Регион
Владиката Амфилохије уапсен по литургија во Подгорица
Митрополитот црногорско-приморски Амфилохије, кој е поглавар на Српската православна црква (СПЦ) во Црна Гора, денеска бил приведен во центарот за безбедност во Подгорица.
Како што информираат српските медиуми, митрополитот бил приведен по неговата служба во црква во населбата Златица во Подгорица.
„Митрополитот е во Центарот за безбедност во Подгорица. Тој беше приведен по службата, за време на која владееше вистинска опсада пред светото место. Неколку свештеници од храмот на Христовото воскресение се исто така уапсени. Очигледно, ова е демонстрација дека во Црна Гора почнува да се применува Законот за слободата на вероисповед“, изјавил за „Вечерње новости“ еден од свештениците присутен на настанот.
Од почетокот на годината, Српската православна црква редовно организира протести во црногорските градови поради спорниот Закон за вероисповед.
Законот од декември минатата година бара сите верски заедници кои делуваат во земјата да се регистрираат и да ја докажат сопственоста над имотот што го поседувале и пред 1918 година, кога Црна Гора била присоединета кон Кралството Србија.
Српската православна црква инсистира на тоа дека целта на таквата регистрација е нејзино понижување и дека владата се обидува да го експроприра нејзиниот средновековен имот, вклучително и цркви, манастири и земјиште.
Од друга страна, црногорските властите тврдат дека законот има намера да ја доведе во ред евиденцијата на имотот на верските заедници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Тринаесетгодишно девојче од Србија ја изболо и усмртило 7-годишната сестра со нож во Германија
Во источногерманскиот град Лајпциг, седумгодишно девојче почина откако нејзината 13-годишна сестра наводно ја избодела со нож, јавува „ДПА“.
Инцидентот се случил во петокот вечерта, кога полицијата била повикана во станбена зграда во квартот, каде пронашла тешко повредено седумгодишно девојче. Девојчето било пренесено во болница, но подоцна им подлегнало на повредите.
Од полицијата потврдија дека 13-годишната сестра на девојчето моментално се лекува на специјалистичка клиника и е под надзор на психолог. Истрагата за инцидентот е во тек, а полицијата засега не открива дополнителни детали.
„Билд“ пишува дека се работи за семејство од Србија, а семејниот суд во Лајпциг би можел да нареди девојчето да биде сместено во дом.
Родителите на девојчињата наводно не биле во станот кога се случила оваа трагедија.
Регион
Граѓаните на Бугарија денес одат на седмите предвремени избори во последните четири години
Бугарските граѓани денес одат на седмите предвремени избори во последните четири години, додека поделените политички партии во земјата се борат да формираат стабилна коалиција, а гласачите стануваат сè поапатични.
Бугарија, најсиромашната членка на Европската унија и една од нејзините најкорумпирани држави, се бори со ротирачки влади од 2020 година, кога антикорупциските протести помогнаа да се собори коалицијата предводена од централнодесничарската партија ГЕРБ, објави Ројтерс.
Последните анкети покажуваат дека нема јасен победник и очигледни опции за солидна коалиција.
Гласањето завршува во 20 часот во недела, а во исто време треба да се знаат и резултатите врз основа на излезните анкети.
Конечните резултати ќе бидат познати неколку дена подоцна. Доколку не се појави неочекувано политичко партнерство или силен лидер за обединување на коалицијата, повеќето аналитичари предвидуваат дека земјата повторно ќе оди на избори на почетокот на следната година.
Бугарскиот претседател Румен Радев и даде мандат на ГЕРБ да формира влада по последните избори во јуни, на кои партијата освои најмногу гласови и обезбеди 68 места во 240-члениот парламент.
ГЕРБ, сепак, не успеа да формира мнозинска коалиција.
Мандатот потоа им беше понуден на другите партии, но и тие не успеаја да направат мнозинска коалиција, поради што беа организирани нови избори.
Анкетата објавена деновиве од агенцијата за истражување на јавното мислење Алфа Рисрч покажа дека ГЕРБ води со 26,5 отсто од гласовите.
Реформистичката партија Продолжуваме со промени (ПП) има 14,9 отсто, а ултранационалистичката проруска партија Препород со 14,2 отсто од гласовите.
Според Алфа Рисрч, се очекува излезноста да биде меѓу 30 и 32 отсто. Тоа е пад од повеќе од 75 отсто во однос на 1990-тите и околу 50 отсто од пред само три години.
Регион
Фон дер Лајен: Црна Гора многу напреднала на својот европски пат
Претседателката на Европската комисија, Урсула фон дер Лајен денеска во Подгорица изјави дека Црна Гора многу напреднала на својот европски пат и затвора поглавје по поглавје во преговорите.
Таа се сретна со црногорскиот премиер Милојко Спајиќ и со претседателот Јаков Милатовиќ.
„Црна Гора многу напреднала на својот европски пат. Сега затвораме поглавје по поглавје (од преговорите). Можете да го поминете целиот пат“, напиша Фон дер Лејен на својот профил на Икс.
Таа додаде дека се очекува земјава да добие над 380 милиони евра од Планот за раст за Западен Балкан, почнувајќи од 27 милиони евра до крајот на годинава.
„Имате добра причина да бидете горди на постигнатото, до крајот на годината можете да затворите четири поглавја“, рече Фон дер Лајен на прес-конференцијата по средбата со Спајиќ, цитирана од црногорската национална ТВ РТЦГ.
„Подготвени сме да понудиме секаков вид помош“, додаде таа.
Фон дер Лајен на 23 октомври ја почна својата турнеја низ земјите од Западен Балкан. Таа ги посети Албанија, Босна и Херцеговина, Србија, Република Северна Македонија и Косово. Црна Гора е нејзината последна станица.