Регион
Во БиХ почна вакцинацијата со „спутник В“, прв се вакцинираше директор на Клиника
Во Босна и Херцеговина денеска почна вакцинацијата против коронавирусот, а првите дози на вакцината „спутник В“ од руско производство ги примија директорот на Клиничкиот центар во Бања Лука и локалните здравствени работници.
Во телевизиски пренос во живо на јавниот сервис на Република Српска, директорот на КЦ, Владо Џајиќ, ја прими првата доза на вакцина, а после тоа беа вакцинирани уште околу седумдесеттина вработени во клиничкиот центар во Бања Лука.
„Цела година ја чекавме вакцината, но сега веруваме во нејзините резултати“, рече Џајиќ, додавајќи дека тој се вакцинирал прв за да покажел со личен пример дека вакцината е сигурна и дека нема причина да се стравува од несакани ефекти.
Директорот на болницата во Бања Лука и неговите вработени ја примиле вакцината од првата пратка од 2.000 дози, што беше испорачана од Русија пред околу десетина дена, со цел да се потврди нејзината исправност во лабораторија во БиХ.
Министерот за здравство на РС, Ален Шераниќ, рече дека тој, исто така, ќе се вакцинира штом пристигнат дополнителни дози од веќе купената вакцина, нагласувајќи дека е постигната најдобра можна цена на пазарот.
Првите дози на „спутник В“ беа доставени во БиХ врз основа на посебен договор склучен од властите на РС со рускиот производител. Тие нарачаа вкупно 400.000 вакцини доволни за вакцинирање на 200.000 луѓе. Властите во Бања Лука очекуваат испорака на до 100.000 дози на руската вакцина до крајот на овој месец.
Властите на Федерацијата БиХ сè уште очекуваат вакцина од западните производители и се надеваат дека првите дози од вакцината „Фајзер“ ќе стигнат следната недела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Ројтерс“: Нафтата за Србија заглави во Хрватска, американските санкции го блокираа танкерот на НИС
Американските санкции воведени против Нафтната индустрија на Србија (НИС), која е во мнозинска руска сопственост, ја спречиле клучната испорака на сурова нафта, што може да доведе до запирање на единствената рафинерија во земјата доколку не се обезбедат нови залихи, пренесе „Ројтерс“, цитира „Индекс“.
Според неименувани извори запознаени со ситуацијата, Србија има само уште неколку дена пред рафинеријата на НИС во Панчево да мора да го прекине процесот на преработка на сурова нафта. Од компанијата не дале коментар.
Претседателот Александар Вучиќ уште на 9 октомври предупреди дека рафинеријата, која снабдува голем дел од пазарот со горива, вклучувајќи бензин и авио-гориво, ќе има тешкотии по 1 ноември. Сепак, Вучиќ порача дека складиштата се полни и дека постојните резерви ќе бидат доволни до крајот на годината.
„Нема да има недостиг од сурова нафта, нејзини деривати ниту енергетска криза“, изјави тој минатата недела.
Испораката запрена во Хрватска
Како што наведува „Ројтерс“, танкерот Maran Helios, кој превезувал околу еден милион барели казахстанска сурова нафта (KEBCO) за НИС, пристигнал во хрватското пристаниште Омишал на 9 октомври — токму на денот кога стапиле во сила санкциите. Меѓутоа, товарот никогаш не стигнал до Србија.
Хрватскиот оператор „Јанаф“ соопштил дека до 8 октомври ја испорачал целата нафта што се наоѓала во неговиот систем и била во сопственост на НИС, и дека по тој датум немало нови испораки за Србија.
Ова, според агенцијата, укажува дека казахстанската нафта купена од НИС воопшто не била примена во системот. „Ројтерс“ не успеал да потврди дали товарот, кој бил истоварен во вторникот по две недели чекање пред пристаништето, е складиран во Омишал или препродаден на друг купувач.
Можна енергетска криза во Србија
Блокираната пратка на сурова нафта би била доволна за работа на рафинеријата во Панчево околу десет дена. Иако моменталните резерви се речиси целосни, нивното намалување ќе ја направи Србија сè позависна од увоз.
Русија и Србија, како што наведува „Ројтерс“, се обидуваат да најдат решение со кое би се укинале американските санкции што стапија на сила по истекот на последното изземање.
„За мене тоа не е прашање. Рафинеријата мора да работи, а бензинските пумпи мора да останат оперативни“, изјавила за „Ројтерс“ Надежда Кокотовиќ, поранешна раководителка на канцеларијата на НИС за односи со Европската унија.
Регион
Словенечката влада во криза поради смртта на маж претепан пред локал
Словенечката јавност е потресена поради трагичниот настан во Ново Место, каде што во петокот вечерта 48-годишен маж бил претепан до смрт пред угостителски објект на улицата Розманова.
Според првичните информации, жртвата дошла да го земе својот син, кој претходно ја повикал полицијата поради закани од група млади лица. Полицијата уапсила 21-годишен осомничен од општината Шентјернеј, а како што изјавил Матјаж Штерн од криминалистичката полиција, „поводот бил неколку изговорени зборови“. Против осомничениот ќе биде поднесена кривична пријава за тешки телесни повреди со смртна последица, дело за кое е предвидена казна од 5 до 15 години затвор, пренесува „Индекс“
Директорот на Полициската управа Ново Место, Игор Јуршич, изразил сочувство до семејството и најавил засилено полициско присуство во наредните денови.
„Не очекуваме ескалација, но сме подготвени на сите сценарија“, изјавил Јуршич, пренесува „Индекс“.
Оставки на двајца министри и кризен состанок
Премиерот Роберт Голоб свикал итен состанок на државниот врв, по кој министерката за правда Андреја Катиќ и министерот за внатрешни работи Боштјан Поклукар поднеле оставки. Тие навеле дека заминуваат поради објективна одговорност и желба да придонесат за смирување на напнатата ситуација.
„Секое насилство е неприфатливо. Преземам одговорност и поднесувам оставка“, изјавил Поклукар, додека Катиќ додала: „Секој мора да размисли за својата одговорност – јас тоа го направив“.
Голоб: Луѓето имаат право на безбедност
Премиерот Голоб изразил сочувство до семејството на жртвата и најавил нов пакет законски мерки за подобрување на безбедноста во земјата.
„Луѓето имаат право на сигурност, а тоа право вчера не беше исполнето. Виновникот ќе одговара, но не смееме болката да ја претвориме во омраза или одмазда“, изјавил Голоб, одбивајќи ги повиците на опозицијата за негова оставка.
Остра реакција на опозицијата
Опозициските партии ја обвинија владата за неефикасност. Од СДС порачаа дека премиерот Голоб и неговата коалиција „индиректно ја имаат оваа смрт на совест“, барајќи оставка на целата влада. Сличен став изразија и НСи, како и лидерот на Демократите, Анже Логар, кој изјави дека министерот за внатрешни работи „повеќе нема легитимитет“.
Повик за смиреност и осуда на насилството
Советот за национална безбедност предложил засилено полициско присуство во Ново Место. Државниот секретар Војко Волк истакнал дека „кога некој ќе изврши кривично дело, тоа е криминалец – без разлика дали е Ром или Словенец“.
Претседателката на државата Наташа Пирц Мусар свикала итна седница на парламентот и апелирала трагедијата да не се користи за политички поени.
„Ни треба трезвена и одговорна расправа“, рекла таа.
Реагирале и ромските здруженија – Јожек Хорват Муч, претседател на Советот на ромската заедница, го осудил убиството и повикал на соживот, додека Дарко Рудаш од Форумот на ромските советници нагласил дека „насилството нема националност“ и побарал поголема полициска видливост за сигурност на сите граѓани.
Регион
(Видео) Инцидент во Приштина: Пратеник нападна минувач кој му дофрли „Сите лажете“ додека даваше интервју
Пратеникот на Демократскиот сојуз на Косово (ДСК), Арменд Земај, физички нападнал случаен минувач на плоштадот во Приштина додека давал изјава за медиумите, јавија косовските медиуми.
Инцидентот се случил кога минувач му довикнал „лажго“ и „сите лажете“, по што дошло до вербална расправија што прераснала во физички судир. Косовската полиција го потврди случајот, а снимката од тепачката предизвика бројни реакции на социјалните мрежи.
Демократскиот сојуз на Косово го осуди нападот, нарекувајќи го „сериозно нарушување на институционалното достоинство“.
Подоцна, Земај се извини на својот профил на „Фејсбук“, велејќи дека реагирал во „емоционална состојба“ и дека неговиот чин не ги претставува вредностите што ги застапува. „Насилството, без разлика на провокацијата, никогаш не е вистинскиот одговор“, напиша пратеникот.
🇽🇰 Opposition MP Armend Zemaj (LDK) beat up a Vetevendosje supporter from the diaspora who called him a liar during a live interview. pic.twitter.com/AjQpTwe3py
— kos_data (@kos_data) October 25, 2025

