Регион
Вучиќ: Србија нема да ја поддржи резолуцијата на СE за територијалниот интегритет на Украина

Србија нема да испрати ниту еден од своите највисоки претставници на самитот на Советот на Европа во Рејкјавик кој ќе се одржи на 16-17 мај и нема да гласа за никаква резолуција за територијалниот интегритет на Украина, Молдавија и Грузија, изјави денеска српскиот претседател Александар Вучиќ, пренесува ТАСС.
„Република Србија ќе биде претставена на најниско ниво. Нема да одам во Рејкјавик и нема да гласаме за нивната резолуција [за територијалниот интегритет на Украина, Молдавија и Грузија]. Ќе се воздржиме. Тоа нема да го спречи нејзиното усвојување, но ќе мора да кажат дека не е усвоена едногласно“, рече Вучиќ во обраќањето до нацијата.
Вучиќ очекува негативна реакција од Западот во врска со овој потег, но истакна дека е подготвен да се соочи со тоа бидејќи Србија ќе ја изрази својата „принципиелна позиција“ поврзана со Повелбата на ОН.
„Подготвени сме да го поддржиме територијалниот интегритет на Украина, Молдавија и Грузија, но не сме подготвени да се откажеме од територијалниот интегритет на Србија“, изјави Вучиќ.
Србија претходно предложи амандман на резолуцијата на Советот на Европа за територијалниот интегритет на Украина, Грузија и Молдавија.
„Знаете дека поднесовме амандман во кој побаравме по делот „кога се зборува за територијалниот интегритет на Украина, Молдавија и Грузија“ да се напише и „како и сите други членки на Советот на Европа“, за да им олесниме, дури и да не ја спомнуваме Република Србија директно, само да го додадеме тоа. И тогаш сфативме, особено на инсистирање на Германија, дека територијалниот интегритет постои за оние чиј територијален интегритет е признаен од нив, а не од ОН. Така што нивната желба ќе биде да го заштитат територијалниот интегритет онаму каде што ним им одговара,“ објасни Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Уапсен шпион во Грција, осомничен за поврзаност со Русите

Етнички Грк од Грузија е уапсен во Александрополи, североисточна Грција, под обвинение за шпионажа, откако властите пронашле фотографии и видеа од воени објекти и опрема на неговиот мобилен телефон, пишува грчки Екатимерини.
Според грчката полиција, осомничениот испратил чувствителни материјали на неидентификуван примач во странство користејќи шифрирана апликација за комуникација. Според грчките медиуми, постои сомневање дека мажот фотографирал, снимал и дистрибуирал материјали од воено значење најмалку шест месеци.
Апсењето е извршено за време на заедничка операција на Националната разузнавачка служба (ЕЈП) и Одделот за криминалистичка истрага и гонење во Александрополи.
При прелиминарниот распит, осомничениот, наводно, признал дека фотографирал и снимал воени локации за друго лице. Според државната телевизија ЕРТ, властите веруваат дека мисијата можеби вклучувала планови за можна саботажа на воени објекти.
Лицето кое го регрутирало осомничениот е наводно член на меѓународна криминална мрежа и поврзан со руската воена разузнавачка служба ГРУ. Човекот признал дека првично му била понудена парична отштета, но на крајот постапил доброволно „за мајка Русија“. Тој, наводно, им рекол на истражителите дека во младоста служел во руската армија во Сибир.
Националната разузнавачка служба ја продолжува истрагата за да го утврди целосниот обем на операцијата, заклучува Екатимерини.
Регион
Во Белград најдено телото на девојчето кое неговата мајка го фрли во река во Загреб

Белградскиот Интерпол ја известил хрватската полиција дека во март во реката Сава во Белград пронашла тело на дете.
Загрепската полиција штотуку соопшти дека преку меѓународна полициска соработка е извршена ДНК анализа и е утврдено дека е жртвата на убиството, извршено на 15 јануари годинава во Загреб, кај мостот Јанкомир.
Станува збор за случај од почетокот на годинава кога ХГСС и други служби трагаа по тригодишно девојче кое мајка и го внела во реката кај мостот Јанкомир.
Мајката тие денови била сослушана во Жупаниското државно обвинителство во Загреб, а поради извршување на кривичното дело тешко убиство и е изречена едномесечен притвор.
Регион
Третата најголема партија во Бугарија потпиша соработка со партијата на Путин

Националистичката бугарска партија „Преродба“ потпиша договор за соработка со владејачката партија на Руската Федерација „Единствена Русија“. Ова се случи и покрај фактот што Русија официјално ја прогласи Бугарија за непријателска држава по почетокот на сеопфатната инвазија на Украина, дознава „Еурактив“, а пренесува УНН.
„Договорот предвидува размена на искуства, идеи и политичка пракса меѓу двете партии и претставува важен позитивен чекор кон обновување на целосните бугарско-руски односи“, наведуваат од партијата „Преродба“.
Договорот го потпишаа заменик-претседателот Цончо Ганев, кој е и потпретседател на Народното собрание и Владимир Јакушев – заменик претседател на Горниот дом на Државната дума на Руската Федерација.
Како што пишува УНН, „Преродба“ нема ништо против тоа што Русија ја прогласи Бугарија за непријателска држава по почетокот на војната во Украина и продолжува да ги одржува односите со владејачката партија.
Според достапните информации, „Преродба“ е третата по големина партија во бугарскиот парламент: по изборите во октомври 2024 година има 33 мандати од вкупно 240. Партијата отворено се противи на членството на Бугарија во ЕУ и НАТО, се залага за неутралност во војната на Русија против Украина и шири проруски наративи на социјалните мрежи.
Претходно таа неуспешно се обиде да организира референдум за забрана на воведувањето на еврото.
Исто така, оваа партија влезе во бугарскиот парламент благодарение на нејзиниот цврст став против вакцините и карантинот за време на пандемијата на Ковид.