Регион
Во Словенија расте водостојот на реките, се стравува од поплави и одрони, некои од граѓаните евакуирани

Водостојот на реките во Словенија продолжува да расте, особено во северните и источните делови на земјата. Водостојот се зголемува и во оние речни сливови кои беа погодени од претходните поплави. Агенцијата за животна средина на Република Словенија (Арсо) издаде портокалово предупредување за целата земја, освен за северозападниот дел кој е обоен во жолта боја.
Одредени помали реки во централниот дел на земјата веќе би можеле ненадејно да се издигнат во текот на ноќта. Поради променетите услови за одводнување по последните поплави на делниците каде што се сменети речните текови и корита, како и места каде се уште има наноси од одрони, дождовницата ќе тече поинаку од вообичаено.
Геолошкиот завод на Словенија предупредува на зголемен ризик од реактивирање на свлечишта во областите каде што тие беа активирани за време на неодамнешната катастрофа, пишува Дело. Невреме со обилни врнежи од дожд и ветер веќе вчера правеше проблеми. Во општина Копер силен ветер го оштети покривот на основното училиште Шмарје и покриената трибина на стадионот Бонифика.
Во главниот град водата поплави неколку подруми и патишта, а некои возачи мораа да бидат спасени од поплавените подвозници. Мештаните се особено загрижени поради лизгање на земјиштето. Во областа Шкофјело превентивно се евакуирани дел од граѓаните.
Командантот на словенечката цивилна заштита Сречко Шестан повтори дека припадниците на цивилната одбрана се на готовност. Иако прогнозата за денеска е подобра, тој им препорача на граѓаните да бидат внимателни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Успеавме да ги одложиме санкциите на САД врз српската нафтена индустрија

Српскиот претседател Александар Вучиќ денес изјави дека САД го одложиле воведувањето санкции против Нафтената индустрија на Србија (НИС) за осум дена со цел, како што рече, „за да покажат почит кон Србија“.
„Им благодарам, сакаа да покажат почит, да ни кажат дека нè слушаат и ја разбираат нашата позиција. Благодарам за тоа, но дали добивме нешто суштинско? За седум дена, ќе го имаме истото прашање, а јас сè уште нема да го имам одговорот“, рече Вучиќ во Обреновац, каде што учествуваше на граѓанскиот марш против блокадите.
Тој додаде дека ќе има реакција од Србија и од самата НИС и кон американската страна и кон другите партнери кога станува збор за нови понуди.
„Верувам дека ова е добро, но дали ќе биде доволно и дали ова е она што го сакаат Американците – ќе видиме“, рече Вучиќ.
Санкциите на САД против НИС требаше да стапат во сила на 1 октомври, но рокот сега е одложен барем до 9 октомври.
фото: принтскрин
Регион
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Регион
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.