Регион
Вучиќ ја помилува деканката од Ниш, таа не знае зошто: „Против мене не се води постапка“

Претседателот на Србија, Александар Вучиќ донесе одлука за помилување на 13 лица, меѓу кои и деканката на Филозофскиот факултет во Ниш, Наталија Јовановиќ. Таа наведува дека против неа нема кривична постапка, вели дека не знае за што е помилувана и дека претседателот со неговиот гест се обидува да добие наклоност, пишуваат српските медиуми.
Вучиќ пред неколку дена најави дека ќе донесе одлука за помилување на лицата кои беа уапсени или приведени за време на студентските протести, што подразбира изземање од кривично гонење. Одлуките за помилување беа донесени денеска, а покрај шестмина ученици, еден доцент, четворица директори на училишта и еден помошен работник во училиштето, помилувана е и деканката на Филозофскиот факултет Наталија Јовановиќ.
Јовановиќ не знае за кое дело е изземена од гонење.
„Измислува процес, нема обвинение, нема судење, не сум кривично гонета – ме помилува. Стигнавме до крајот. Се плаши за себе и мисли дека со помилување може да стекне некаква услуга. Никој што го прекршува законот не може да ја добие мојата наклонетост. Неговиот гест веројатно се должи на тоа што сум во јавноста, за да ми фрли некаква дамка“, изјавила Јовановиќ, пренесува „Јужни вести“.
Неколку месеци претходно, Обвинителството за организиран криминал покрена истрага против Наталија Јовановиќ со проширување на истрагата за случајот на поранешниот државен секретар во Министерството за образование, Небојша Ранѓеловиќ Нечер. Јовановиќ смета дека помилувањето се однесува на тој случај, но нагласува дека таа е само осомничена.
„Претпоставувам дека помилувањето се однесува на тоа затоа што во мојот живот бев во суд само за оставинското рочиште и за рочиштето на 29 ноември поради продолжување на тоа обвинение. Против мене не беше покренато обвинение, бев осомничена, не кривично гонета, за што сега ме помилува“, вели Наталија Јовановиќ.
Според тамошните медиуми, решенијата за помилување се доставени до Министерството за правда за да се спроведат понатамошни постапки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Регион
Гори во Грција: издадена наредба за итна евакуација

Голем шумски пожар избувна денес во областа Каравадос на грчкиот остров Кефалонија, а издадена е наредба за евакуација на три области, јавуваат грчките медиуми.
Пожарот избувнал во земјоделска и шумска зона, а ангажирани биле 20 припадници на противпожарната служба со седум возила, како и членови на планинската спасувачка служба и волонтери, објави „Катимерини“.
„Доколку се наоѓате во областите Каравадос, Доризата и Керамис, засолнете се и упатете се во правец на Аргостоли. Следете ги упатствата на властите“, се наведува во известувањето на противпожарната служба.
Четири авиони и два хеликоптера исто така помагаат во гаснењето на пожарот, пишува грчкиот весник.
Фото: принтскрин