Регион
Во Грција почнува 24-часовен штрајк, синдикатите бараат зголемување на платите

Во Грција денеска почнува 24-часовен штрајк, а синдикатите ќе бараат зголемување на платите на неколкуте планирани протести во градовите низ земјата, пишува Катимерини.
Се очекува штрајкот да влијае на владините операции, училиштата, болниците и јавниот транспорт, вклучувајќи ги железничките услуги и островските фериботи.
Лидерите на синдикатот ја обвинија владата на премиерот Киријакос Мицотакис дека не го решила проблемот со инфлацијата и зголемените трошоци за живот.
„Трошоците за живот се многу високи и нашите плати се на пониско ниво, додека високите трошоци за домување ги ставија младите во трагична положба“, рече Јанис Панагопулос, водач на главниот синдикат на приватниот сектор, ГСЕЕ.
Како и другите работнички групи, ГСЕЕ ја обвини владата дека „одбила да преземе какви било значајни мерки што ќе им обезбедат на работниците достоинствени услови за живот“, пишува „Гардијан“.
Минималната плата во Грција е 900 евра, додека цените на мало, телекомуникациите и енергијата во земјата се меѓу највисоките во Европа, а левичарската опозиција тврди дека граѓаните плаќаат „британски цени за бугарските плати“.
Митотакис неодамна вети дека ќе ја зголеми минималната плата на 950 евра, но имајќи предвид дека и трошоците за домување се во пораст, критичарите тврдат дека тоа не е доволно, пренесува Танјуг.
Во исто време, агенциите за кредитен рејтинг ја пофалија владата на Мицотакис за фискалните реформи кои доведоа до враќање на статусот на земјата на инвестициска оценка, додека Грција, исто така, ги надмина другите земји-членки на ЕУ во однос на економскиот раст.
Грција забележа една од највисоките стапки на раст во Европа, а ММФ предвидува дека економијата на земјата ќе порасне за 2,3 отсто во 2024 година, додека невработеноста е намалена од 30 на 8,3 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин