Српскиот претседател, Александар Вучиќ, побара од ЕУ да ги стави земјите од Западен Балкан на заедничката листа на земји од ЕУ кога станува збор за цените на енергијата.

Вучиќ кој присуствуваше на пуштањето на гасниот интерконектор меѓу Бугарија и Грција, рече дека настанот е од големо значење за Србија бидејќи земјата ја почна изградбата на интерконектор со Бугарија.

„Се надевам дека во 2023 година ќе можеме да одржиме голема церемонија“, рече Вучиќ.

Тој посочи дека претстојната есен и уште потешка зима ќе бидат тешки за сите кога станува збор за цените и обезбедувањето доволни количества енергија и побара, обраќајќи и’ се на претседателката на Европската комисија Урсула фон дер Лајен, да се стават земјите од Западен Балкан на заедничка листа со земјите од ЕУ.

„Драга Урсула, не го слушајте 100 проценти мојот пријател Киријакос Мицотакис и не ги повторувајте 100 посто мерките од ерата на борбата против Ковид – благодарни сме за вашата поддршка, но кога зборуваме за пари, не можеме да ги апсорбираме овие цени на енергентите. Затоа ве молам вклучете го Западен Балкан на тој список заедно со другите од ЕУ и знам дека мојот пријател Мицотакис ќе се согласи нашите земји од Западен Балкан да ги ставите на ист список со земјите од ЕУ кога се во прашање цените и ќе бидеме бескрајно благодарни“, рече Вучиќ.

Мицотакис истакна дека земјите од ЕУ мора да дејствуваат заедно и да избегнат фрагментација на европскиот енергетски пазар.

Вучиќ рече дека е убеден оти сите ги очекува многу тешка есен и зима, а потешка отколку што очекува Лајен, која, како што рече, мора да биде оптимист кога зборува за тоа.

„Пред да дојдам тука имав дилема како ќе се однесува Урсула фон дер Лајен со мене, но беше многу љубезна и, знаете зошто го велам ова, иако се чувствував како ‘црна овца’ во друштво на овие големи пријатели, морам многу да и’ се заблагодарам и не се додворувам никому со ова – Урсула ни помогна многу кога е во прашање изградбата на гасниот интерконектор меѓу Србија и Бугарија и планирањето на интерконектор меѓу Северна Македонија и Србија“, рече Вучиќ.

Тоа значи нова инфраструктура за Србија, нагласи тој, додавајќи дека потоа ќе може да се изградат нови краци од гасоводот кон другите земји од Западен Балкан кои се дел од ЕУ.

„Никогаш немаше да можеме да ги постигнеме тие цели без нашите пријатели, а без присуството на нашиот пријател, претседателот Илхам Алиев, немаше да можеме да сметаме на диверзификација на изворите за снабдување со гас“, рече Вучиќ, обраќајќи и’ се на Лајен.

Вучиќ му рекол на претседателот на Азербејџан, Алиев дека сега е многу популарен во Европа и дека не може да го достигне.

„Многу пати разговарав со него, но сега едноставно не можам да го допрам, Алиев е многу популарен во Европа и не знам што направил во меѓувреме, но би сакал да го сподели со мене рецептот за како успеал во тоа“, рече Вучиќ.

Тој истакна дека ова е многу важен ден за Србија и дека кога вели дека не претерува.

„Секогаш се собираме кога мислиме дека нешто важно се случува, иако нашите луѓе тоа не го сфаќаат од првиот момент“, изјави Вучиќ.

Тој додаде дека Азербејџан е вистински пријател кој е со Бугарија и во време на неволја.

Вучиќ претходно изјави дека Србија на нејзина територија започнала со изградба на гасен интерконектор со Бугарија и дека двете земји проектот ќе го завршат за една година.

Вучиќ: Србија нема да воведе санкции за Русија

Србија не воведува санкции кон Русија, бидејќи таа се бори за својата политика каде што може, а нашата политика е дефинирана со заклучокот на Советот за национална безбедност, рече Вучиќ.

„Новите случувања на геополитичката сцена ќе имаат сериозни последици за Србија, која ќе биде под голем политички притисок, раководството треба да се води од здравиот разум и да ја спаси својата земја во најголемата криза“, додаде тој.