Регион
(Видео) Српскиот владика и свештениците ослободени од притвор во Црна Гора
Епископот на Српската православна црква, Јоаникие, и осумтемина свештеници, се ослободени од притвор рано утринава, половина час пред да истече нивниот притвор од 72 часа.
Тие беа уапсени откако организираа литургија во Никшиќ во вторникот, на која присуствуваа неколку илјади верници, со што ја прекршија забраната за собири поради епидемијата на коронавирус.
Голем број на верници синоќа на улиците ја чекаа одлуката на Основното јавно обвинителство на Никшиќ, кое разгледуваше дали да ги ослободи свештениците или да им го продолжи притворот. Граѓаните ги поздравија епископите и свештениците извикувајќи „Нема да ги дадеме светците“ и „Не те даваме, владико“.
Ден по нивното апсење, дојде до судири меѓу граѓаните кои излегоа на протест и црногорската полиција која употреби солзавец и шок-бомби на протестите во Пљевља и Никшиќ. Исто така, еден од водачите на просрпскиот Демократски фронт, Андрија Мандиќ, се закани дека ќе „облечат униформи“ доколку им се продолжи притворот на владиката и свештениците.
Црногорските власти го оценија ваквиот став на Мандиќ, кој беше осуден на пет години затвор за организирање обид за пуч во Црна Гора во 2016 година, како негова манипулација со граѓаните и свесно поттикнување насилство.
И опозицијата ја осуди воената реторика на Демократскиот фронт.
Од почетокот на оваа година, Српската православна црква двапати неделно организираше протестни маршеви во сите црногорски градови, спротивставувајќи се на Законот за слобода на вероисповед, со кој се уредува сопственоста на црковниот имот. Српската православна црква тврди дека црногорската држава сака да им ги одземе црквите и манастирите со тој закон, кои таа верска заедница во Црна Гора ги има околу 700.
Откако црногорската влада воведе епидемиолошки мерки поради коронавирусот кон средината на март, СПЦ ги запре литиите, но во исто време најави дека ќе продолжи со протестите откако ситуацијата ќе се нормализира.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.