Регион
Влегол во училиштето и на големиот одмор нападнал ученик во Зеница

Ученик од трети клас во средното мешано индустриско училиште во Зеница, кој вчера попладне беше нападнат и повреден во училницата за време на одмор, се здобил со полесни повреди – потврди за Фена портпаролот на Полициската управа на МВР на Зеничко-добојскиот кантон, Самир Валентиќ.
Ученикот бил нападнат од 21-годишниот А.К од Зеница, кој ја искористил долгата пауза и влегол во училиштето со поголема група ученици.
– Напаѓачот се распрашувал наоколу и го барал ученикот И.М. (18), со кој наводно и претходно имал вербална расправија на социјалните мрежи. Го нападнал во една од училниците и го повредил. Во продолжение на истрагата, припадници на Одделот за криминалистичка полиција ќе го сослушаат осомничениот за нападот, кој ќе биде приведен или повикан да даде изјава во службени простории – најави Валентиќ.
Директорот на училиштето, Селведин Ботиќ, кој работи во училиштето од 2008 година, истакнува дека не памети нешто слично да се случило во истото училиште.
– За жал, очигледно е дека некои работи ниту може да се предвидат, ниту да се спречат. Училиштето е затворено, освен на долгиот одмор, но според моите информации имало тројца напаѓачи, од кои едниот влегол во училницата и го нападнал нашиот ученик. Останатите двајца беа во салата, според информациите што ни ги презентираа учениците. Нападот беше прекинат откако нашата наставничка влезе во училницата, со оглед на тоа што инцидентот се случи на крајот на долгиот одмор – вели Ботиќ.
Училиштето, додаде тој, ги презело сите неопходни чекори и за настанот ја известило полицијата и Итната медицинска помош, кои му укажале помош и го испратиле на дополнителни испитувања за да се утврди степенот на повредите.
– Ги известивме и родителите на нападнатиот ученик, кои исто така дојдоа. Ученикот отишол дома по укажаната лекарска помош – истакнува Ботиќ.
Тој најавува дека во текот на денот ќе испрати писмо до Министерството за образование, наука, култура и спорт на ЗДК во кое ќе предложи некои дополнителни мерки за заштита на учениците и наставниците.
На почетокот на второто полугодие, Министерството испрати допис до сите основни и средни училишта во тој кантон со наредба за заклучување на училишните простории за време на наставата. Училиштата се отклучуваат само за време на долгиот одмор.
– Напаѓачот го искористи тој факт и влегол во училиштето на долгиот одмор. „Се сомневам дека целта на овој напад беше да се покаже дека некои мерки не функционираат и дека е невозможно да се спроведат“, вели Ботиќ.
Ботиќ потсетува дека во некои групи на социјалните мрежи, учениците, пред се од средните училишта, најавија протести против затворањето на училиштата, сметајќи дека таквите мерки се напад на нивниот интегритет.
Училиштето, рече тој, постапува според претходно утврдениот Протокол за спречување на насилство во училиштата на ЗДК.
– Училиштето има креирано и внатрешен протокол за контрола на пристап до училишните простории во кој точно се дефинирани обврските на сите учесници во спроведувањето на мерките од тој протокол. Упатството е поставено на видно место, на огласната табла на влезот во училиштето – вели Ботиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Регион
Девојки скокнале од воз во движење бидејќи ја пропуштиле својата станица, едната е во критична состојба: хорор во Бугарија

Две девојки, на возраст од 20 и 21 година, биле итно префрлени во болница во Пловдив откако скокнале од патнички воз на линијата Софија-Бургас во близина на железничката станица „Клисура“, потврди вчера прес-центарот на Одделот за внатрешни работи во Пловдив. 20-годишната девојка се здобила со тешки повреди и е во критична состојба, објавува порталот 24chasa.bg.
Инцидентот бил пријавен во службите за итни случаи во вторник околу 13:30 часот. Според првичните информации, девојките скокнале од прозорецот додека возот се движел, објавува БНТ.
Се наведува дека тие скокнале од возот во движење бидејќи ја пропуштиле станицата од каде што требало да слезат.
Наводно, не успеале да ја отворат вратата од вагонот на време. Кога конечно успеале да го сторат тоа, решиле да скокнат, но возот веќе добивал брзина.
Покрената е прелиминарна истрага и е известено Окружното обвинителство.
Поради инцидентот, сообраќајот помеѓу станиците „Клисура“ и „Стрјама“ е привремено прекинат.
Според Антонија Иванова од прес-центарот на Универзитетската болница за активен третман „Свети Георги“ во Пловдив, состојбата на 20-годишното девојче е исклучително лоша, објавува 24chasa.bg.
„Во моментов не можам да дадам никакви дополнителни информации. Другото девојче, кое има 21 година, е хоспитализирано во клиника во здравствена установа во стабилна состојба“, рече таа.
фото: принтскрин
Регион
Дете остана без рака при експлозија на плажа кај Будва

Страшна несреќа се случи на плажа во близина на Будва, каде што вчера експлодираше боца за нуркање. Во таа прилика, едно дете беше тешко повредено.
Црногорската полиција го уапси М. Б. (45), граѓанин на Белград, кој е обвинет за предизвикување јавна опасност и нелегални активности. Според официјалните информации, осомничениот управувал со опрема за нуркање без потребната регистрација или одобрение, што, како што е наведено, ги загрозило животите на присутните.
Детонацијата се случила во непосредна близина на плажата, кога експлодирала боцата за нуркање. Делови од неа одлетале на поголемо растојание и го погодиле детето, странски државјанин, во раката, што довело до ампутирање на неговата рака. Повреденото дете веднаш било пренесено во болница.
До него, уште две лица се здобиле со полесни повреди од експлозијата и побарале медицинска помош.
На местото на настанот дошол обвинителот на Основното државно обвинителство во Котор, заедно со експерти од машинската струка, каде што била спроведена истрагата. По спроведените мерки и дејствија, М.Б. бил уапсен и приведен од надлежните органи.
Несреќата предизвика голема вознемиреност кај туристите и локалните жители, додека истрагата треба да ги утврди сите околности и одговорноста на осомничениот, пренесуваат медиумите во соседството.
Фото: принтскрин