Регион
Вучиќ: Многу чудна одлука од ЕУ, Србија е во ужасна положба

Српскиот претседател, Александар Вучиќ, гостуваше во емисијата „Прва тема“ на српската ТВ Прва.
На почетокот на емисијата, одговарајќи на прашање за притисокот врз Србија да воведе санкции кон Русија и дали имало таков притисок во претходните денови при разговорите со европскиот канцелар и германската министерка, тој рече дека не може да зборува на таков начин – за што разговарал со нив, бидејќи не би било фер да се дадат детали од разговорите.
„Србија е во многу тешка ситуација и тешка положба, а тоа не е само политичка одлука и само политика, тоа е во суштина и економија. Не можам да ја сокријам таквата загриженост дури и да сакам“, рече Вучиќ. Тој нагласи дека последната одлука на Европскиот совет е тешка за Србија и дека е многу чудна.
Европскиот совет донесе одлука за санкции против Русија, во кои е вклучена и руската компанија „Гаспромњефт“, што Србија ја става во многу компликувана ситуација доколку не биде изземена.
„Бараме решенија. Денес луѓето од мојот кабинет имаа видеоконференција со партнерите од ЕУ. Не се работи само за увоз на нафта. Ние немаме сопствена нафта. Станува збор за евентуален увоз на хемикалии што и се потребни на рафинеријата, а ние веќе немаме право“, рече Вучиќ.
Според српскиот претседател, денеска ситуацијата е потешка отколку во 2013 година, кога имаше голем притисок Косово да стане членка на ОН и албанската полиција да биде присутна во мнозинство на северот на Косово.
„Од тие неколку ноќи, можам книга да напишам. Имаше голем притисок“, рече Вучиќ.
Според него, ситуацијата денеска е потешка отколку тогаш.
„Се плашам дека само ќе се влошува. Тоа значи дека ќе ни биде многу тешко. Нашата позиција вечерва, во овој момент е ужасна. Мораме да се справиме со прашањето за нафтата. Мораме да се справиме со тоа дали ќе ги имаме хемикалиите кои се користат во рафинериите. Врз основа на одлуката на Европскиот совет не можеме да увезуваме. Ќе го наполниме и последниот магацин до врв. Веќе немаме ни магацини. Мора да работиме на тоа во иднина“, истакна тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Грција го усвои контроверзниот закон – отворен патот за 13-часовно работно време

Грчкиот парламент денес го усвои новиот закон за труд, кој предизвика бурни реакции и протести во целата земја. Со 158 гласа „за“ и 109 „против“ владиниот предлог беше изгласан, а левичарската опозициска партија СИРИЗА одби да учествува во гласањето.
Законот, кој според владата има цел да го направи пазарот на труд поприспособлив и поефикасен, им овозможува на работодавците во приватниот сектор да бараат од своите вработени да работат до 13 часа дневно наместо досегашните осум. Продолженото работно време може да се применува најмногу 37 дена годишно, а работниците се заштитени од отказ доколку одбијат да работат прекувремено.
Владата тврди дека со новите правила се зголемуваат флексибилноста и заштитата на работниците, особено оние со семејства, и дека законот дозволува четиридневна работна недела доколку има претходен договор меѓу работодавецот и вработениот.
Меѓутоа, синдикатите и опозицијата остро реагираа предупредувајќи дека реформата ја укинува суштината на осумчасовниот работен ден и ја легализира прекумерната експлоатација. Синдикатот на државните службеници ADEDY порача дека „флексибилното работно време во пракса значи уништување на семејниот и на општествениот живот и укинување на работничките права“.
Синдикатите потсетуваат и дека просечните плати во Грција се значително пониски од европскиот просек, а нерегистрираниот труд и натаму е голем проблем. Опозициските партии оценија дека законот е застарен и спротивен на европските тенденции за скратување на работното време и воведување пократка, но поквалитетна работна недела.
Новите одредби предвидуваат и поголема флексибилност при вработувања на определено време, со цел, како што наведува Министерството за труд, да се стимулираат продуктивноста и модернизацијата на пазарот на труд.
И покрај уверувањата на владата дека законот ќе ги заштити работниците и ќе овозможи подобра рамнотежа меѓу работа и приватен живот, јавноста останува поделена.
Регион
Вулин до фон дер Лајен: Побрзо ќе ја прифатите Турција во ЕУ отколку Србија да ја предаде Русија

Александар Вулин, кој во минатото извршуваше голем број важни функции во Србија, ги коментираше изјавите дадени од претседателката на Европската комисија, Урсула фон дер Лајен, за време на нејзината посета на Белград.
„Очекувам Европската Унија целосно да се усогласи со политиката на Србија, вклучително и повлекување на признавањето на таканареченото Косово, како и итно повлекување на сите одлуки што го кршат Дејтонскиот договор и ги намалуваат овластувањата на Република Српска. Госпоѓо фон дер Лајен, никој не нè праша дали сакаме да се впуштиме во авантурата за приклучување кон Европската Унија, но ви гарантирам дека ќе најдеме начин да ја прашаме Србија што мисли за продолжување на авантурата. И да не заборавам, попрво вие ќе ја примите Турција во Европската Унија отколку Србија да ја предаде Русија“, рече Вулин, пренесува „Телеграф“.
Фон дер Лајен разговараше со српскиот претседател Александар Вучиќ во Белград. На заедничката прес-конференција таа рече дека очекува Србија „да го започне својот пат кон Европската Унија двапати побрзо“.
„Нашите позиции се јасни и вклучуваат слобода, а не репресија, вклучително и право на мирно собирање, партнерство, а не потчинување, дипломатија, а не агресија“, нагласи фон дер Лајен, оценувајќи дека „сега е вистинското време Србија да преземе чекори кон пристапување“.
„Вреди да се вложи овој напор бидејќи се приближувате до целта. Потребно е да се забрзаат реформите во владеењето на правото, електронските медиуми, изборните закони и хармонизацијата со надворешната политика на Европската Унија“, изјави таа, истакнувајќи дека овие реформи бараат упорност, трпение, учество на сите сегменти од општеството и политичкиот спектар.
Регион
Вучиќ: Ова ќе биде тешка политичка зима за нас; Фон дер Лајен: Сметајте на ЕУ

Српскиот претседател Александар Вучиќ и претседателката на Европската комисија, Урсула фон дер Лајен, се обратија на јавноста по тет-а-тет средбата во Белград и одговорија на прашања од новинарите.
„Особено ми е драго што имавме можност да бидеме домаќини на претседателката на Европската комисија. Особено сум ѝ благодарен бидејќи таа дојде на територијата на Србија во неколку наврати, не само во нејзиниот главен град. За Србија, членството во ЕУ е стратешка определба и приоритет на надворешната политика. И тоа нема да се промени. Не сме отвориле ниту едно поглавје, ниту еден кластер од почетокот на конфликтот во Украина. Верувам дека она што е направено во однос на регулаторните агенции, избирачките списоци, ќе наиде на позитивна оценка. Сега се соочуваме со тешка ситуација. НИС е под американски санкции, а де факто е и под европски санкции.
Се надевам дека ќе ги имаме поддршката и помошта од ЕУ. Се надевам дека ЕК ќе најде начин да им олесни на земјите кандидатки. Обезбедивме доволни количини нафта и гас.
„Ќе биде тешка политичка зима за нас, во овој поглед ќе соработуваме тесно со луѓе од Европската Унија“, рече Вучиќ.
„Не дадовме многу оптимистички изјави за пристапувањето кон ЕУ.“ Денес не можам ништо да ветам, освен дека ќе работиме напорно и ќе се жртвуваме и се надевам дека ќе ја имаме поддршката од ЕУ за сето ова и дека ќе нè слушнат во Брисел. Не е толку едноставно. Знаете кои се двете клучни прашања за нас“, рече Вучиќ.
Тој рече дека разговарале и за зачувување на мирот и стабилноста во регионот, за дијалогот меѓу Белград и Приштина.
„Ќе кажам дека за танго се потребни двајца“, рече Вучиќ.
Претседателката на Европската комисија, Урсула фон дер Лајен, рече дека Србија може да продолжи да смета на Европската Унија.
„Србија го направи изборот да се приклучи на ЕУ и очекуваме Србија да го продолжи својот пат двојно побргу. Земете ја како пример енергетската криза во 2022 година, која имаше драстичен ефект и ние се соочивме со неа. Можете да продолжите да сметате на нас“, рече Фон дер Лајен и продолжи:
„Ја поврзуваме Србија со пазарот на енергија. Ја поканивме Србија да се приклучи на механизмот на ЕУ за набавка на гас. Треба да видиме напредок во областа на владеењето на правото, електронските медиуми. Сакам да го поздравам напредокот во врска со избирачките списоци и РЕМ. Би ве поканила да дојдете во Брисел за еден месец за да видите како стојат работите. Морам да ве пофалам за 61-процентно усогласување на надворешната политика со ЕУ. Како дел од планот за раст, формиравте надзорен комитет. Мислам дека тоа е одличен сигнал“.
На прашањето каде го гледа решението за моментната политичка ситуација во Србија, Фон дер Лајен вели:
„Ова е секако клучен момент за Србија. Време е целата нација да се обедини. ЕУ е подготвена да ве поддржи, целиот процес на пристапување е за тоа. Секој треба да учествува во процесот на реформи. Владата соработуваше со организациите на граѓанското општество. Медиумите и изборната реформа се нешто што ги интересира сите. Имплементацијата е најважна“.
Фото: принтскрин