.
Мажот починал на самото место, а неговото тело го извлекле припадници на полициската станица во Прењ.
М. О. е лишен од слобода по наредба на дежурниот кантонален обвинител, а преземени се сите потребни истражни мерки и дејства со цел да се утврдат сите околности на овој трагичен случај.
Регион
Борел со лидерите на Западен Балкан: Вие сте интегрален дел од иднината на Европа, членството во ЕУ е на дофат под услов да се спроведат клучните реформи
Високиот претставник на ЕУ за надворешна политика и безбедност, Жозеп Борел, беше домаќин на лидерите на Западен Балкан, на неформалниот состанок во Њујорк во средата, потврдувајќи ја посветеноста на ЕУ за поддршка на Западен Балкан во нејзината европска патека.
Како што се наведува во соопштението за печатот на Европската служба за надворешни работи (ЕЕАС), на средбата одржана на маргините на Генералното собрание на ОН, Борел истакнал дека проширувањето останува главен приоритет на ЕУ.
Тој истакна дека Западен Балкан е интегрален дел од иднината на Европа и ја нагласи важноста и силата на односот меѓу ЕУ и Западен Балкан и повтори дека членството во ЕУ е на дофат, под услов клучните реформи да се спроведат со обновен фокус.
Средбата беше и можност, како што се наведува, „да се потсетиме на потребата од решавање на постоечките билатерални спорови“.
„Високиот претставник Борел ја истакна важноста на добрососедските односи постигнати преку дијалог и компромис како суштински чекори кон интеграцијата во ЕУ. Лидерите мора да донесат храбри, стратешки одлуки за да ги унапредат своите европски аспирации“, соопшти ЕЕАС.
Борел и лидерите на Западен Балкан разговараа за важноста од зајакнување на отпорноста, нагласувајќи ја потребата од стратешко усогласување со ЕУ со цел да се зачува регионалната стабилност.
Во исто време, во соопштението се објаснува дека ваквиот годишен собир ја одразува „посветеноста на ЕУ за нашето партнерство со Западен Балкан – нашите идни земји-членки“, пренесува Танјуг.
Средбата служи и како можност за размена на мислења за прашања од заеднички интерес, надвор од проширувањето, за прашања од глобалната безбедност и стабилност.
Во соопштението за печатот се истакнува дека дискусијата била фокусирана на итните геополитички предизвици и, како што се наведува, „особено на штетното влијание на руската агресија врз Украина и напорите на Кина да го прошири своето економско влијание“.
Во соопштението се наведува дека на средбата присуствувале: претседателката на Северна Македонија, Гордана Силјановска-Давкова, претседателот на Србија, Александар Вучиќ, премиерот на Албанија, Еди Рама, претседавачот со Претседателството на Босна и Херцеговина, Денис Беќировиќ, потпретседателот на Владата на Црна Гора за надворешни и европски прашања Филип Ивановиќ, како и претседателката на Косово, Вјоса Османи.